শুকুৰবাৰে সন্ধিয়া ৰাজ্যিক বিজেপিৰ এক উচ্চ পৰ্যায়ৰ বিশেষ বৈঠকত অংশগ্ৰহণ কৰে কেন্দ্ৰীয় গৃহমন্ত্ৰী অমিত শ্বাহে। ৰাজ্যিক বিজেপিৰ মুখ্য কাৰ্যালয় অটল বিহাৰী বাজপেয়ী ভৱনত অনুষ্ঠিত হয় এই বৈঠক।
এই বৈঠকত মুখ্যমন্ত্ৰী হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱাল, ৰাজ্যিক বিজেপিৰ সভাপতি দিলীপ শইকীয়াকে ধৰি ৰাজ্যিক বিজেপিৰ মূল সমিতি আৰু কাৰ্যনিৰ্বাহক সমিতিৰ জ্যেষ্ঠ সদস্যসকল উপস্থিত থাকে।
ৰাজ্যিক বিজেপিৰ সূত্ৰই জনোৱা মতে, আগন্তুক অসম বিধানসভা নিৰ্বাচনৰ বাবে সাংগঠনিক বিষয় আৰু নিৰ্বাচনী কৌশলৰ ওপৰত বৈঠকত আলোচনা কৰা হয়। এই বৈঠকত এন ডি এৰ মিত্ৰ দল অগপ আৰু বি পি এফৰ সৈতে আসন ভাগ-বতৰাৰ বিষয়টোও আলোচনা কৰা হয়।
ইয়াৰ উপৰিও বিটিআৰত বিপিএফৰ সৈতে প্ৰমোদ বড়ো নেতৃত্বাধীন দলৰ দ্বন্দ্বৰ কথা বিবেচনা কৰি আসন বুজাপৰা প্ৰক্ৰিয়াত ইউপিপিএলক স্থান দিয়াটো সম্ভৱ হ’ব নে নহ’ব সেই বিষয়টোও আলোচনাত স্থান পায়।
আনহাতে, নিৰ্বাচনী প্ৰচাৰ আৰু বিজেপিৰ মিত্ৰজোঁটৰ অংশীদাৰ দলৰ সৈতে তৃণমূল পৰ্যায়ৰ সমন্বয়ৰ ওপৰতো আলোচনা কৰা হয়।
উল্লেখ্য যে মুখ্যমন্ত্রী শর্মাই পূর্বে উল্লেখ কৰিছিল যে বিধানসভা নির্বাচনৰ বাবে এন ডি এৰ আসন ভাগ-বতৰা প্রক্রিয়া ফেব্রুৱাৰী মাহৰ মাজভাগত সম্পূৰ্ণ হোৱাৰ লগতে অহা মাহৰ শেষৰ ফালে বিজেপিৰ প্রার্থী তালিকা চূড়ান্ত হোৱাৰ সম্ভাৱনা আছে৷
ইপিনে, কালি ডিব্ৰুগড়ত কেন্দ্ৰীয় গৃহমন্ত্ৰী অমিত শ্বাহে আগন্তুক বিধানসভাৰ নিৰ্বাচনত মুখ্যমন্ত্ৰীৰ মুখ হিচাপে হিমন্ত বিশ্ব শৰ্মাৰ নাম ৰাজহুৱাভাৱে ঘোষণা কৰাৰ পিছত দলটোৰ অভ্যন্তৰত বিকল্প নেতাৰ চৰ্চাৰ বিষয়টো প্ৰায় তল পৰিল।
