বিশ্বকাপৰ ফাইনেলত আৰ্জেণ্টিনা আৰু স্পেইনৰ মাজত যুঁজখন মূলতঃ ফুটবলৰ আছিল। দুটামান সৰু সৰু ঘটনাৰ বাহিৰে দুয়োটা দলৰ ফুটবলাৰসকল খেলখনত সংযত আছিল। ৰেফাৰীয়েও বহু কাৰ্ড দেখুৱাব লগা নাছিল।
কিন্তু খেলৰ চূড়ান্ত হুইচেল বজোৱাৰ লগে লগে পৰিস্থিতি সলনি হ’ল। খেলপথাৰত দুয়োটা দলৰ ফুটবলাৰৰ মাজত তৰ্ক-বিতৰ্ক, ঠেলাঠেলি আৰু হতাহতি আৰম্ভ হয়। এই উত্তেজনাৰ মাজত আৰ্জেণ্টিনাৰ প্ৰশিক্ষক লিয়নেল স্কাল’নিও জড়িত হৈ পৰে।
খেলখন শেষ হোৱাৰ লগে লগে স্পেইনৰ ফুটবলাৰসকলে নিজৰ জয়ৰ উদযাপন কৰিবলৈ আৰম্ভ কৰে। আনহাতে, পৰাজয়ত হতাশ হোৱা আৰ্জেণ্টিনাৰ কিছুমানে খেলপথাৰত বহি বা শুই পৰে। ইয়াৰ মাজতে প্ৰথমে খেলপথাৰৰ মাজত দুয়োটা দলৰ ফুটবলাৰৰ মাজত কথা কটাকটি আৰম্ভ হয়, যিটো ক্ষন্তেকতে হতাহতিত পৰিণত হয়।
এই সংঘাতৰ কেন্দ্ৰবিন্দু আছিল আৰ্জেণ্টিনাৰ লিয়াণ্ড্ৰ’ পেৰেডেছ। মেচত নমাৰ ৫ মিনিটৰ ভিতৰতে তেওঁ অবাঞ্চিত টেকেলৰ বাবে হালধীয়া কাৰ্ড লাভ কৰিছিল। চূড়ান্ত হুইচেলৰ পিছত প্ৰথমে স্পেইনৰ এৰিক গাৰ্চিয়াৰ সৈতে তেওঁৰ খকাখুন্দা লাগে।
এটা সময়ত পেৰেডছে গাৰ্চিয়াৰ ডিঙিত চেপি ধৰিলে। পিছত স্পেইনৰ গাভিৰ সৈতেও হোৱা সংঘৰ্ষত জড়িত হৈ তেওঁক ঠেলি পেলাই দিয়াৰ অভিযোগ উত্থাপন হয়। এই ঘটনাৰ বাবে তেওঁক পোনপটীয়া ৰঙা কাৰ্ড দেখুওৱা হয়।
দুয়োটা দলৰ ছাপোৰ্ট ষ্টাফ আৰু কোচিং সদস্যই পৰিস্থিতি চম্ভালিবলৈ লৰালৰিকৈ খেলপথাৰলৈ দৌৰি আহিল। স্কাল’নীয়েও নিজৰ ফুটবলাৰসকলক আঁতৰাই নিবলৈ চেষ্টা কৰে। অৱশ্যে তাৰ আগতে গাৰ্চিয়াৰ সৈতে তেওঁৰ উত্তপ্ত বাক্-বিতণ্ডা হৈছিল। সাধাৰণতে শান্ত স্বভাৱৰ প্ৰশিক্ষক হিচাপে পৰিচিত স্কাল’নীক এনে মেজাজত খুব কমেইহে দেখা পোৱা যায়।
ইপিনে, আৰ্জেণ্টিনাৰ অভিজ্ঞ ডিফেণ্ডাৰ নিকোলাছ অটামেণ্ডিৰ সৈতে স্পেইনৰ অধিনায়ক ৰড্ৰিৰো তৰ্ক-বিতৰ্ক হয়। অৱশ্যে সেই ঘটনাটো মৌখিক তৰ্ক-বিতৰ্কতে সীমাবদ্ধ আছিল আৰু হতাহতিৰ স্তৰত উপনীত হোৱা নাছিল। খেলৰ চূড়ান্ত হুইচেলৰ পিছত হোৱা উত্তপ্ত পৰিস্থিতিয়ে ফাইনেলৰ পৰিৱেশত কিছু হ’লেও বিতৰ্কৰ সৃষ্টি কৰিলে।
