উত্তৰাখণ্ডত সংঘটিত হৈছে এক ভয়ংকৰ পথ দুৰ্ঘটনা। যাত্ৰী কঢ়িওৱা এখন বাছ নিয়ন্ত্ৰণ হেৰুৱাই খাৱৈত বাগৰি পৰে। দুৰ্ঘটনাত বাছখন চূৰ্ণ-বিচূৰ্ণ হৈ পৰে। দুৰ্ঘটনাত কমেও ২২ জন লোকৰ মৃত্যু হোৱা বুলি জানিব পৰা গৈছে। আন বহুতো লোক আহত হৈছে. যুদ্ধকালীন অভিযানেৰে উদ্ধাৰৰ কাম আৰম্ভ হৈছে। কিছু লোকক উদ্ধাৰ কৰি চিকিৎসালয়লৈ লৈ যোৱা হৈছে।
বাতৰি অনুসৰি, নাইনিতাল জিলাৰ অন্তৰ্গত পৌৰি-আলমোৰা সীমান্তৰ সমীপৰ ৰামনগৰত সোমবাৰে পুৱা বাছখন খাৱৈত বাগৰি পৰে। বহু যাত্ৰীৰ মৃত্যু হ’ব পাৰে বুলি আশংকা কৰা হৈছে। প্ৰকাশ পোৱা ঘটনাস্থলীৰ ভিডিঅ’ ত দেখা গৈছে যে খৰস্ৰোতা নদীৰ পাৰত এখন বাছ ওলোটাকৈ পৰি আছে। বাছখনৰ বেছি অংশ ভাঙি গৈছে।
বাছখনৰ পৰা যাত্ৰীসকলক উদ্ধাৰ কৰিবলৈ স্থানীয় বহু লোকে ততাতৈয়াকৈ তাত উপস্থিত হয়। সেই অংশত নদীখনৰ গভীৰতা নথকাৰ বাবে বহু লোকে নদীখন পাৰ হৈ বাছখনৰ কাষ পাবলৈ চেষ্টা কৰিছে। উত্তৰাখণ্ডৰ ৰাজ্যিক দুৰ্যোগ সঁহাৰি বাহিনীয়ে উদ্ধাৰ কামত যোগদান কৰিছে। আৰক্ষীও সহযোগ কৰিছে।
লগতে পঢ়কঃ কিশোৰৰ পেটত ওলাল ঘড়ীৰ বেটাৰী, ব্লেডকে ধৰি ৫৬ টুকুৰা ধাতু, দেখি স্তম্ভিত চিকিৎসক
খবৰ অনুসৰি দুৰ্ঘটনাগ্ৰস্ত বাছখনত কমেও ৩৫জন লোক আছিল। মহকুমা আয়ুক্ত সঞ্জয় কুমাৰে জনোৱা মতে, ৫জন লোকক উদ্ধাৰ কৰি চিকিৎসালয়ত ভৰ্তি কৰোৱা হৈছে। বহুতো ভিতৰত আবদ্ধ হৈ থাকে। তেওঁলোকক উদ্ধাৰৰ চেষ্টা চলোৱা হয়। পুৱা প্ৰায় ৯ বজাত প্ৰশাসনক এই দুৰ্ঘটনাৰ খবৰ দিয়া হয়। বাছখনত থকা যাত্ৰীসকলৰ মাজৰে কোনোবাই খৱৰ দিয়ে। আৰক্ষী অহাৰ পূৰ্বে স্থানীয় ৰাইজে উদ্ধাৰৰ কাম আৰম্ভ কৰে।
উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে এই ঘটনাৰ পিছত উদ্বেগ প্ৰকাশ কৰে। তেওঁ কয় যে প্ৰশাসনিক বিষয়াসকলক সকলো প্ৰয়োজনীয় পদক্ষেপ গ্ৰহণ কৰিবলৈ নিৰ্দেশ দিয়া হৈছে।
#BreakingNews — उत्तराखंड के अल्मोड़ा में सड़क हादसा,खाई में गिरी बस .. #uttrakhand #almora pic.twitter.com/OLdBbLxK5p
— Rohit Chaudhary (@rohitch131298) November 4, 2024
মুখ্যমন্ত্ৰীয়ে কয়, ‘ৰামনগৰৰ সমীপত সংঘটিত বাছ দুৰ্ঘটনাৰ খবৰটো অতি দুখজনক আৰু দুৰ্ভাগ্যজনক। উদ্ধাৰ কামৰ বাবে জিলা প্ৰশাসনক প্ৰয়োজনীয় নিৰ্দেশনা দিয়া হৈছে। স্থানীয় প্ৰশাসন আৰু ৰাজ্যিক দুৰ্যোগ সঁহাৰি বাহিনীয়ে উদ্ধাৰ অভিযান চলাই আছে। আহতসকলক উদ্ধাৰ কৰি ওচৰৰ চিকিৎসালয়লৈ লৈ যোৱা হৈছে। গুৰুতৰভাৱে আহতসকলক প্ৰয়োজন সাপেক্ষে বিমানেৰে লৈ যোৱা হ’ব।‘
