বৰ্তমান ডিব্ৰুগড় জিলা কাৰাগাৰত কাৰাৰুদ্ধ হৈ থকা কৃষক মুক্তি সংগ্ৰাম সমিতিৰ উপদেষ্টা অখিল গগৈক বিনা চৰ্তে মুকলি কৰি দিয়াৰ দাবীৰে অসম নাগৰিক সমাজে আজি মুখ্য মন্ত্ৰী সোণোৱালক সাক্ষাৎ কৰি এখন স্মাৰকপত্ৰ প্ৰদান কৰে।
অসম নাগৰিক সমাজৰ হৈ লক্ষ্মীনন্দন বৰা, হৰেকৃষ্ণ ডেকা, অৰূপ কুমাৰ দত্ত, অজিত কুমাৰ ভূঞা, বীৰেন সিংহ, ননী বৰপূজাৰী, প্ৰশান্ত ৰাজগুৰু, নিত্য বৰা, মুনীন বায়ন, পৰেশ মালাকাৰ আৰু অখিল ৰঞ্জন দত্তৰ স্বাক্ষৰ সম্বলিত এক স্মাৰকপত্ৰ প্ৰদান কৰা হয়।
‘চৰকাৰে নাগৰিকত্ব সংশোধনী আইন আনিছে। অসমৰ এক বৃহৎ অংশৰ ৰাইজে বিভিন্ন সংগঠনৰ নেতৃত্বত এই আইনৰ বিৰুদ্ধে আন্দোলন কৰিছে। চৰকাৰে লোৱা কোনো সিদ্ধান্তৰ বিৰুদ্ধে অহিংস আৰু গণতান্ত্ৰিক পদ্ধতিৰে আন্দোলন কৰাৰ সংবিধান প্ৰদত্ত অধিকাৰ যি কোনো ভাৰতীয় নাগৰিকৰে আছে। সেই অধিকাৰ অখিল গগৈ আৰু তেওঁৰ সতীৰ্থ সকলৰো আছে। আমি ভাবোঁ চৰকাৰী নীতিৰ বিৰোধিতা কৰা বাবেই অখিল গগৈৰ ওপৰত এটাৰ পিছত এটাকৈ গোচৰ জাপি দি তেওঁক কাৰাৰুদ্ধ কৰি থোৱাটো আৰু কেৱল ‘কা’ আন্দোলনৰ নেতৃত্ব দিয়া বাবে তেওঁৰ সতীৰ্থ সকলক ইমান দিন ধৰি জে’লত ভৰাই থোৱাটো অন্যায় হৈছে।’ স্মাৰকপত্ৰত উল্লেখ কৰে।
স্মাৰকপত্ৰত লগতে কোৱা হয়, ‘অখিল গগৈ আৰু তেওঁৰ সতীৰ্থ সকলে কেতিয়াও দেশৰ সংবিধান আৰু সাৰ্বভৌমত্বৰ প্ৰতি প্ৰত্যাহ্বান জনোৱা নাই৷ চাৰিমাহৰো অধিককাল কাৰাগাৰত কটোৱা অখিল গগৈৰ স্বাস্থ্যৰ অৱনতিও আমাৰ দুশ্চিন্তাৰ কাৰণ হৈ পৰিছে৷ এনে, অৱস্থাত ক’ৰ’ণা বীজাণুৱে জনসাধাৰণৰ মাজত ত্ৰাসৰ সৃষ্টিকৰাৰ সময়ত, চৰকাৰৰ লগত ৰাজনৈতিক মতদ্বৈধতাৰ বাবেই জে’লত থাকিব লগা হোৱা অখিল গগৈ আৰু অন্যান্য সকলৰ প্ৰতি বদন্যতা দেখুৱাই তেওঁলোকক জে’লৰ পৰা অতি শীঘ্ৰে বিনাচৰ্তে মুক্ত কৰি দিবলৈ আমি চৰকাৰক অনুৰোধ জনালোঁ৷’
উক্ত স্মাৰকপত্ৰৰ জৰিয়তে অসম নাগৰিক সমাজে অখিল গগৈৰ লগতে অন্য ‘কা’ বিৰোধী নেতাসকলক কাৰাগাৰৰ পৰা বিনা চৰ্তে মুকলি কৰি দিয়াৰ বাবে মুখ্যমন্ত্ৰীক দাবী তোলে।
