শুকুৰবাৰে বিজেপিয়ে অসম বিধানসভাৰ নিৰ্বাচনৰ বাবে ঘোষণা কৰা ৭০জনীয়া তালিকাত ৩২খন নতুন মুখে স্থান পাইছে।
বিজেপিত এইবাৰ নতুনকৈ প্ৰাৰ্থিত্ব লাভ কৰা ৩২গৰাকী প্ৰাৰ্থীৰ ভিতৰত আছে অলপতে কংগ্ৰেছ ত্যাগ কৰি বিজেপিত যোগদান কৰা প্ৰাক্তন গড়কপ্তানি মন্ত্ৰী অজন্তা নেওগো।
সেইদৰে বিজেপিৰ প্ৰাৰ্থিত্ব লাভ কৰিছে ২০১৬ত বিজেপি প্ৰাৰ্থী অমৰ চান্দ জৈনৰ হাতত পৰাজিত হোৱা প্ৰাক্তন কংগ্ৰেছী গৌতম ৰয়ে।
আনহাতে, বিপিএফৰ পৰা বিজেপিলৈ অহা ৰাজ্যসভাৰ সাংসদ বিশ্বজিৎ দৈমাৰীক পানেৰী সমষ্টিত প্ৰাৰ্থিত্ব প্ৰদান কৰা হৈছে।
কিন্তু বিজেপিয়ে এইবাৰ নতুন মুখ অন্তৰ্ভুক্ত কৰাৰ বাবে ১২ গৰাকী বিধায়কৰ প্ৰাৰ্থিত্ব কৰ্তন কৰিছে।
বিজেপিৰ প্ৰাৰ্থিত্বৰ পৰা বঞ্চিত বিধায়কসকলৰ মাজত আছে দিলীপ কুমাৰ পাল(শিলচৰ), অমৰ চান্দ জৈন(কাটিগড়া), জয়ৰাম ইংলেং(হাওৰাঘাট-এছ টি), চুম ৰংহাং(ডিফু-এছ টি), মানসিং ৰংপি(বৈঠালাংছু-এছ টি), নৱনীতা সন্দিকৈ(সোণাৰি), অশোক শৰ্মা(নলবাৰী), বীৰ বাহাদুৰ হাগজেৰ(হাফলং-এছ টি), কিশোৰ নাথ(বৰখলা), দেবানন্দ হাজৰিকা(বিহপুৰীয়া), ডিম্বেশ্বৰ দাস(ৰহা) আৰু ৰিতুপৰ্ণ বৰুৱা(লাহোৱাল)।
এই বিধায়কসকলৰ ভিতৰত মুখ্যমন্ত্ৰী সৰ্বানন্দ সোণোৱালৰ ঘনিষ্ঠ হিচাপে পৰিচিত ৰিতুপৰ্ণ বৰুৱাৰ স্থানত প্ৰাৰ্থিত্ব দিয়া হৈছে চাবুৱাৰ বিধায়ক বিনোদ হাজৰিকাক।
বিজেপিয়ে এইবাৰ চাবুৱা আৰু ৰহা সমষ্টি দুটা মিত্ৰ দল অগপক এৰি দিছে।
কিন্তু টিকট বঞ্চিত বিধায়কসকলৰ পৰা বিজেপি প্ৰত্যাহ্বানৰ সন্মুখীন হোৱাৰ সম্ভাৱনাই দেখা দিছে। কিয়নো বহুকেইগৰাকী বিধায়কক উপযুক্ত কাৰণ নোহোৱাকৈয়ে প্ৰাৰ্থিত্বৰ পৰা বঞ্চিত কৰাৰ অভিযোগ উঠিছে।
আনহাতে, বিজেপিৰ ৰাজ্যিক পৰ্যায়ৰ এগৰাকী প্ৰভাৱশালী নেতাই কংগ্ৰেছৰ পৰা অহা নেতাসকলক অগ্ৰাধিকাৰ দিয়াৰো অভিযোগ আছে। আনকি, সংঘ পৰিয়ালৰ নিৰ্বাচিত নেতাকো এইবাৰ প্ৰাৰ্থিত্বৰ ক্ষেত্ৰত গুৰুত্ব নিদিয়াটো স্পষ্ট হৈ পৰিছে।
সেয়ে, নিৰ্বাচনৰ দিন চমু চাপি অহাৰ লগে লগে দলীয়া বিসম্বাদে গা কৰি উঠাৰ সম্ভাৱনা প্ৰবল হৈ পৰিছে।
