অসমৰ স্বাস্থ্য বিভাগে অহা ১২ আগষ্টৰ পৰা দিনে এক লাখ ক’ভিড টেষ্টৰ লক্ষ্য নিৰ্ধাৰণ কৰিছে।
ক’ভিড মহামাৰীৰ সৈতে মোকাবিলাৰ ক্ষেত্ৰত টেষ্টক অগ্ৰাধিকাৰ দি এই প্ৰস্তুতি চলোৱা হৈছে।
অসমত বৰ্তমান দিনে ৫০ৰ পৰা ৬০হাজাৰৰ ভিতৰত ক’ভিড টেষ্ট সম্পন্ন হৈ আহিছে।
যোৱা ৪ আগষ্টত অসমত ২৪ ঘণ্টাত এতিয়ালৈকে সৰ্বাধিক ৫৯,০৬৪টা টেষ্ট সম্পন্ন হৈছে।
অসমৰ বিভিন্ন জিলাত ক’ভিড টেষ্টৰ তুলনাত পজিটিভৰ হাৰ ১.৫ৰ পৰা ২১ শতাংশলৈকে দেখা গৈছে।
অসমত শেহতীয়াকৈ পজিটিভৰ হাৰ নিয়মিতভাৱে হ্ৰাস পাই আহিছে।
যোৱা ২৪ ঘণ্টাত অসমত ৫৪,৮৪৫টা ক’ভিড টেষ্ট সম্পন্ন হৈছে, ২২১৮গৰাকী ব্যক্তি পজিটিভ চিনাক্ত হৈছে। পজিটিভৰ হাৰ হৈছে ৪.০৪ শতাংশ।
১৭৮২গৰাকী নতুনকৈ ক’ভিড মুক্ত ব্যক্তিৰ সৈতে অসমত মুঠ আৰোগ্য লোকৰ সংখ্যাই শনিবাৰে ৪০হাজাৰ অতিক্ৰম কৰিছে।
অসমত এতিয়ালৈকে ৪০,৫৯১গৰাকী ব্যক্তিয়ে ক’ভিডৰ পৰা আৰোগ্য হৈ চিকিৎসালয় এৰিছে।
অসমত বৰ্তমান সক্ৰিয় ৰোগীৰ সংখ্যা হৈছে ১৬,৯৮০ (।)
নতুন ক’ভিড পজিটিভ ব্যক্তিসকলক ধৰি অসমত চিনাক্ত মুঠ আক্ৰান্তৰ সংখ্যা শনিবাৰ পৰ্য্যন্ত ৫৭,৭১৪লৈ বৃদ্ধি পাইছে।
আনহাতে শনিবাৰলৈকে অসমত ক’ভিডত মৃত্যু হোৱা লোকৰ সংখ্যা ১৪০লৈ বৃদ্ধি পাইছে।