খাদ্য সুৰক্ষা আইন, ২০১৩ৰ অধীনত বিনামূলীয়া চাউল লাভ কৰিবৰ বাবে ৰেচন কাৰ্ড নথকা বিশ্বনাথৰ মুঠ ৩৬,৬৮৩টা পৰিয়ালে লাভ কৰিব পাঁচ কেজিকৈ বিনামূলীয়া চাউল।
জিলাখনৰ মুঠ ৭টা উন্নয়ন খণ্ডৰ অধীনত নিৰ্বাচিত কৰা এই পৰিয়ালসমূহক প্ৰদান কৰা সুবিধাই সামৰি লোৱা সৰ্বমুঠ জনসংখ্যা হ’ব ২,৭১,৪৫৪ জন।
জিলাখনৰ গ্ৰামাঞ্চলত উন্নয়ন খণ্ড আৰু পঞ্চায়তসমূহৰ জৰিয়তে আৰু নগৰ এলেকাতো একে প্ৰক্ৰিয়াৰে চাউল মোকলাই দিয়া হৈছে।
সুলভ মূল্যৰ সামগ্ৰীৰ দোকানসমূহৰ জৰিয়তে বিতৰণৰ ব্যৱস্থা কৰা এনে চাউল প্ৰদান প্ৰক্ৰিয়াত জিলাখনৰ বন গাওঁসমূহকো সামৰি লোৱা হৈছে বুলি জানিব পৰা গৈছে।
অৱশ্যে এই চাউল পঞ্চায়তৰ প্ৰতিনিধিসকলে লাভ কৰিব নোৱাৰিব।
আনহাতে শেহতীয়াকৈ হিতাধিকাৰীসকলে এক কেজিকৈ মচুৰ দাইলো লাভ কৰিছে।
বিশ্বনাথ জিলাত ৰাষ্ট্ৰীয় খাদ্য সুৰক্ষা আইনৰ অধীনত মুঠ ৫,০৪,৩৪৬ গৰাকী হিতাধিকাৰীয়ে ১,১৯,৩৫০খন কাৰ্ডৰ জৰিয়তে এনে সামগ্ৰী লাভ কৰি আহিছে।
সমষ্টিৰ বিধায়ক প্ৰমোদ বৰঠাকুৰে মঙলবাৰে গুপ্তকাশী বিশ্বনাথ ঘাটৰ পুৰণি গাওঁস্থিত সুলভ মূল্যৰ দোকানত উপস্থিত হৈ কাৰ্ড নথকা কেইবাগৰাকী হিতাধিকাৰীক বিতৰণ কৰে বিনামুলীয়া চাউল।
উল্লেখ্য যে, ইতিমধ্যে জিলাখনত ৰাষ্ট্ৰীয় খাদ্য সুৰক্ষা আইন, ২০১৩ৰ অধীনত কাৰ্ড থকা হিতাধিকাৰীসকলে বিনামূলীয়াকৈ অন্তোদয়া অন্ন যোজনা (AAY)ৰ অধীনত ৩৫ কেজি (প্ৰতি কাৰ্ডত), অগ্ৰাধিকাৰ (PRIORITY)ৰ জনমুৰি ৫ কেজিকৈ, প্ৰধানমন্ত্ৰী গৰীব কল্যাণ অন্ন যোজনাৰ অধীনত জনমুৰি ৫ কেজিকৈ (AAY আৰু PRIORITY কাৰ্ডৰ ক্ষেত্ৰত) চাউল আৰু প্ৰতি কাৰ্ডত ৮৫০ মি. লি. কৈ কেৰাচিন তেল (নিৰ্দ্ধাৰিত মূল্যত) লাভ কৰিছে।
