লোকপ্ৰিয় গোপীনাথ বৰদলৈৰ মৃত্যু তিথি ৫ আগষ্টৰ দিনটো ৰাজ্য চৰকাৰে পোন প্ৰথমবাৰৰ বাবে লোক কল্যাণ দিৱস হিচাপে পালন কৰিছে। লগতে ৰাজ্য চৰকাৰৰ অধীনস্থ কৰ্মৰত কৰ্মচাৰীৰ সকলৰ কৰ্ম পাৰদৰ্শিতাৰ ওপৰত ভিত্তি কৰি লোক কল্যাণ বঁটা প্ৰদান কৰিছে।
যোৰহাট জিলা উপায়ুক্ত কাৰ্যালয়ৰ কৰ্মচাৰী লাট মণ্ডল অৰুণজ্যোতি গগৈয়ে নিজৰ কৰ্মদক্ষতাত ৰাজ্যিক পৰ্য্যায়ত এই লোক কল্যাণ বঁটা লাভ কৰি সমগ্ৰ জিলাখনলৈ গৌৰৱ কঢ়িয়াই আনিছে।
বৰ্তমান গগৈ টীয়ক ৰাজহ চক্ৰ বিষয়া কাৰ্যালয়ত কৰ্মৰত। টীয়কৰ চিন্তামণি লাহন গাঁৱৰ নিবাসী অৰুণজ্যোতি গগৈয়ে ইয়াৰ পূৰ্বেও মিছন বসুন্ধৰা আঁচনিৰ সফল ৰূপায়ণৰ বাবে মুখ্যমন্ত্ৰীৰ শ্ৰেষ্ঠ লাট মণ্ডল বঁটাও লাভ কৰিবলৈ সক্ষম হৈছিল।
লগতে পঢ়ক: Commonwealth Games 2022: ছেমিত থমকিল ধিং এক্সপ্ৰেছ; ০.০১ ছেকেণ্ডৰ বাবে ফাইনেল নাপালে হিমাই
কালি যোৰহাট জিলা পুথিভঁৰালত অনুস্থিত এক গাম্ভীৰ্যপূৰ্ণ অনুষ্ঠানত অসম চৰকাৰৰ মন্ত্ৰী পিযুষ হাজৰিকাৰ উপস্থিতিত গগৈক এই বঁটা আনুষ্ঠানিক প্ৰদান কৰা হয়।
উল্লেখযোগ্য যে চাকৰিৰ সমান্তৰালকৈ সামাজিক দায়িত্ব সুচাৰুৰূপে পালন কৰি বহু দৰিদ্ৰ পৰিয়ালৰ মুখত হাঁহি বিৰিঙাবলৈ সক্ষম হোৱা অৰুণজ্যোতি গগৈৰ এই সফলতাত এতিয়া সকলো উৎফুল্লিত হৈ পৰিছে।
ইপিনে আজি পুৱাই গগৈৰ লাহন গাঁৱৰ গৃহত শিমলুগুৰি আঞ্চলিক ছাত্ৰ সন্থা, জাতীয়তাবাদী যুৱ ছাত্ৰ পৰিষদ টীয়ক আঞ্চলিক, ৰেঙনি এটি আশা, টীয়ক প্ৰেছ ক্লাৱকে ধৰি বিভিন্ন দল-সংগঠন তথা শুভাকাংক্ষী উপস্থিত হৈ তেওঁৰ এই সফলতাক অভিনন্দন জনাই সম্বৰ্দ্ধনা জ্ঞাপন কৰিছে।
আনহাতে, এই সফলতাৰ বাবে অৰুণজ্যোতি গগৈয়ে জিলা উপায়ুক্তকে প্ৰমুখ্য কৰি বিভিন্ন বিভাগৰ অতিৰিক্ত উপায়ুক্তসকল, টীয়ক ৰাজহ চক্ৰৰ চক্ৰ বিষয়া সৌভিক ভুঞাৰ লগতে তেওঁৰ সহ কৰ্মচাৰীসকলক ধন্যবাদ আৰু কৃতজ্ঞতা জ্ঞাপন কৰিছে।
লগতে পঢ়ক: অৱশেষত মুকলি আকাশৰ তললৈ আহিল বক্সাৰ মাইনা চুতীয়া ওৰফে প্ৰণীতা চুতীয়া
ৰজ্য চৰকাৰে এই লোক কল্যাণ বঁটাত নগদ ২৫০০০ টকা, এখনি মানপত্ৰ আৰু চাকৰিৰ ম্যাদ এবছৰ বৃদ্ধি কৰি কৰ্মচাৰীসকলক উৎসাহিত কৰিছে যি অনাগত দিনবোৰত কৰ্মচাৰীসকলক কৰ্মস্পৃহা অধিক শক্তিশালী কৰি তুলিব বুলি আশা কৰা হৈছে।
