এবাতি দাইল, ভাত, ৰুটী, তৰকাৰী আৰু আচাৰ — দেশৰ ৰাজধানী দিল্লীত এতিয়াৰে পৰা দৰিদ্ৰ আৰু শ্ৰমজীৱী লোকসকলে মাত্ৰ ৫ টকাতে এই ভৰপেট আহাৰ লাভ কৰিব। দিল্লী চৰকাৰে সমগ্ৰ চহৰখনত ১০০ খন ‘অটল কেণ্টিন’ মুকলি কৰি এই সুলভ মূল্যৰ আহাৰৰ আঁচনিখন আৰম্ভ কৰিছে।
মন কৰিবলগীয়া যে, ২০২১ চনৰ পৰাই পশ্চিমবঙ্গত ‘মা কেণ্টিন’ৰ জৰিয়তে ৫ টকাত দুপৰীয়াৰ আহাৰ যোগান ধৰা হৈছে। কিন্তু দিল্লীৰ এই অটল কেণ্টিনত দুপৰীয়াৰ লগতে নিশাৰ আহাৰৰো ব্যৱস্থা কৰা হৈছে।
প্ৰাক্তন প্ৰধানমন্ত্ৰী অটল বিহাৰী বাজপেয়ীৰ ১০১ সংখ্যক জন্ম জয়ন্তী উপলক্ষে দিল্লীৰ মুখ্যমন্ত্ৰী ৰেখা গুপ্তাই এই প্ৰকল্পৰ আৰম্ভণী কৰে। তেওঁ কয়, “দৰিদ্ৰ আৰু শ্ৰমজীৱী লোকসকলক মৰ্যাদাৰে আহাৰ যোগান ধৰাই এই কেণ্টিনসমূহৰ লক্ষ্য। অটল কেণ্টিন দিল্লীৰ আত্মা হৈ পৰিব, যাতে কোনো লোকেই ভোকত শুবলগীয়া নহয়।”
ইতিমধ্যে দিল্লীৰ ৪৫ টা স্থানত অটল কেণ্টিনৰ দুৱাৰ মুকলি কৰা হৈছে। ইয়াৰ ভিতৰত আৰ.কে. পুৰম, জংপুৰা, শালিমাৰ বাগ, গ্ৰেটাৰ কৈলাশ, ৰাজৌৰী গাৰ্ডেন, নাৰেলা আৰু বাৱানাৰ দৰে অঞ্চল অন্তৰ্ভুক্ত। চৰকাৰী সূত্ৰই জনোৱা মতে, বাকী ৫৫ খন কেণ্টিন অহা কেইদিনমানৰ ভিতৰতে মুকলি কৰা হ’ব।
এই কেণ্টিনসমূহত দিনটোত দুবাৰকৈ আহাৰ বিতৰণ কৰা হ’ব – পুৱা ১১ বজাৰ পৰা বিয়লি ৪ বজালৈ আৰু সন্ধিয়া ৬:৩০ বজাৰ পৰা নিশা ৯:৩০ বজালৈ।
প্ৰতিদিনে প্ৰায় ৫০০ গৰাকী লোকে প্ৰতিখন কেণ্টিনৰ পৰা এই সেৱা লাভ কৰিব পাৰিব। ৫ টকীয়া থালিত থাকিব— দাইল, ভাত, ৰুটী, পাচলিৰ তৰকাৰী আৰু আচাৰ। চৰকাৰৰ দাবী অনুসৰি, কম মূল্য হ’লেও খাদ্যৰ পুষ্টিগুণৰ ক্ষেত্ৰত কোনো আপোচ কৰা হোৱা নাই।
খাদ্য বিতৰণ প্ৰক্ৰিয়াত স্বচ্ছতা বজাই ৰাখিবলৈ চৰকাৰে ডিজিটেল টোকেন ব্যৱস্থা প্ৰৱৰ্তন কৰিছে। ইয়াৰ উপৰিও, প্ৰতিখন কেণ্টিনত চিচিটিভি কেমেৰা স্থাপন কৰা হৈছে। দিল্লী আৰবান শ্বেল্টাৰ ইমপ্ৰুভমেণ্ট ব’ৰ্ডৰ ডিজিটেল প্লেটফৰ্মৰ জৰিয়তে সকলো কেণ্টিনৰ কাৰ্যকলাপ প্ৰত্যক্ষভাৱে নিৰীক্ষণ কৰা হ’ব।
