অহা দুই বছৰত আম আদমি পাৰ্টি চমুকৈ আপে ছখন ৰাজ্যৰ বিধানসভা নিৰ্বাচনত প্ৰতিদ্বন্দ্বিতা আগবঢ়াব বুলি মন্তব্য কৰিছে দিল্লীৰ মুখ্য মন্ত্ৰী তথা দলটোৰ প্ৰধান অৰবিন্দ কেজৰিৱালে।
দলৰ নৱম ৰাষ্ট্ৰীয় পৰিষদৰ বৈঠকত কেজৰিৱালে কয় যে পৰৱৰ্তী দুই বছৰত উত্তৰাখণ্ড, উত্তৰ প্ৰদেশ, গোৱা, পাঞ্জাৱ, হিমাচল প্ৰদেশ আৰু গুজৰাটৰ বিধানসভা নিৰ্বাচনত প্ৰতিদ্বন্দ্বিতা আগবঢ়াম।
তেওঁ লগতে কয় আমাৰ নেতা তথা দিল্লীৰ শিক্ষা মন্ত্ৰী মনীষ চিছ’ডিয়াক উত্তৰ প্ৰদেশলৈ আহি মন্ত্ৰী সিদ্ধাৰ্থ নাথ সিঙৰ সৈতে যুক্তি তৰ্ক কৰিবলৈ প্ৰত্যাহ্বান জনাইছিল। কিন্তু মনীষ চিছ’ডিয়া তাত গৈ উপস্থিত হোৱাত তেওঁ পলাই গ’ল। তেওঁলোকে কোনো কামেই কৰা নাই।
ইয়াৰ উপৰি কয় যে দিল্লীৰ শিক্ষা মন্ত্ৰীয়ে যেতিয়া উত্তৰ প্ৰদেশৰ চৰকাৰী বিদ্যালয় চাবলৈ গৈছিল, আৰক্ষীয়ে তেওঁক বাধা দিছিল। ইয়ে প্ৰমাণ কৰে যে তেওঁলোকৰ বিদ্যালয়ৰ কেনে অৱস্থা, তেওঁলোকে যি স্কুল দেখুৱাবলৈ ভয় কৰে আমাৰ ল’ৰা-ছোৱালীয়ে তাত শিক্ষা গ্ৰহণ কৰি আছে।
ইফালে কৃষকৰ ট্ৰেক্টৰ ৰেলীৰ সময়ত সংঘটিত হোৱা হিংসাত্মক কাৰ্যকলাপক দুৰ্ভাগ্যজনক আখ্যা দি কেজৰিৱালে কয় যে এই ঘটনাৰ বাবে যি দায়ী তাৰ বিৰুদ্ধে কঠোৰ ব্যৱস্থা ল’ব লাগে।
‘আমি সকলোৱে কৃষক সকলক সমৰ্থন কৰা উচিত কিন্তু শান্তিপূৰ্ণভাৱে’, এইদৰে মন্তব্য কৰে কেজৰিৱালে।
