সাৱধান! ছীজাৰিয়ান প্ৰসৱক লৈ সজাগ হওক, দেশজুৰি জাৰি আছে কেন্দ্ৰৰ নিৰ্দেশ

ছীজাৰিয়ান প্ৰসৱ বিপদাপন্ন প্ৰসূতি আৰু গৰ্ভজাত শিশুৰ এক নিঃসন্দেহ প্ৰাণ ৰক্ষাকাৰী জৰুৰী বা পৰিকল্পিত হস্তক্ষেপমূলক শল্য চিকিৎসা পদক্ষেপ। কিন্তু স্বাভাৱিক প্ৰসৱেই হৈছে আদৰ্শ।

কিন্তু ভাৰতত, বিশেষকৈ ব্যক্তিগত চিকিৎসালয়সমূহত, ছী-চে’ক্সনে স্বাভাৱিক প্ৰসৱৰ ৰূপ ল’বলৈ আগবঢ়াত দেশজোৰা নিৰ্দেশ জাৰি কৰিব লগা হৈছে স্বাস্থ্য আৰু পৰিয়াল কল্যাণ মন্ত্ৰ্যালয়ে।

স্বাস্থ্য আৰু পৰিয়াল কল্যাণ মন্ত্ৰ্যালয়ৰ ৰাজ্য মন্ত্ৰী অশ্বিনী কুমাৰ দুবেই ৰাজ্য সভাত এই সন্দৰ্ভত মঙলবাৰে লিখিত উত্তৰ প্ৰদান কৰিছে।

মন্ত্ৰীজনে জনোৱা মতে, সমগ্ৰ দেশজুৰি ছী-চে’ক্সন সন্দৰ্ভত প্ৰসূতি আৰু স্ত্ৰী ৰোগ বিশেষজ্ঞ চিকিৎসকসকলক “সজাগ” কৰা আৰু “অপ্ৰয়োজনীয় ছীজাৰিয়ান প্ৰসৱ ৰোধ” কৰাৰ বাবে ২০১৫ চনতে মন্ত্ৰ্যালয়ে নিৰ্দেশনা জাৰি কৰিছে।

বৰ্তমানলৈকে দেশৰ অন্তিমটো স্বাস্থ্য জৰীপ ৰাষ্ট্ৰীয় পৰিয়াল স্বাস্থ্য জৰীপ-IV (২০১৫-১৬) অনুসৰি, ভাৰতৰ ব্যক্তিগত স্বাস্থ্য কেন্দ্ৰত মুঠ প্ৰসৱৰ ৪০.৯ শতাংশই ছীজাৰিয়ান। তাৰ বিপৰীতে ৰাজহুৱা স্বাস্থ্য কেন্দ্ৰত এই হাৰ কেৱল ১১.৯ শতাংশ।

অসমত ব্যক্তিগত চিকিৎসালয়ত এই হাৰ অধিক উদ্বেগজনক। বিপৰীতে ৰাজহুৱা স্বাস্থ্য কেন্দ্ৰসমূহে এই ক্ষেত্ৰত সন্তোষজনক উন্নতি দেখুৱাইছে।

২০০৫-০৬ চনত একে জৰীপত অসমৰ ব্যক্তিগত চিকিৎসালয়ত ছীজাৰিয়ান প্ৰসৱৰ হাৰ আছিল ২৬.৭ শতাংশ, কিন্তু এই হাৰ অন্তিমটো জৰীপত সম্পূৰ্ণ দুগুণ (৫৩.৩ শতাংশ)লৈ বৃদ্ধি পাইছে।

ব্যক্তিগত চিকিৎসালয়ৰ বিপৰীতে ৰাজহুৱা স্বাস্থ্য কেন্দ্ৰত ২০০৫-০৫ৰ ২১ শতাংশৰ পৰা ২০১৫-১৬ত ১২.৯ শতাংশলৈ ছীজাৰিয়ান প্ৰসৱৰ হাৰ হ্ৰাস পাইছে। গাওঁ অঞ্চলত এই হাৰ অধিক সন্তোষজনক, ১১.৪ শতাংশ।

অথচ, বিশ্ব স্বাস্থ্য সংস্থাৰ মতে, “জনসংখ্যাৰ স্তৰত, ১০ শতাংশতকৈ অধিক হাৰৰ ছীজাৰিয়ান চে’ক্সন প্ৰসূতি আৰু নৱজাতকজনিত মৃত্যুৰ হাৰ হ্ৰাসৰ সৈতে সম্পৰ্কিত নহয়”।

সেয়ে, দেশৰ প্ৰসূতি আৰু স্ত্ৰীৰোগ বিশেষজ্ঞসকলৰ সংস্থা এফ অ’ জি এছ আই (Federation of Obstetrical and Gynaecologists in India)ক তেওঁলোকৰ অন্তৰ্ভুক্ত সকলো চিকিৎসকৰে মাজতে বিশ্ব স্বাস্থ্য সংস্থাৰ বিবৃতি বিতৰণৰ বাবে মন্ত্ৰ্যালয়ে পত্ৰ প্ৰেৰণ কৰিছে, মন্ত্ৰীজনে জনায়।

ৰাজহুৱা স্বাস্থ্য কেন্দ্ৰত কৰ্মৰত সংশ্লিষ্ট চিকিৎসকৰ মাজতো বিশ্ব স্বাস্থ্য সংস্থাৰ বিবৃতি বিতৰণৰ বাবে অসমকে ধৰি সকলো ৰাজ্য আৰু কেন্দ্ৰীয় শাসিত পৰিষদৰ প্ৰধান সচিব আৰু মিছন সঞ্চালকক মন্ত্ৰ্যালয়ে নিৰ্দেশ (OM M.12015/182/2015-MCH) দিছিল।

লগতে, কেন্দ্ৰীয় চৰকাৰৰ স্বাস্থ্য আঁচনি (CGHS)ৰ অন্তৰ্ভুক্ত সকলো চিকিৎসালয়তে স্বাভাৱিক আৰু ছীজাৰিয়ান প্ৰসৱৰ অনুপাতৰ তথ্য প্ৰদৰ্শন কৰিবলৈয়ো মন্ত্ৰ্যালয়ে নিৰ্দেশ (OM Z15025/2017) দি থৈছে।

বৰ্ধিত ছীজাৰিয়ান প্ৰসৱত উদ্বিগ্নতা প্ৰকাশ কৰি এই সন্দৰ্ভত “জৱাবদায়ী আৰু স্বচ্ছ” এক ব্যৱস্থা কৰাৰ বাবে কেন্দ্ৰ চৰকাৰৰ হস্তক্ষেপ বিচাৰি ২০১৭ চনত ১.৩ লাখতকৈয়ো অধিক স্বাক্ষৰকাৰীয়ে এক অনলাইন আবেদন কৰিছিল।

“ছীজাৰিয়ান প্ৰসৱ এটা ব্যৱসায়ত পৰিণত হৈছে,” আবেদনখনৰ উদ্যোক্তা মুম্বাইৰ সুবৰ্ণা ঘোষে নিজৰ উদাহৰণ দাঙি ধৰি কৰা মন্তব্যৰ উদ্ধৃতি।

কিন্তু ছী-চেক্সনৰ বৰ্ধিত হাৰত উদ্বিগ্নতা প্ৰকাশ কৰিও নাম প্ৰকাশ কৰিব নোখোজা গুৱাহাটীৰ এগৰাকী প্ৰসূতি আৰু স্ত্ৰী ৰোগ বিশেষজ্ঞই কয় যে ইয়াত আন দিশো আছে।

“বহু সময়ত প্ৰসূতি বা তেওঁৰ পৰিয়ালে নিজেই ছীজাৰিয়ান প্ৰসৱক অগ্ৰাধিকাৰ দিয়ে। আকৌ চিকিৎসকৰ নিৰাপত্তাৰ কথাও আছে,” তেওঁ কয়।

বহুলোক বিশেষকৈ আধুনিক শিক্ষিত লোকৰ মাজত ছীজাৰিয়ান প্ৰসৱ আধুনিক, বৈজ্ঞানিক, মাতৃ আৰু শিশুৰ ভৱিষ্যতৰ কাৰণে মংগলদায়ক (যেনে– মাকৰ পেলভিক ফ্লৰৰ কাৰণে ভাল বা শিশুৱে কষ্ট কম পায় ইত্যাদি) আৰু নিৰাপদ বুলি এক ধাৰণা আছে।

উল্লেখিত অনলাইন আবেদনকাৰী ঘোষে আনকি মন্তব্য কৰিছিল যে খোদ চিকিৎসকেই তেওঁক ছীজাৰিয়ান প্ৰসৱ বেছি ভাল আৰু অধিক বিজ্ঞানসন্মত বুলি পতিয়ন নিয়াইছিল।

প্ৰসূতিজনিত জটিলতাৰ ক্ষেত্ৰত প্ৰাণৰক্ষাকাৰী যদিও ছীজাৰিয়ান প্ৰসৱত সংক্ৰমণজনিত জটিলতা, শিশু আৰু মাতৃৰ ক্ষেত্ৰত দীৰ্ঘকালত প্ৰভাৱ পেলাব পৰা আন বহু উদ্বেগজনক দিশ থকা বুলিহে চিকিৎসা বিজ্ঞানীসকলে মত পোষণ কৰে।

পৃথিৱীৰ দুই বৃ্হৎ অৰ্থনীতি— “পুঁজিবাদী” এমেৰিকা আৰু কমিউনিষ্ট পাৰ্টিৰ একনায়কত্বৰ অধীন চীন জন গণতন্ত্ৰত এই হাৰ অতি উদ্বেগজনক, ক্ৰমে ৩২.২ আৰু ৪৭ শতাংশ।

চিকিৎসাৰ সুবিধাই উপলব্ধ নোহোৱা এফ্ৰিকাৰ বহু অনুন্নত দেশত আনুষ্ঠানিক ছীজাৰিয়ানৰ হাৰ স্বাভাৱিকতে কম। কিন্তু সেয়া চিকিৎসা “ব্যৱস্থা”ৰেই অনুপস্থিতিৰ হিচাপ।

অত্যাধুনিক সু-সংহত চিকিৎসা ব্যৱস্থা থকা কিন্তু ছী-চেক্সন প্ৰসৱৰ হাৰ কম দেশ কিছুমান হ’ল– নিউ জিলেন্দ, বৃটন, কেনাদা, নৰৱে’, ফিনলেন্দ আৰু আইচলেন্দ।

শেষৰ দেশ তিনিখনে বিশ্ব স্বাস্থ্য সংস্থাৰ আদৰ্শ ছীজাৰিয়ান প্ৰসৱ হাৰ (১০-১৫ শতাংশ)ও ধৰি ৰাখিছে।

এইসমূহ দেশত বিভিন্ন পৰ্য্যায়ত স্বাস্থ্যৰ ৰাজহুৱা যতন (social care)ৰ নিশ্চিতি আছে, আয়ৰ অসমতা কম। তাত সামাজিক ন্যায় হৈছে সৰ্বাধিক গুৰুত্বপূৰ্ণ বিষয়।