শ্ৰীলংকাৰ বিৰুদ্ধে দুখন মেচৰ টেষ্ট শৃংখলাৰ বাবে বাছনি সমিতিয়ে যশস্প্ৰিত বুমৰাহৰ বিকল্প বাছনি কৰিছে। ইয়াৰ পূৰ্বে ১৫ জনীয়া দলটোত ভাৰতীয় বলাৰগৰাকীয়ে সুযোগ পালেও ফিটনেছ টেষ্টত উত্তীৰ্ণ হ’ব লগা হৈছিল। অৱশেষত পৰীক্ষাত উত্তীৰ্ণ হ’লেও জনা গৈছে যে ভাৰতীয় তাৰকাগৰাকী বাওঁ ভৰিৰ সমস্যাৰ বাবে শ্ৰীলংকা ভ্ৰমণত থাকিব নোৱাৰিব। আৰু সেইবাবেই এইবাৰ বুমৰাহৰ বিকল্প বাছি লৈছে বিচিচিআইয়ে। জম্মু-কাশ্মীৰৰ বলাৰ আকিব নবীয়ে প্ৰথমবাৰৰ বাবে টিম ইণ্ডিয়াত স্থান লাভ কৰিছে।
ভাৰতীয় বাছনি সমিতিয়ে শ্ৰীলংকা শৃংখলাৰ বাবে দল ঘোষণা কৰাৰ পিছত বহুতে ভাবিছিল যে শেষত হয়তো বুমৰাহে খেলিব নোৱাৰিব। অৱশ্যে সংবাদ সংস্থা পিটিআইক দিয়া এক সাক্ষাৎকাৰত ভাৰতৰ ক্ৰিকেট নিয়ন্ত্ৰণ ব’ৰ্ডৰ এজন বিষয়াই বুমৰাহ ফিটনেছ টেষ্টত উত্তীৰ্ণ হোৱা বুলি কৈছিল। বিদেশত খেলিব যাব পাৰিব বুলি আশা কৰা হৈছিল। সেই খবৰৰ পিছতে দেওবাৰে ভাৰতীয় ক্ৰিকেট ব’ৰ্ডৰ এজন বিষয়াই কয় যে বাওঁ ভৰিৰ সমস্যাৰ বাবে বুমৰাহক শ্ৰীলংকাৰ শৃংখলাৰ পৰা বাদ দিয়া হৈছে।
সূত্ৰ অনুসৰি ভাৰতীয় ক্ৰিকেট নিয়ন্ত্ৰক সংস্থাই বৰ্তমান ভাৰতীয় ক্ৰিকেটাৰক লৈ ৰিস্ক ল’বলৈ অনিচ্ছুক। সেয়ে তেওঁলোকে তাৰকা পেচাৰগৰাকীক জিৰণি দিয়াৰ সিদ্ধান্ত লৈছে। তাৰ পৰিৱৰ্তে জম্মু-কাশ্মীৰৰ পেচাৰগৰাকী স্থান দিয়া হৈছে।
উল্লেখ্য যে আজিলৈকে আকিবে দেশৰ জাৰ্চিত খেলা নাই। যদিহে শ্ৰীলংকা ছিৰিজত তেওঁ সুযোগ পায়, তেন্তে সেয়া হ’ব তেওঁৰ অভিষেক ছিৰিজ। বহুতে প্ৰশ্ন কৰিছে যে এই খেলুৱৈজনক কিয় বাছনি কৰা হ’ল?
দৰাচলতে বিগত কিছুদিনত ঘৰুৱা ক্ৰিকেটত আকিব দুৰ্দান্ত ফৰ্মত আছে। এইগৰাকী খেলুৱৈয়ে যোৱা দুটা ৰঞ্জী ট্ৰফী ছিজনত ১০৪টা উইকেট দখল কৰিছে। ইয়াৰে অকল ২০২৫-২৬ ছিজনত আকিবে ৬০টা উইকেট দখল কৰিছে। তাৰ বাবেই জম্মু-কাশ্মীৰে প্ৰথমবাৰৰ বাবে ৰঞ্জী ট্ৰফী লাভ কৰিবলৈ সক্ষম হৈছে।
তদুপৰি আকিবে ইয়াৰ পূৰ্বে ইণ্ডিয়া এ দলৰ হৈ শ্ৰীলংকা ভ্ৰমণ কৰিছিল। তাতো তেওঁ ৬টা উইকেট দখল কৰে। বিগত কিছুদিনত বলিঙত দেখুওৱা দুৰ্দান্ত প্ৰদৰ্শনৰ বাবেই এইগৰাকী খেলুৱৈয়ে টিম ইণ্ডিয়াত স্থান লাভ কৰিছে।
