ত্ৰিপুৰাত ৰাবাৰ খেতি এক লাভজনক ব্যৱসায়, কিন্তু দুটা কাৰণত এই খেতিয়ে বৰ্তমানৰ ৰাজ্য চৰকাৰখনক সমস্যাত পেলাইছে – ড্ৰাগছ আৰু বেদখল।
ত্ৰিপুৰাৰ ৰাজহ মন্ত্ৰী নৰেন্দ্ৰ চন্দ্ৰ দেববৰ্মাই সোমবাৰে জনোৱা মতে ৰাজ্যখনৰ ২১,০১৯ একৰ চৰকাৰী মাটিত বেদখল হৈছে আৰু ইয়াক ৰাবাৰ খেতিত ব্যৱহাৰ কৰা হৈছে।
কেৰালাৰ পিছত ত্ৰিপুৰাই হৈছে ভাৰতৰ দ্বিতীয়খন বৃহৎ ৰাবাৰ উৎপাদন কৰা ৰাজ্য। ৰাজ্যখনত প্ৰায় ৯০,০০০ হেক্টৰ ভূমিত ৰাবাৰ খেতি কৰা হয়।
ক্ষুদ্ৰ ৰাজ্যখনে বছৰি প্ৰায় ৭০,০০০ টন ৰাবাৰ উৎপাদন কৰে।
বেদখলকলৈ মন্ত্ৰী দেববৰ্মা সুখি নহয়, পূৰ্বৰ বাওঁপন্থী চৰকাৰে ইয়াক উদগনি যোগাইছিল বুলি তেওঁ দাবী কৰে।
কিন্তু দেববৰ্মাই হয়তো ত্ৰিপুৰা বিধানসভাৰ সদস্যসকলক এই কথা জনাবলৈ পাহৰিল যে বহু সংখ্যক ৰাবাৰ খেতিয়কে উক্ত বেদখলকৃত ভূমিত গাঞ্জাৰ খেতি কৰি আছে।
অঞ্চলটোত ড্ৰাগছ প্ৰতিৰোধী অভিযানত নিয়োজিত হৈ থকা এনফ’ৰ্চমেণ্ট এজেঞ্চিসমূহে উত্তৰ-পূবত গাঞ্জা সহবৰাহৰ এক নতুন ট্ৰেণ্ড লক্ষ্য কৰিছে।
এই পৰ্য্যন্ত গাঞ্জা উৎপাদনৰ প্ৰধান অঞ্চল আছিল মণিপুৰ, ইয়াৰ পৰা নিয়মিতৰূপে বিহাৰ আৰু উত্তৰ প্ৰদেশলৈ গাঞ্জাৰ সৰবৰাহ হৈ আহিছিল।
কিন্তু যোৱা কিছু বছৰত তাত চলা ব্যাপক অভিযানৰ ফলত ত্ৰিপুৰা গাঞ্জা উৎপাদন আৰু সৰবৰাহৰ নতুন কেন্দ্ৰস্থললৈ পৰিণত হৈছে।
ত্ৰিপুৰাৰ পৰা চলি থকা চোৰাং সৰবৰাহৰ চক্ৰক প্ৰতিৰোধ আৰু ধ্বংস কৰাৰ বাবে ৰাজহ চোৰাংচোৱা সঞ্চালকালয় (DRI)এ শুল্ক (প্ৰতিৰোধ) বিভাগৰ ঘণিষ্ঠ সহযোগত কাম কৰি আছে।
লক্ষণীয়ভাৱে DRI আৰু শুল্ক (প্ৰতিৰোধ) বিভাগৰ অনুসন্ধানত পোহৰলৈ অহা মতে ত্ৰিপুৰাৰ বিশালগড় আৰু চেপাহীজালা জিলা দুখন গাঞ্জা উৎপাদনৰ প্ৰধান কেন্দ্ৰ।
যিহেতু সমগ্ৰ চেপাহীজালা অঞ্চলটো ডাঠ সেউজভূমি আৰু ৰাবাৰ খেতিৰে ঢাক খাই আছে গাঞ্জা বেপাৰীসকলে কাৰো চকুত নপৰাকৈ স্থানীয় গাঁওবাসীৰ হতুৱাই গভীৰ জংঘলৰ ভিতৰত গাঞ্জাৰ খেতি কৰাইছে।
গাঞ্জা সৰবৰাহ চক্ৰই ত্ৰিপুৰাত আৰম্ভ কৰা এই নতুন অভিযানে সৰবৰাহকাৰী সকলৰ বাবে দুটা সুবিধা লৈ আনিছে।
উৎপাদন হোৱা গাঞ্জাৰ এটা ডাঙৰ অংশ বাংলাদেশলৈ সৰবৰাহ হয় যিহেতু তাত ইয়াৰ যথেষ্ট চাহিদা আছে।
দ্বিতীয়তে যিহেতু এই চক্ৰটো নতুন এনফ’ৰ্চমেণ্ট এজেঞ্চিসমূহৰ দ্বাৰা প্ৰতিবন্ধকতা সন্মুখীন হোৱাৰ সম্ভাৱনা তুলনামূলকভাৱে কম হ’ব।
আনহাতে অঞ্চলটোত গাঞ্জাৰ খেতি ধ্বংস কৰাৰ উদ্দেশ্যে তাৎক্ষণিক ব্যৱ্স্থা গ্ৰহণৰ বাব ইতিমধ্যে ৰাজহ চোৰাংচোৱা সঞ্চালকালয়ৰ এটা দলে ৰাবাৰ বৰ্ড আৰু চেপাহীজালা জিলা প্ৰশাসনৰ যোগাযোগ কৰিছে।
