বিজেপিয়ে চলিত বাজেট অধিৱেশনত নাগৰিকত্ব সংশোধনী বিধেয়কখন ৰাজ্যসভাত যাতে গৃহীত কৰাব নোৱাৰে তাৰ বাবে আজি অসম তথা উত্তৰ-পূবৰ দল-সংগঠন আৰু বুদ্ধিজীৱীয়ে দিল্লীত গৈ ৰাজনৈতিক তৎপৰতা চলায়।
ইতিমধ্যে যোৱা কেইবাদিন ধৰি নেছ’-আছু আৰু কৃষক মুক্তি সংগ্ৰাম সমিতি, অসম জাতীয়তাবাদী যুৱ-ছাত্ৰ পৰিষদকে ধৰি ৭০টা সংগঠনৰ নেতৃত্বই এই উদ্দেশ্যে নতুন দিল্লীত বাহৰ পাতি আছে।
আজি নেছ’-আছু আৰু ৭০টা সংগঠনৰ প্ৰতিনিধিৰ উপৰি ড০ হীৰেন গোহাঁইকে ধৰি কেইবাগৰাকীও বুদ্ধিজীৱীয়ে পৃথকে পৃথকে কংগ্ৰেছৰ সভাপতি ৰাহুল গান্ধীক সাক্ষাৎ কৰে। আটাইকেইটা সংগঠনে ৰাজ্যসভাত নাগৰিকত্ব সংশোধনী বিধেয়ক ২০১৬ বাতিল কৰোৱাৰ বাবে কংগ্ৰেছক বিধেয়কখনৰ বিৰুদ্ধে ভোট দিয়াৰ বাবে অনুৰোধ জনায়। ইয়াৰ উপৰি অন্যান্য বিৰোধী দলকো বিধেয়কখনৰ বিপক্ষে একত্ৰিত কৰাৰ বাবেও কংগ্ৰেছক ভূমিকা ল’বলৈ আহ্বান জনায়।
বিয়লি কংগ্ৰেছ সভাপতিগৰাকীক সাক্ষাৎ কৰে সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্য আৰু উত্তৰ-পূব ছাত্ৰ সংগঠনৰ অধ্যক্ষ ছেমুৱেল জেৰৱাৰ নেতৃত্বত যোৱা প্ৰতিনিধি দলটোৱে।
ৰাহুল গান্ধীক সাক্ষাৎ কৰি আহি সাংবাদিকৰ আগত সমুজ্জ্বল ভট্টাচা্ৰ্যই কয়, ‘‘বিধেয়কখন বিৰোধিতাৰ বাবে ৰাজ্যসভাত উপস্থিত থাকি বিধেয়কখনৰ বিপক্ষে ভোটদান কৰিবলৈ আমি কংগ্ৰেছক আহ্বান জনাইছো। তেওঁলোকে যেন বিধেয়কৰ বিৰধিতা কৰি সদন ত্যাগ নকৰে। কাৰণ বিৰোধীয়ে সদন ত্যাগ কৰিলে বিজেপিয়ে বিধেয়কখন গৃহীত কৰাব পাৰিব’’।
তৃণমূল কংগ্ৰেছৰ সাংসদকো নেছ’ৰ প্ৰতিনিধিয়ে আজি সাক্ষাৎ কৰা বুলি অধ্যক্ষ ছেমুৱেল জেৰৱাই জানিবলৈ দিয়ে। জনতা দল(য়ুনাইটেড)ৰ উপৰি কেইবাটাও এন ডি এৰ সহযোগী দলে বিধেয়কখনৰ বিৰোধিতা কৰাৰ আশ্বাস দিয়া বুলিও জেৰৱাই প্ৰকাশ কৰে।
ইপিনে বিশিষ্ট চিন্তাবিদ ড০ হীৰেন গোহাঁই, হাইদৰ হুছেইন, মনজিৎ মহন্ত প্ৰমুখ্যে কেইবাগৰাকীও বুদ্ধিজীৱীয়েও আজি কংগ্ৰেছ সভাপতি ৰাহুল গান্ধীক সাক্ষাৎ কৰি ৰাজ্যসভাত নাগৰিকত্ব সংশোধনী বিধেয়ক ২০১৬ৰ বিৰোধিতা কৰি গৃহীত হোৱাৰ পৰা ৰখাবলৈ আহ্বান জনায়।
কংগ্রেছ সভাপতিগৰাকীয়ে তেওঁলোকক বিধেয়কখনৰ বিৰোধিতা কৰাৰ বাবে ইতিমধ্যেই দলীয় সিদ্ধান্ত গ্ৰহণ কৰাৰ কথা জানিবলৈ দিয়ে।
একেদৰে, কৃষক মুক্তি সংগ্ৰাম সমিতি, অসম জাতীয়তাবাদী যুৱ-ছাত্ৰ পৰিষদকে ধৰি ৭০টা সংগঠনৰ প্ৰতিনিধিয়েও ৰাহুল গান্ধীক সাক্ষাৎ কৰে। কিন্তু নৰ্থ-ইষ্ট নাওৰ আগত ‘‘আশ্বস্ত হ’ব নোৱাৰিলো’’ বুলিহে কয় সংগঠন কেইটাৰ প্ৰতিনিধিয়ে।
‘‘আমি যি আশা কৰিছিলো সেই ধৰণৰ আশ্বাস ৰাহুল গান্ধীৰ পৰা আমি নাপালো। বিধেয়কখনৰ বিৰুদ্ধে এটা তাৎক্ষণিক ব্যৱস্থা গ্ৰহণ কৰিবলৈ তেওঁক আহ্বান জনাইছিলো। কিন্তু তেওঁ এই সন্দৰ্ভত দলৰ মজিয়াত আলোচনা কৰিহে আমাক জনাব বুলি ক’লে’’, সংবাদ মাধ্যমৰ আগত অখিল গগৈৰ মন্তব্য।
অৱশ্যে গান্ধীৰে ‘‘সাক্ষাৎ সৌহাৰ্দ্যপূৰ্ণ আছিল’’ বুলি অখিল গগৈকে ধৰি ৭০টা সংগঠনৰ প্ৰতিনিধিয়ে জানিবলৈ দিয়ে।
