১৪ আগষ্টত যোৰহাটত কৰ্তব্যৰত যান-বাহন আৰক্ষীক অশ্লীল গালি-গালাজ তথা চৰম দুৰ্ব্যহাৰ প্ৰাঞ্জল প্ৰাণ বাইলুং ওৰফে ৰাজা বাইলুঙক যোৱা নিশা গোৱাত গোৱা আৰক্ষীয়ে গ্ৰেপ্তাৰ কৰিছে।
বাইলুঙক অসমলৈ আনিবলৈ ইতিমধ্যে অসম আৰক্ষীৰ এটা দল গোৱালৈ ৰাওনা হৈছে।
অভিযোগমতে, বাইলুঙৰ গাড়ীয়ে গড় আলিত এখন মটৰচাইকেলত খুন্দা মৰাৰ পিছতে বাইলুঙে মটৰচাইকেল আৰোহীজনক দুৰ্ব্যৱহাৰ কৰিছিল। তাত হস্তক্ষেপ কৰিবলৈ যোৱা কৰ্তব্যৰত এজন সহকাৰী উপ-পৰিদৰ্শক প্ৰদীপ বুঢ়াগোহাঁইকো অতি অশ্লীল ভাষাৰে গালি পৰাৰ লগতে মাৰিবলৈও চোঁচা লৈছিল।
পিছত আৰক্ষীয়ে বাইলুঙক আটক কৰি থানালৈ লৈ যায় যদিও ৰাতিয়েই এৰি দিয়ে, যিটো ৰাজনৈতিক হেঁচাৰ বাবে কৰিবলৈ বাধ্য হোৱা বুলি অভিযোগ উঠিছিল।
ৰাজা বাইলুঙৰ সৈতে শীৰ্ষস্থানীয় বহুকেইজন বিজেপি নেতাৰ সম্পৰ্ক থকা বুলি চৰ্চা হৈছে। হিতেন গোস্বামীকে ধৰি কেইবাজনো নেতাৰ সৈতে তেওঁ সভাই-সমিতিয়ে একেলগে থকাৰ ফটোও ছ’চিয়েল মিডিয়াত প্ৰচাৰ হৈ আছে।
অৱশ্যে ঘটনাটোৰ পিছতে বিজেপিয়ে বাইলুঙৰ পৰা দূৰত্ব ৰক্ষা কৰে।
আনহাতে উক্ত ঘটনাটোৰ ভিডিঅ’টো ছ’চিয়েল মিডিয়াত ভাইৰেল হোৱাত বিভিন্ন পক্ষৰ পৰা হেঁচা পোৱা বুলি যোৰহাট আৰক্ষীয়ে স্বীকাৰ কৰিছে। যোৰহাট আৰক্ষীয়ে ট্ৰেফিক আৰক্ষীৰ সহকাৰী উপ-পৰিদৰ্শক প্ৰদীপ বুঢ়াগোহাঁইৰ অভিযোগৰ ভিত্তিত এটা গোচৰ (2167/19) ৰুজু কৰি তেওঁৰ সন্ধান কৰি আছিল।
আৰক্ষীৰ পৰা হাত সাৰিবলৈ বাইলুঙে গুৱাহাটীত আশ্ৰয় লৈছিল যদিও গুৱাহাটীলৈও আৰক্ষীয়ে বিচাৰি অহাৰ খবৰ পাই গোৱালৈ পলাইছিল।
অৱশেষত যোৱা নিশা গোৱাৰ চিটা ডি গোৱা নামৰ এখন বিলাসী হোটেলত আত্মগোপন কৰি থকা অৱস্থাত প্ৰাঞ্জল প্ৰাণ বাইলুক গ্ৰেপ্তাৰ কৰা হয়।
