অসমৰ ৰাইজ তথা বিভিন্ন জাতীয়-জনগোষ্ঠীয় দল-সংগঠনে কৰা আন্দোলনক সম্পূৰ্ণৰূপে ভেঙুচালি কৰি শাসকদল বিজেপিয়ে লোকসভাত গৃহীত কৰিলে নাগৰিকত্ব সংশোধনী বিধেয়ক। দলটোৰ নেতৃত্বৰ এই স্থিতিত অসমৰ ৰাইজৰ প্ৰতিবাদৰ সমান্তৰালকৈ দলটোৰ মজিয়াতো ক্ষোভৰ উৎগিৰণ হৈছে।
বিজেপিৰ এই ‘অসম বিৰোধী’ স্থিতিৰ বিৰোধিতাৰে দলটোৰ সদস্য পদ ত্যাগ কৰিছে কেইবাজনো নেতাই। পত্ৰযোগে তেওঁলোকে দলৰ ৰাজ্যিক নেতৃত্বক জনাইছে তীব্ৰ অসন্তুষ্টি।
দলৰ সভাপতিলৈ ৮ জানুৱাৰিত পদত্যাগ পত্ৰ প্ৰেৰণ কৰিছে বিজেপিৰ শোণিতপুৰ পশ্চিম জিলা সমিতিৰ প্ৰাক্তন উপ-সভাপতি অনুপম বৰুৱাই।
বৰুৱাই সভাপতিলৈ লিখা পদত্যাগ পত্ৰখনত পূৰ্বৰ চৰকাৰৰ কু-শাসনৰ পৰা অসমবাসীক পৰিত্ৰাণ দিয়াৰ স্বাৰ্থত বিজেপিত যোগ দিছিল বুলি উল্লেখ কৰি কেৱল বিধায়কখন গৃহীত কৰাৰ বাবেই পদত্যাগ কৰা বুলি উল্লেখ কৰে।
‘জাতীয়তাবাদী নেতা সৰ্বানন্দ সোণোৱালৰ সহযোদ্ধা হিচাপে আঞ্চলিকতাবাদৰ ভেটি মজবুত কৰি ৰাষ্ট্ৰীয়তাবাদক শক্তিশালী কৰি এখন সুন্দৰ ভাৰত গঢ়িবলৈ সপোন দেখিছিলো। সেই হেতুকে বিগত পাঁচ বছৰ তৃণমূল পৰ্যায়ৰ পৰা ৰাজ্যিক পৰ্যায়লৈ নিস্বাৰ্থভাৱে দলটোৰ প্ৰতি সেৱা আগবঢ়াইছিলো। কিন্তু আজি অসমীয়া জাতিৰ ভাষা, সাহিত্য, সংস্কৃতি নিঃশেষ, কৰিবলৈ ৰাজ্য আৰু কেন্দ্ৰীয় চৰকাৰে নাগৰিকত্ব সংশোধনী বিধেয়ক, ২০১৬ গৃহীত কৰিবলৈ যি তৎপৰতা দেখুৱাইছে তাৰ প্ৰতিবাদত মই ভাৰতীয় জনতা পাৰ্টিৰ প্ৰাথমিক সদস্যৰ পৰা পদত্যাগ কৰি এই পত্ৰ প্ৰেৰণ কৰিলো’, অনুপম বৰুৱাই পদত্যাগ পত্ৰখনত লিখে।
বিধেয়কৰ বাবেই দলৰ পৰা পদত্যাগ কৰে মুখপাত্ৰ মেহদী আলম বৰায়ো। বৰাই পদত্যাগ পত্ৰ আজি দলৰ সভাপতিলৈ প্ৰেৰণ কৰিছে।
‘উক্ত বিধেয়কখনে অসমৰ সমাজ জীৱনক ক্ষতিগ্ৰস্ত কৰিব বুলি মই বিবেচনা কৰি আহিছো। এই বিধেয়কখনে অসমৰ ধৰ্মনিৰপেক্ষ চিন্তা চৰ্চাক আঘাত কৰিব।’ পদত্যাগ পত্ৰত মেহদী আলম বৰাই এইদৰে কয়।
উল্লেখ্য যে, বিধেয়খনৰ বিৰোধিতা কৰা বাবেই দলৰ পৰা বহিষ্কৃত হ’ব লগীয়া হৈছিল বিজেপিৰ জ্যেষ্ঠ নেত্ৰী মীৰা বৰঠাকুৰ।
বিজেপিৰ দিচপুৰৰ বিধায়ক অতুল বৰায়ো বিধেয়কখনৰ বিৰোধিতা কৰি মুখ্য মন্ত্ৰী সৰ্বানন্দ সোণোৱাললৈ পত্ৰ প্ৰেৰণ কৰিছিল। এতিয়া বিধেয়কখন গৃহীত হোৱাৰ পাছত তেওঁ কি স্থিতি লয় সেয়াও লক্ষণীয় হ’ব।
কিন্তু কেৱল অসমৰ দল-সংগঠন আৰু সাধাৰণ ৰাইজেই নহয় বিজেপিৰ একাংশ সদস্যও এই নাগৰিকত্ব সংশোধনী বিধেয়কৰ যে বিৰোধী সেয়া স্পষ্ট। গোপন সূত্ৰৰ খবৰ মতে, আন বহু সংখ্যক নেতা-কৰ্মীয়ে দলত্যাগ কৰিবলৈ সাজু হৈছে।
