নগাঁও জিলাৰ চামগুৰি আৰক্ষী থানাৰ অন্তৰ্গত আমনিত যোৱা নিশা এটি মৃতদেহ উদ্ধাৰ হোৱা ঘটনাই সমগ্ৰ অঞ্চলতে তীব্ৰ চাঞ্চল্যৰ সৃষ্টি কৰিছে।
ঘটনাৰ বিৱৰণী মতে চামগুৰি আৰক্ষী থানাৰ অন্তৰ্গত আমনিৰ আমতল তিনিআলিৰ ৩৭ নং ৰাষ্ট্ৰীয় ঘাইপথৰ কাষত থকা জিৰণি চ’ৰাত এটি মৃতদেহ পৰি থকা বুলি খবৰ পাই আৰক্ষীৰ তহলদাৰী দলে উদ্ধাৰ কৰে। পিছত আৰক্ষীয়ে লোকজনক চামগুৰি গেৰুৱামুখৰ প্ৰয়াত কৃষ্ণপদ ৰয়ৰ পুত্ৰ মনোৰঞ্জন ৰয়(৪০) বুলি চিনাক্ত কৰে।
মৃত মনোৰঞ্জনক কোনো লোকে হত্যা কৰা বুলি স্থানয়ী লোকে সন্দেহ প্ৰকাশ কৰিছে যদিও এই কথা মৰণো্ত্তৰ পৰীক্ষাৰ পিছতহে পোহৰলৈ আহিব। আনহাতে আৰক্ষীয়ে আজি মৃতদেহটো মৰণোত্তৰ পৰীক্ষাৰ বাবে নগাঁও অসামৰিক চিকিৎসালয়লৈ প্ৰেৰণ কৰে।
বিগত সময়ত দৰিদ্ৰ মনোৰঞ্জনে আমনিৰ কেইবাখনো হোটেলত শ্ৰমিক হিচাপে কৰি আহিছিল বুলি জানিব পৰা গৈছে।