এজন কিশোৰৰ পেটত ঘড়ীৰ বেটাৰী, ব্লেডকে ধৰি ৫৬টা ধাতু পোৱা গ’ল। দিল্লীৰ এখন চিকিৎসালয়ত অস্ত্ৰোপচাৰ কৰা হৈছিল উত্তৰ প্ৰদেশৰ হাথৰাছৰ এটি ১৫ বছৰীয়া কিশোৰৰ। অপাৰেচনৰ অন্তত চিকিৎসকে কিশোৰজনৰ পেটৰ পৰা ঘড়ীৰ বেটাৰী, ব্লেড, নখকে ধৰি ৫৬টা সামগ্ৰী উলিয়াই আনে। অৱশ্যে অস্ত্ৰোপচাৰৰ পিছত কিশোৰজনৰ মৃত্যু হয়।
হাথৰছত চিকিৎসা প্ৰতিনিধি (এম আৰ) হিচাপে কৰ্মৰত নিহত কিশোৰজনৰ পিতৃ সঞ্চিত শৰ্মাই কয় যে তেওঁৰ পুত্ৰ আদিত্য শৰ্মা (১৫) নৱম শ্ৰেণীত অধ্যয়ন কৰি আছিল। তেওঁৰ শৰীৰৰ ভিতৰত পোৱা এইবোৰ বস্তুৱে চিকিৎসকক হতবাক কৰি তুলিছে।
সঞ্চিত শৰ্মাই জনায় যে ছফদাৰজং হাস্পতালত অস্ত্ৰোপচাৰৰ এদিন পিছতে তেওঁৰ পুত্ৰৰ মৃত্যু হয়। তেওঁ কয়, ইয়াৰ কাৰণ হ’ল তেওঁৰ হৃদস্পন্দন বৃদ্ধি হোৱাৰ লগতে ৰক্তচাপ বিপদজনকভাৱে হ্ৰাস পাইছিল। তেওঁ লগতে কয়, উত্তৰ প্ৰদেশ, জয়পুৰ আৰু দিল্লীৰ বিভিন্ন চিকিৎসালয়ত চিকিৎসা পৰীক্ষাৰ সময়ত আদিত্যৰ পেটত এইবোৰ বস্তু ধৰা পৰিছিল। পুত্ৰৰ পেটৰ তীব্ৰ বিষ আৰু উশাহ-নিশাহ লোৱাত অসুবিধা হোৱাত তেওঁলোক চিন্তিত হৈ পৰে বুলিও কয় পিতৃয়ে।
লগতে পঢ়কঃ গুৱাহাটীত ৰহস্যজনক পৰিস্থিতিত উদ্ধাৰ কৰ্ণাটকৰ এজন লোকৰ মৃতদেহ
আদিত্যক প্ৰথমে হাথৰাছৰ এখন স্থানীয় চিকিৎসালয়লৈ লৈ যোৱা হয়, তাৰ পৰাই পিছত চিকিৎসকৰ পৰামৰ্শৰ ভিত্তিত জয়পুৰৰ এখন চিকিৎসালয়ত ভৰ্তি কৰা হয়। তাত চিকিৎসাৰ অন্তত ৰোগীক ঘৰলৈ যাবলৈ দিয়া হয়। যেতিয়া তাৰ লক্ষণবোৰ পুনৰ দেখা দিবলৈ আৰম্ভ কৰে তেতিয়া পৰিয়ালে তাক আলিগড়ৰ এখন চিকিৎসালয়লৈ লৈ যায়, য’ত তাৰ শ্বাস-প্ৰশ্বাসজনিত সমস্যা দূৰ কৰিবলৈ অস্ত্ৰোপচাৰ কৰা হয়।
কিশোৰৰ স্কেনত ৫৬টা ধাতুৰ টুকুৰা পোৱা গৈছিল। ২৬ অক্টোবৰত আলিগড় হাস্পতালত অস্ত্ৰোপচাৰৰ পিছত কৰা আল্ট্ৰাছাউণ্ডত আদিত্যৰ শৰীৰৰ ভিতৰত প্ৰায় ১৯টা বস্তুৰ উপস্থিতি ধৰা পৰে, তাৰ পিছত চিকিৎসকে তেওঁক নয়দাৰ উন্নত চিকিৎসা কেন্দ্ৰলৈ স্থানান্তৰিত কৰে।
নয়ডাতো চিকিৎসকে পুনৰ ছাত্ৰজনৰ দেহ স্কেন কৰে, য’ত প্ৰায় ৫৬টা ধাতুৰ টুকুৰা ধৰা পৰে। ইয়াৰ পিছতে পৰিয়ালে ল’ৰাজনক দিল্লীৰ ছফদৰজং হাস্পতাললৈ লৈ যায় আৰু ২৭ অক্টোবৰত তেওঁৰ অপাৰেচন কৰা হয়।
লগতে পঢ়কঃ প্ৰস্তুতি অবিহনেই নিউজিলেণ্ডৰ বিৰুদ্ধে ছিৰিজত নামিছিল ভাৰত? বিধ্বস্ত হোৱাৰ পিছতে প্ৰশ্ন শচীনৰ
মৃত কিশোৰজনৰ পিতৃয়ে কয়, “চিকিৎসকে যৎপৰোনাস্তি চেষ্টা কৰিলে, কিন্তু হয়তো ভাগ্যৰ বিড়ম্বনা আছিল। দিল্লীৰ এখন চিকিৎসালয়ত অস্ত্ৰোপচাৰৰ এদিন পিছতে মোৰ ল’ৰাটোৰ হৃদস্পন্দন বৃদ্ধি পায় আৰু ৰক্তচাপ বিপদজনকভাৱে হ্ৰাস পোৱাৰ বাবেই মৃত্যু হয়।
