অৰুণাচল প্ৰদেশৰ বিধানসভা নিৰ্বাচনৰ ভোটগণনা আজি ইতিমধ্যে আৰম্ভ হৈছে। প্ৰাৰম্ভিক ধাৰা মতে ৬খন আসনত আগবাঢ়ি আছে বিজেপি। যিহেতু ইতিমধ্যে ১০খন আসন লাভ কৰিছে, সেয়েহে এতিয়া মুঠতে ১৬খন আসনত আগবাঢ়ি আছে বিজেপি। নেশ্যনেল পিপলছ পাৰ্টি (এন পি পি), কংগ্ৰেছ বা আন কোনো দলে ৰাজ্যখনত এতিয়াও একাউণ্ট খুলিব পৰা নাই।
২০১৯ চনৰ অৰুণাচল প্ৰদেশৰ বিধানসভা নিৰ্বাচনত বিজেপিয়ে ৪১ খন আসন লাভ কৰিছিল। ৭খন আসন জনতা দলে (ইউনাইটেড) লাভ কৰিছিল। নেশ্যনেল পিপলছ পাৰ্টিয়ে ৫খন আসনত জয়লাভ কৰে। কংগ্ৰেছে চাৰিখন আসনত জয়লাভ কৰিছিল। পিপলছ পাৰ্টি অফ অৰুণাচল প্ৰদেশে এখন আসনত জয়লাভ কৰিছিল। নিৰ্দলীয় প্ৰাৰ্থীয়ে লাভ কৰিছিল দুখন আসন।
লগতে পঢ়কঃ আহি গ’ল নিৰ্বাচনী সমীক্ষা : কোন জিকিব? কোনে লাভ কৰিব কিমান আসন?
ৰাজ্যৰ ২৫টা জিলা সদৰৰ ৪০টা কেন্দ্ৰত ভোটগণনা চলি আছে। ডাক বেলট প্ৰথমে গণনা কৰা হয়। পুৱা ৬:৩০ বজাৰ পৰা আৰম্ভ হয় ইভিএমৰ গণনা। অৰুণাচল প্ৰদেশৰ মুখ্য নিৰ্বাচনী বিষয়া পৱন কুমাৰ ছাইনে কয় যে দুপৰীয়াৰ ভিতৰত গণনা শেষ হোৱাৰ সম্ভাৱনা আছে।
অৰুণাচল প্ৰদেশৰ মুঠ বিধানসভা আসনৰ সংখ্যা ৬০খন। কিন্তু এইবাৰ ৫০টা সমষ্টিত ভোটগ্ৰহণ অনুষ্ঠিত হৈছে। ইতিমধ্যে বিনা প্ৰতিদ্বন্দ্বিতাত জয়লাভ কৰিছে বিদায়ী শাসকীয় দল বিজেপিয়ে। বিদায়ী মুখ্যমন্ত্ৰী পেমা খাণ্ডু আৰু উপ-মুখ্যমন্ত্ৰী চাউনা মেই জয়লাভ কৰিছে।
অৰুণাচল প্ৰদেশৰ বিধানসভা নিৰ্বাচনৰ ভোটগণনা আজি পুৱা ৬ বজাৰ পৰা আৰম্ভ হৈছে। ওড়িশাৰ বিধানসভা নিৰ্বাচন, অন্ধ্ৰ প্ৰদেশৰ বিধানসভা নিৰ্বাচন, লোকসভা নিৰ্বাচনকে ধৰি মঙলবাৰে গণনা কৰা হব যদিও আজি অৰুণাচল বিধানসভাৰ ফলাফল ঘোষণা কৰা হৈছে। কিয়নো উত্তৰ-পূব ভাৰতৰ ৰাজ্যখনৰ বিধানসভাৰ কাৰ্যকাল আজি (২ জুন) শেষ। সেই পৰিস্থিতিত আজিৰ ভিতৰত এখন নতুন বিধানসভা গঠন কৰিব লাগিব। সেয়েহে অৰুণাচল বিধানসভাৰ নিৰ্বাচনৰ গণনা আগবঢ়াই অনা হৈছে।
লগতে পঢ়কঃ ২৯৫ খন আসন লাভ কৰিব বিৰোধী ঐক্য ইণ্ডিয়াই : আত্মবিশ্বাসী কংগ্ৰেছ
সাধাৰণতে পুৱা ৮ বজাৰ পৰা ভোটগণনা আৰম্ভ হয়। কিন্তু গণনাৰ পৰ্যায়টো সোনকালে সম্পূৰ্ণ কৰিবলৈ পুৱা ৬ বজাৰ পৰা গণনা আৰম্ভ কৰা হয়। কিন্তু আজি কেৱল বিধানসভা নিৰ্বাচনৰ ভোটগণনা চলি আছে। অহা মঙলবাৰে (৪ জুন) অৰুণাচলৰ দুটা লোকসভা সমষ্টিৰ (অৰুণাচল পূৱ আৰু অৰুণাচল পশ্চিম) ভোটগণনা কৰা হ’ব।
