গুৱাহাটী: Noney landslide মণিপুৰৰ নোনে জিলাৰ টুপুলত হোৱা ভয়াৱহ ভূমিস্খলনৰ ফলত প্ৰায় ৫০ জন লোক এতিয়াও সন্ধানহীন হৈ আছে। সন্ধানহীন হোৱা ৫০ জন লোকৰ ভিতৰত ২৩ জন টেৰিটৰিয়েল আৰ্মীৰ ২৩ তম পদাতিক বেটেলিয়নৰ। অসমৰ ১৭ জন শ্ৰমিকো এই ঘটনাত সন্ধাহীন হৈ আছে।
ইফালে, মণিপুৰৰ নোনে জিলাৰ টুপুলৰ ভূমিস্খলনপীড়িত অঞ্চলৰ পৰা উদ্ধাৰকাৰী কৰ্মীয়ে ৮ জন লোকৰ মৃতদেহ উদ্ধাৰ কৰিছে। নিহত আঠজনৰ ভিতৰত সাতজন টেৰিটৰিয়েল আৰ্মীৰ কৰ্মী বুলি জানিব পৰা গৈছে।
এই ভয়াৱহ ভূমিস্খলনৰ ঘটনাত অসমৰ মৰিগাঁও জিলাৰ লাহৰিঘাটৰ ১ জন শ্ৰমিক নিহত হোৱাৰ লগতে ৫ জন শ্ৰমিক গুৰুতৰভাৱে আহত হৈ চিকিৎসাধীন হৈ আছে। বাকী অসমৰ ১৭ জনকৈ শ্ৰমিক এতিয়াও সন্ধানহীন হৈ আছে।
ভূমিস্খলনৰ ফলত মৃত্যু হোৱা অসমৰ শ্ৰমিকজন গোপাল ফুকন (৩২) বুলি চিনাক্ত কৰা হৈছে। চিকিৎসাধীন অৱস্থাত গোপাল ফুকনৰ মৃত্যু ঘটে। গোপাল ফুকনৰ ঘৰ লাহৰিঘাটৰ খোৰাগচাইবাৰী গাঁৱত।
আনহাতে, সন্ধানহীন হৈ থকা আন ১৭ জন শ্ৰমিকৰ ভিতৰত আছে লাহৰিঘাট সমষ্টিৰ কোচকাটি গাঁৱৰ দীপংকৰ বৰদলৈ (২৭), হনুমান কোঁৱৰ (৪৭), চানল কোঁৱৰ (৩০), উৎপল ফুকন (৪০), মমিন ডেকা ৰাজা (৪০), খোৰাগচাই বাৰী গাঁৱৰ আকাশ এল, ৰাম (২১), পল্লৱ লোৰাম (২২), দেৱজিৎ ফুকন (২৩), বগ্যন্ত লোৰাম (৪০), ৰামু ফুকন (৩৫), কুশতালীৰ জুনতি বাৰাদ (২৭) আৰু লৌভুৰুঙ্গাৰ হৰমোহন ডেকা (৩০)।
তদুপৰি, বাকী সন্ধানহীন হৈ থক আন চাৰিজনৰ নাম এতিয়াও প্ৰকাশ পোৱা নাই। সেইদৰে আঘাতপ্ৰাপ্ত হৈ চিকিৎসাধীন হৈ থকা শ্ৰমিককেইজন হৈছে কুশতালীৰ প্ৰহ্লাদ বসুমতাৰী (১৯)মণিৰাম ফুকন (৩৫), ৰমন ফুকন (৩৩), মহেশ্বৰ ফুকন (৩২) আৰু আমগুৰিৰ জুন বসুমতাৰী (২৪)।
মণিপুৰত ৰে’ললাইন নিৰ্মাণৰ কামত নিয়োজিত লাহৰিঘাটৰ এই শ্ৰমিকসকল ২০ দিন পূৰ্বে ৰাজ্যখনত কাম কৰিবলৈ গৈছিল। বাতৰি প্ৰকাশ পোৱাৰ পিছতে শ্ৰমিকসকলৰ ঘৰত হাহাকাৰ অৱস্থাৰ সৃষ্টি হৈছে। শ্ৰমিকসকলৰ পৰিয়ালে সন্ধানহীন হৈ থকা শ্ৰমিকসকলক উদ্ধাৰৰ বাবে অসমৰ মুখ্যমন্ত্ৰীক অনুৰোধ জনাইছে।
উল্লেখ্য যে বুধবাৰে নিশা মণিপুৰৰ নোনে জিলাত এক ভয়াৱহ ভূমিস্খলনৰ ঘটনা ঘটে। কেইদিনমান ধৰি হোৱা নেৰানেপেৰা ধাৰাসাৰ বৰষুণৰ বাবে টুপুল ষ্টেচন য়াৰ্ডৰ কাষৰ পাহাৰটোৰ মাটি খহি পৰিছিল আৰু নিৰ্মাণাধীন ষ্টেচনৰ চৌহদলৈ নামি আহিছিল।
বৃহৎ ভূমিস্খলনৰ ফলত নিৰ্মাণাধীন টুপুল ষ্টেচন ভৱন, ট্ৰেক নিৰ্মাণ আৰু নিৰ্মাণ শ্ৰমিকৰ শিবিৰ বিধ্বস্ত হৈ পৰে।
জিৰিবামৰ পৰা ইম্ফললৈ নিৰ্মাণাধীন ৰে’লপথৰ সুৰক্ষাৰ বাবে মণিপুৰৰ নোনে জিলাৰ টুপুল ৰে’ল ষ্টেচনৰ ওচৰত নিয়োজিত ভাৰতীয় সেনাৰ ১০৭ টা টেৰিটৰিয়েল আৰ্মীৰ কোম্পানীৰ অৱস্থানতো ভূমিস্খলনে তীব্ৰ প্ৰভাৱ পেলায়।
ভূমিস্খলনৰ ফলত মণিপুৰৰ নোনে জিলাৰ মাখুয়াম গাঁৱত ইজেই নদী সম্পূৰ্ণৰূপে অৱৰুদ্ধ হৈ পৰে। নদীখন মণিপুৰৰ তামেংলং আৰু নোনি জিলাৰ মাজেৰে বৈ গৈছে।
এন এফ ৰে’লৱেই জানিবলৈ দি কয়, “ভূমিস্খলনৰ ধ্বংসাৱশেষৰ ফলত অৱৰুদ্ধ হোৱা ইজেই নদীত সৃষ্টি হোৱাৰ বান্ধসদৃশ স্তুপবোৰ ৰাজ্য চৰকাৰৰ অনুৰোধত ৰে’লৱেই ইয়াৰ উপলব্ধ যন্ত্ৰ-পাতি ব্যৱহাৰ কৰি মুকলি কৰে।”
