এম এন এফত যোগদান আইজল এফ চিৰ স্বত্বাধিকাৰী ৰবাৰ্ট ৰোমাৱাই ৰয়টেৰ
মিজোৰামৰ ৰাজনীতিত নতুন মোৰ। সোমবাৰে দেশৰ আগশাৰীৰ ফুটবল ক্লাব আইজল এফ চিৰ স্বত্ত্বাধিকাৰী ৰবাৰ্ট ৰোমাৱাই ৰয়টে আনুষ্ঠানিকভাৱে মিজো নেশ্যনেল ফ্ৰণ্ট চমুকৈ এম এন এফত যোগদান কৰে।
উল্লেখ্য যে আইজল এফ চি হৈছে উত্তৰ-পূবৰ একমাত্ৰ ফুটবল ক্লাব যিয়ে দেশৰ সন্মানীয় তথা সৰ্ববৃহৎ ফুটবল প্ৰতিযোগিতা আই লীগৰ খিতাপ দখল কৰিবলৈ সক্ষম হৈছে।
‘মিজো নেশ্যনেল ফ্ৰণ্টত যোগদান কৰা সিদ্ধান্ত মোৰ বাবে সহজ নাছিল কিয়নো ৰাজ্য চৰকাৰৰ সৈতে আমাৰ নৰ্থ-ইষ্ট কনচালটেন্সি চাৰ্ভিচেছৰ বহু প্ৰকল্পৰ কাম চলি আছে’। এইদৰে ৰোমাৱিয়া ৰইটে সংবাদ মাধ্যমৰ আগত কয়।
তেওঁ লগতে কয়- ‘সমাজ তথা অৰ্থনৈতিক ক্ষেত্ৰখনৰ উন্নয়ন সাধন কৰাৰ মানসিকতা একমাত্ৰ এম এন এফ দলটোৰে আছে। সেয়ে মই বহু চিন্তা-চৰ্চা কৰাৰ পাছত এই দলটোত আনুষ্ঠানিকভাৱে যোগদান কৰাৰ সিদ্ধান্ত ল’লো। আজি ভগৱানে মোক দুখীয়া লোকৰ সমস্যা সমাধান কৰিবলৈ সুযোগ দিছে’।
আনহাতে আইজল এফ চিৰ স্বত্ত্বাধিকাৰীয়ে এম এন এফত যোগদান কৰাক লৈ যথেষ্ট সুখী তথা অনাগত দিনত এই যোগদানে দলটোক আৰু অধিক শক্তিশালী কৰি তুলিব লগতে ৰাজ্যৰ জনসাধাৰণে পুনৰ এবাৰ শাসনত অধিষ্ঠিত কৰিব বুলি আশা প্ৰকাশ কৰে দলৰ সভাপতি জোৰামথাংগাই।