২০১৪’ ৰ লোকসভা নিৰ্বাচনৰ আগত নিৰ্বাচনী প্ৰচাৰত ভাগ লৈ প্ৰধান মন্ত্ৰী নৰেন্দ্ৰ মোদীয়ে ১৬ মে’ৰ পাছত বাংলাদেশীক টালি-টোপোলা বান্ধিবলৈ কৈছিল। কিন্তু যোৱা চাৰে চাৰি বছৰত কাৰ্যতঃ একো নকৰা চৰকাৰখনে হঠাতে অসম চুক্তিৰ ৬ নম্বৰ দফা সম্পৰ্কত ল’লে এক সিদ্ধান্ত।
নৰেন্দ্ৰ মোদী নেতৃত্বধীন চৰকাৰৰ এই হঠাতে লোৱা সিদ্ধান্ত কেৱল এক আভূৱাৰ বাদে আন একো নহয় বুলি মন্তব্য কৰিছে সদৌ অসম ছাত্ৰ সন্থাৰ নেতৃত্বই। লগতে এই সিদ্ধান্ত নৰেন্দ্ৰ মোদীয়ে ২০১৪’ৰ লোকসভা নিৰ্বাচনৰ পূৰ্বে দিয়া আশ্বাসৰ নামান্তৰ বুলিও অভিহিত কৰিছে ছাত্ৰ সন্থাই।
বৃহস্পতিবাৰে গুৱাহাটীৰ চহিদ ন্যাসত এখন সংবাদমেল অনুষ্ঠিত কৰি অসম চুক্তি সন্দৰ্ভত কেন্দ্ৰীয় চৰকাৰে লোৱা সিদ্ধান্তৰ প্ৰতিক্ৰিয়া ব্যক্ত কৰে সদৌ অসম ছাত্ৰ সন্থাই।
উল্লেখ্য যে, কালি কেন্দ্ৰীয় চৰকাৰৰ কেবিনেট বৈঠকত অসম চুক্তিৰ ৬ নম্বৰ দফা ৰূপায়ণৰ বাবে এখন উচ্চ স্তৰীয় সমিতি গঠন কৰাৰ সিদ্ধান্ত গ্ৰহণ কৰে। এই সমিতি খনে অসম চুক্তি ৰূপায়ণৰো যাৱতীয় কামকাজ আগবঢ়াই নিয়াৰ কথা কোৱা হৈছে। কেবিনেট বৈঠকৰ পাছত কেন্দ্ৰীয় গৃহ মন্ত্ৰী ৰাজনাথ সিঙে নতুন দিল্লীত এখন সংবাদমেল সম্বোধন কৰি এই কথা ঘোষণা কৰে।
ইপিনে কেন্দ্ৰীয় চৰকাৰৰ এই ঘোষণাৰ পাছত আজি সংবাদমেলত আছুৰ মুখ্য উপদেষ্টা ড০ সমুজ্বল কুমাৰ ভট্টাচাৰ্যই কয়, ‘’লোকসভা নিৰ্বাচনৰ আগমূহুৰ্তত নাগৰিকত্ব সংশোধনী বিধেয়কৰ বিৰুদ্ধে অসমত সৃষ্টি হোৱা তীব্ৰ আন্দোলনক শাম কটোৱাৰ বাবে কেন্দ্ৰীয় চৰকাৰে এই সিদ্ধান্ত লৈছে। ধিক্কাৰ দিব পাৰি যে নৰেন্দ্ৰ মোদী চৰকাৰে চাৰে চাৰি বছৰৰ মূৰত অসম চুক্তিৰ বিষয়ে আলোচনা কৰিবলৈ সময় পালে।
তেওঁ লগতে কেন্দ্ৰীয় চৰকাৰে ‘উচ্চস্তৰীয় সমিতি’ গঠন কৰিব ওলোৱা বিষয় সন্দৰ্ভত প্ৰতিক্ৰিয়া ব্যক্ত কৰি কয় যে ১৯৯৮ চনৰ ডিচেম্বৰ মাহতেই তেতিয়াৰ গৃহ মন্ত্ৰালয়ৰ যুটীয়া সচিব জি কে পিল্লাইৰ নেতৃত্বত এখন সমিতি গঠন হৈছিল। এই সমিতিত কেন্দ্ৰীয় চৰকাৰৰ ৪ জন, অসম চৰকাৰৰ ৩ জন আৰু সদৌ অসম ছাত্ৰ সন্থাৰ ৩ জন সদস্য আছিল। সমিতিখনৰ কেইবাখনো বৈঠক অনুষ্ঠিত হৈছিল বুলিও সমুজ্বল ভট্টাচাৰ্যই উল্লেখ কৰে।
মন কৰিবলগীয়া যে, ১৯৯৮ চনত গঠিত এই সমিতিখনত বৰ্তমানৰ মুখ্য মন্ত্ৰী সৰ্বানন্দ সোণোৱাল তেতিয়া আছুৰ প্ৰতিনিধি হিচাপে আছিল। এতিয়া একেটা বিষয়ত পুনৰ সমিতি গঠন কৰা বিষয়টোত একো নতুনত্ব নাই আৰু যুগান্তকাৰী নহয় বুলি আছু নেতৃত্বই প্ৰকাশ কৰে।
ইয়াৰ লগতে কালি আলোচনা কৰা বিধানসভাত খিলঞ্জীয়াৰ বাবে আসন সংৰক্ষণ কৰা বিষয়টোতো কোনো নতুনত্ব নাই বুলি উল্লেখ কৰি ১৯৯৮ চনত গঠন কৰা সমিতিতেই এই সম্পৰ্কত আলোচনা হৈছিল বুলি ছাত্ৰ সন্থাৰ তৰফৰ পৰা মন্তব্য প্ৰকাশ কৰে। জি কে পিল্লাইৰ নেতৃত্বত গঠিত এই সমিতিখনৰ ধাৰাবাহিকতা ৰক্ষা কৰি পুনৰ সক্ৰিয় কৰিবলৈও ছাত্ৰ সন্থাই দাবী জনায়।
একেদৰে, কালি সিদ্ধান্ত লোৱা অনুসৰি কেন্দ্ৰীয় চৰকাৰে গঠন কৰিবলগীয়া উচ্চ স্তৰীয় সমিতিখনক অসম চুক্তি ৰূপায়ণৰ বিষয়টো চোৱা চিতা কৰিবলৈ দিব বুলি কৰা ঘোষণাকো গ্ৰহণযোগ্য হ’ব নোৱাৰে বুলি আছু নেতৃত্বই মন্তব্য কৰে।
‘অসম চুক্তি ৰূপায়ণৰ নডেল মন্ত্ৰালয় হ’ল কেন্দ্ৰীয় গৃহ মন্ত্ৰালয়। সমিতি এখনৰ হ’ব নোৱাৰে। এই ঘোষণাৰ দ্বাৰা কেন্দ্ৰীয় চৰকাৰে নিজৰ দায়িত্ব এৰাই চলিব বিচাৰিছে’, -সমুজ্বল ভট্টাচাৰ্যই সংবাদমেলত কয়।
