অহা বছৰ পঞ্জাৱত বিধানসভা নিৰ্বাচন অনুষ্ঠিত হ’ব। কিন্তু তাৰ আগতেই ৰাজ্যখনত বিজেপিয়ে নিজৰ স্থিতি শক্তিশালী কৰিবলৈ আৰম্ভ কৰিছে আৰু শাসকীয় আম আদমি পাৰ্টিৰ বাবে এক নতুন প্ৰত্যাহ্বানৰ সৃষ্টি কৰিছে। এইবাৰ খোদ পঞ্জাৱৰ মুখ্যমন্ত্ৰী তথা আম আদমি পাৰ্টিৰ জ্যেষ্ঠ নেতা ভগৱন্ত মানৰ নিজৰ পৰিয়ালৰ সদস্যই পদম ফুলৰ দল অৰ্থাৎ বিজেপিত যোগদান কৰিছে। সোমবাৰে মুখ্যমন্ত্ৰীগৰাকীৰ আত্মীয় জ্ঞান সিং মানে পঞ্জাৱ বিজেপিৰ সভাপতি সুনীল জাখৰৰ পৰা আনুষ্ঠানিকভাৱে বিজেপিৰ পতাকা গ্ৰহণ কৰে। এই গুৰুত্বপূৰ্ণ যোগদান কাৰ্যসূচীত হাৰিয়ানাৰ মুখ্যমন্ত্ৰী নয়ব সিং ছাইনীও উপস্থিত আছিল। মুখ্যমন্ত্ৰীৰ নিজৰ মানুহেই বিৰোধী দলত যোগ দিয়া কাৰ্যই এতিয়া পঞ্জাৱৰ ৰাজনীতিত তীব্ৰ চাঞ্চল্যৰ সৃষ্টি কৰিছে।
এই যোগদানৰ পিছতে পঞ্জাৱ বিজেপিৰ সভাপতি সুনীল জাখৰে কয় যে পঞ্জাৱত বিজেপিয়ে নিজৰ শিপা অতি মজবুত কৰি তুলিছে আৰু নতুন সদস্যসকলে দলটোক আৰু অধিক শক্তিশালী কৰিব। জ্ঞান সিং মানৰ লগতে মুখ্যমন্ত্ৰীৰ আন এগৰাকী আত্মীয় বলজিন্দৰ সিঙেও বিজেপিত যোগদান কৰে। বিজেপিত যোগদান কৰি বলজিন্দৰে আম আদমি পাৰ্টিক কঠোৰ সমালোচনা কৰে। তেওঁ ক্ষোভ প্ৰকাশ কৰি কয় যে চৰকাৰে প্ৰবাসী ভাৰতীয়সকলক পঞ্জাৱত আহি ব্যৱসায় কৰিবলৈ আহ্বান জনায়, কিন্তু তেওঁলোকে ব্যৱসায় আৰম্ভ কৰিলে সেইবোৰ বন্ধ কৰি দিয়া হয়। কিছুদিন আগতে এই চৰকাৰখনেই তেওঁৰ ৰাস্তাৰ কাষৰ খাদ্যৰ দোকান বা ধাবাখনো বন্ধ কৰি দিছিল। পৰিয়ালৰ মানুহৰ এনে পদক্ষেপে মুখ্যমন্ত্ৰী ভগৱন্ত মানৰ বাবে এক ডাঙৰ আঘাত বুলি ধৰা হৈছে।
উল্লেখযোগ্য যে জ্ঞান সিং মান এসময়ত আম আদমি পাৰ্টিৰ এজন অতি গুৰুত্বপূৰ্ণ নেতা আছিল। যোৱা লোকসভা আৰু বিধানসভা নিৰ্বাচনত তেওঁ দলৰ নিৰ্বাচনী প্ৰচাৰৰ মুখ্য দায়িত্বত আছিল। কিন্তু পঞ্জাৱত আম আদমি পাৰ্টিয়ে ক্ষমতা লাভ কৰাৰ পিছৰে পৰা তেওঁ মুখ্যমন্ত্ৰী ভগৱন্ত মানৰ নীতি আৰু কাম-কাজক লৈ সন্তুষ্ট নাছিল। বিশেষকৈ পঞ্জাৱৰ বানপানী সমস্যা সমাধান কৰাত চৰকাৰ আৰু প্ৰশাসন সম্পূৰ্ণ ব্যৰ্থ হোৱা বুলি তেওঁ ছ’চিয়েল মিডিয়া আৰু ৰাজহুৱা মঞ্চত মুকলিকৈ সমালোচনা কৰিছিল। আনহাতে, এই অনুষ্ঠানত উপস্থিত থকা হাৰিয়ানাৰ মুখ্যমন্ত্ৰী নয়ব সিং ছাইনীয়েও আম আদমি পাৰ্টিক তীব্ৰ আক্ৰমণ কৰে। তেওঁ কয় যে অৰবিন্দ কেজৰিৱালে যাক সমৰ্থন কৰে, তেওঁলোকৰেই পতন হয়। কংগ্ৰেছ আৰু পশ্চিম বংগৰ তৃণমূল কংগ্ৰেছৰ কথা উল্লেখ কৰি তেওঁ দাবী কৰে যে একেদৰেই এতিয়া পঞ্জাৱৰ পৰাও আম আদমি পাৰ্টি নিঃশেষ হৈ যোৱাৰ সময় আহি পৰিছে।
