সুযোগ পালেই ৰাষ্ট্ৰীয় নাগৰিকপঞ্জী প্ৰস্তুতৰ কৃতিত্বৰ দাবী কৰি থকা বিজেপি চৰকাৰে প্ৰকৃততে শুদ্ধ এন আৰ চিৰ বাবে কিমান কাম কৰিছে? মুখ্য মন্ত্ৰী সোণোৱালে কি দায়িত্ব পালন কৰিছে? এই গুৰুত্বপূৰ্ণ প্ৰশ্ন উত্থাপন কৰিছে আছুৰ নেতৃত্বই।
আছুৰ অভিযোগ, এন আৰ চিৰ খচৰাত সোমাই থকা সন্দেহযুক্ত নাগৰিকৰ নাম কৰ্তনৰ বাবে চৰকাৰে নিজে একো নকৰি ৰাইজলৈ দায়িত্ব ঠেলি দি হাত সাৱটি বহি আছে। লগতে মুখ্য মন্ত্ৰীজনে কিছুমান প্ৰৰোচনামূলক মন্তব্য কৰি আহিছে।
গুৱাহাটীৰ চহিদ ন্যাসত আজি এখন সংবাদমেলত আছুৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্যই দুৰ্বল ভূমিকাৰ বাবে চৰকাৰ আৰু মুখ্য মন্ত্ৰী সোণোৱালক কঠোৰ সমালোচনা কৰে।
“মুখ্য মন্ত্ৰীয়ে নিজে একো দায়িত্ব পালন নকৰি আনৰ গাত দোষ জাপি দিব বিচাৰিছে। উচ্চতম ন্যায়ালয়ৰ নিৰ্দেশনাৰ আধাৰত মুখ্য মন্ত্ৰী আৰু অসম চৰকাৰে সন্দেহযুক্ত বিদেশীৰ নাম কৰ্তন বাতিল কৰিবলৈ নিজৰ ফালৰ পৰা ক্ষমতা প্ৰয়োগ কৰিব পাৰে। কিন্তু তাকে নকৰি মুখ্য মন্ত্ৰীগৰাকীয়ে কিছুমান প্ৰৰোচনামূলক মন্তব্য কৰি আহিছে।” সমুজ্জ্বলে কয়।
উল্লেখ্য যে যোৱা কেইদিনমানত মুখ্য মন্ত্ৰীয় সৰ্বনন্দ সোণোৱালে পঞ্চায়ত নিৰ্বাচনৰ প্ৰচাৰ সভাবোৰত এন আৰ চিত সোমাই থকা বিদেশী নাগৰিকৰ বিৰুদ্ধে আপত্তি দাখিল কৰিবলৈ ৰাইজক আহ্বান জনাই আহিছে। ইয়াক এক প্ৰকাৰৰ প্ৰৰোচনামূলক বুলি অভিহিত কৰে আছুৱে।
আনহাতে আছুৱে কয়, “মুখ্য মন্ত্ৰী আৰু অসম চৰকাৰে কৰিব লগীয়া কামৰ দায়িত্বৰ পৰা হাত সাৰিবলৈ আনৰ ওপৰত এই দায়িত্ব ঠেলি দিব বিচাৰিছে।”
আছুৰ মতে, শুদ্ধ নাগৰিকপঞ্জী প্ৰস্তুত কৰাৰ দায়িত্ব চৰকাৰৰ আৰু এন আৰ চিৰ ৰাজ্যিক সমন্বয়ক প্ৰতীক হাজেলাৰ।
“মুখ্য মন্ত্ৰীগৰাকীয়ে নিজৰ দায়িত্ব পালন নকৰাৰ বাবে তেওঁক সময় আৰু জাতিয়ে ক্ষমা নকৰিব।” আছুৰ নেতৃত্বই কয়।
উল্লেখযোগ্য যে মুখ্য মন্ত্ৰীয়ে এখন নিৰ্বাচনী সভাত কৈছিল, “এন আৰ চিত বিদেশীৰ নাম থাকি গ’লে পাছত হায়ৈ বিয়ৈ কৰি লাভ নাই।”
কিন্তু মুখ্য মন্ত্ৰীৰ এই মন্তব্যত সমুজ্জ্বল ভট্টাচাৰ্যই কয়, “মুখ্য মন্ত্ৰীয়ে উচ্চতম ন্যায়ালয়ে দিয়া নিজৰ দায়িত্বখিনিয়ে পালন নকৰিলে।”
আছুৱে আজি সংবাদমেলত স্পষ্ট কৰি দিয়ে যে এন আৰ চি উন্নীতকৰণ প্ৰক্ৰিয়াটো উচ্চতম ন্যায়ালয়ে তদাৰক কৰিলেও ন্যায়ালয়ে বান্ধি দিয়া আইনৰ আধাৰত প্ৰশাসন যন্ত্ৰটো মুখ্য মন্ত্ৰী আৰু অসম চৰকাৰৰ নিৰ্দেশত চলিব লাগে। মুখ্য মন্ত্ৰী আৰু চৰকাৰে আগ্ৰহ দেখুৱালে এখন শুদ্ধ নাগৰিকপঞ্জী পোৱাত সহায়ক হ’ব।
ছাত্ৰ সন্থাৰ নেতৃত্বই ইয়াকো কয় যে অসম চুক্তি ৰূপায়ণৰ বাবে নাগৰিকত্ব আইনত বিশেষ ধাৰা অন্তৰ্ভুক্ত আছে। এই ধাৰা প্ৰয়োগ কৰি অসম চৰকাৰৰ বিষয়াসকলে সন্দেহযুক্ত নাগৰিকৰ নাম চূড়ান্ত খচৰাৰ পৰা বাদ দিয়াৰ ব্যৱস্থা গ্ৰহণ কৰিব পাৰে।
এন আৰ চিখন পূৰ্ণ ৰূপত প্ৰকাশ পোৱাৰ আগলৈ আইনৰ আধাৰত বিষয়াসকলে নিজাববীয়াকৈ অনুসন্ধান চলাব পাৰে। চূড়ান্ত খচৰাত থকা কোনো লোককো বিষয়াসকলে সন্দেহবশতঃ শুনানিৰ বাবে মাতিব পাৰে আৰু তথ্য-পাতি পুনৰ বিচাৰ কৰি চাব পাৰে। কিন্তু সৰ্বানন্দ সোণোৱাল নেতৃত্বাধীন চৰকাৰখনে তেনে কোনো ব্যৱস্থা গ্ৰহণ কৰা নাই।
ইয়াৰ উপৰি উচ্চতম ন্যায়ালয়ে দাবী আৰু আপত্তিৰ প্ৰক্ৰিয়া চলি থকা সময়তে ৰাজ্য চৰকাৰক নাগৰিকপঞ্জীৰ বাবে আবেদন কৰা সকলো আবেদনকাৰীক বায়’মেট্ৰিক তথ্য-পাতি সংগ্ৰহ কৰিবলৈ নিৰ্দেশ দিছিল। কিন্তু অসম চৰকাৰে এই পৰ্যন্ত এই দিশটোত এতিয়ালৈ কোনো ৱ্যৱস্থা লোৱা নাই।
ছাত্ৰ সন্থাৰ নেতৃত্বই উপৰোক্ত উদাহৰণসমূহেৰে অসম চৰকাৰৰ লগতে মুখ্য মন্ত্ৰী সৰ্বানন্দ সোণোৱালক কঠোৰ ভাষাৰে সমোলাচনা কৰি ‘আনৰ গাত দোষ জাপি দিয়াতকৈ নিজৰ দায়িত্ব পালন কৰিলে ৰাজ্যখনৰ ভৱিষ্যত সুৰক্ষিত হ’ব’ বুলি মন্তব্য কৰে।
লগতে অবৈধ বাংলাদেশীৰ নামমুক্ত এন আৰ চি প্ৰকাশ নোহোৱা পৰ্যন্ত ‘হায়ৈ-বিয়ৈ কৰিয়েই থাকিম’ বুলিও আছু নেতৃত্বই প্ৰকাশ কৰে।
