সমগ্ৰ ভাৰতবৰ্ষই পালন কৰি আছে স্বাধীনতাৰ অমৃত মহোৎসৱ। দেশৰ স্বাধীনতাই ৭৫ বছৰ অতিক্ৰম কৰা উপলক্ষ্যে দেশখনৰ ৰাজ্যসমূহৰ আন আন জিলাৰ লগতে বঙাইগাঁও জিলাতো ঝাকুৱাপাৰাত স্বাধীনতাৰ অমৃত মহোৎসৱৰ অংশ হিচাপে ‘উজ্জ্বল ভাৰত,উজ্জ্বল ভৱিষ্যৎ’ নামেৰে বিজুলী মহোৎসৱ পালন কৰা হয়। ঝাকুৱাপাৰাত অনুষ্ঠিত ‘উজ্জ্বল ভাৰত,উজ্জ্বল ভৱিষ্যৎ’ এই অনুষ্ঠানত বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰী, জিলা উপায়ুক্ত নৱদ্বীপ পাঠক, নীপকোৰ উপ-মহাপ্ৰবন্ধক সঞ্জীৱ কুমাৰ বৰুৱা , জিলা পৰিষদৰ প্ৰাক্তন সভানেত্ৰী লীনা সিংহ, বঙাইগাঁও গাঁও-পঞ্চায়তৰ সভাপতি তিলক নাৰায়ণ দেবকে ধৰি গণ্যমান্য ব্যক্তি আৰু স্থানীয় ৰাইজ তথা স্থানীয় বিদ্যুৎ বিভাগৰ হিতাধিকাৰীসকল উপস্থিত থাকে ৷
হিতাধিকাৰীসকলে বিদ্যুৎ লাভ কৰি কেনেদৰে উপকৃত হৈছে সেই বিষয়ে ব্যক্ত কৰে।ইপিনে সভাত মুখ্য অতিথি হিচাপে উপস্থিত থাকি বিধায়ক ফণীভূষণ চৌধুৰীয়ে পূৰ্ৱৰ বিজুলী বাতিৰ লুকাভাকুৰ বিষয়ে উল্লেখ কৰে আৰু ভাৰতৰ প্ৰধানমন্ত্ৰী নৰেন্দ্ৰ মোডী নেতৃত্বাধীন চৰকাৰৰ দিনত হোৱা ১০০ শতাংশ বৈদ্যুতিকৰণৰ বিষয়েও উল্লেখ কৰে।তেওঁ আৰু কয় যে আগতে গাঁৱৰ ভিতৰুৱা অঞ্চলৰ লোকে মোবাইল চাৰ্জ দিবলৈ চহৰলৈ আহিব লগা হৈছিল, কিন্তু আজি কালি বিদ্যুতৰ তেনেকুৱা নাটনি নাই,বিদ্যুৎ এতিয়া পৰ্যাপ্ত পৰিমাণে পোৱা যায়। আনহাতে উপায়ুক্ত নবদ্বীপ পাঠকে বিদ্যুৎ বিভাগৰ সফলতাৰ বিষয়ে উল্লেখ কৰাৰ লগতে কয় যে আজি কালি দেশখনে নিজৰ চাহিদা অনুসৰি বিদ্যুৎ ব্যৱহাৰ কৰাৰ উপৰি চুবুৰীয়া দেশলৈও ৰপ্তানিও কৰিব পাৰে।
তদুপৰি আজি সৌৰশক্তিৰ দৰে নবীকৰণ কৰিব পৰা শক্তিও ব্যৱহৃত হয়।আনকি মিটাৰৰ সমস্যা সোনকালে দূৰ কৰা, সময়মতে বিল আদায় দিব পৰা আদি সকলো ব্যৱস্থা আজি উপলব্ধ। সভাত এপিডিচিএল ৰ চি ই অ’ ৰাজীৱ কুমাৰ গগৈ আৰু এপিডিচিএল ৰ বঙাইগাঁও মণ্ডলৰ মহাপ্ৰবন্ধক বেদব্ৰত চৌধুৰী, সহকাৰী মহাপ্ৰবন্ধক বি কে পাল আদি কৰি বিষয়াসকলো উপস্থিত থাকে। বন্তি প্ৰজ্বলনেৰে শুভাৰম্ভ কৰা আজিৰ ‘উজ্জ্বল ভাৰত ,উজ্জ্বল ভৱিষ্যৎ’ অনুষ্ঠানৰ অংশ হিচাপে দেশত বিদ্যুৎ খণ্ডৰ সফলতাৰ বিষয়ে কেবাখনো চুটী ছৱি প্ৰদৰ্শন কৰা হয় ।ই
য়াৰ উপৰি স্থানীয় শিল্পীয়ে পৰিৱেশন কৰা বিদ্যুৎ সম্পৰ্কীয় দুখন বাটৰ নাটৰ জৰিয়তে বিদ্যুৎ চুৰি কৰাটো যে অপৰাধ আৰু বিদ্যুৎ ৰাহি কৰিবলৈ আমি যে এল ই ডি বাল্ব ব্যৱহাৰ কৰা প্ৰয়োজন তাকে দাঙি ধৰা হয়। অনুষ্ঠানত এটি কুশান নৃত্য পৰিৱেশিত হয় আৰু ইয়াৰ দ্বাৰা অঞ্চলটোৰ কলা-সংস্কৃতিৰ ঐতিহ্যক তুলি ধৰে।
