চোৰাং সোণৰ সৰবৰাহকাৰীৰ বিৰুদ্ধে অভিযান চলাবলৈ গৈ ডকাইতৰ ৰূপ লোৱা তথা যোৱা ৫ ফেব্ৰুৱাৰিৰ পৰা আত্মগোপন কৰি থকা দিচপুৰ থানাৰ উপ-পৰিদৰ্শক নিপু কলিতাই তেওঁ ব্যৱহাৰ কৰা গাড়ীখন উদ্ধাৰ কৰিছে দিচপুৰ আৰক্ষীয়ে। বাক্সাৰ মুচলপুৰত আজি উদ্ধাৰ হয় গাড়ীখন।
ইপিনে দিচপুৰ আৰক্ষীয়ে সোণ সৰবৰাহৰ ঘটনাটোত জড়িত থকা তিনিজন ক্ৰমে ৱাহিদুৰ ৰহমান, ৱাহাজুদ্দিন ৰহমান আৰু আজমীৰ হুছেইনকো গ্ৰেপ্তাৰ কৰিছে।
উল্লেখযোগ্য যে যোৱা ১৫ জানুৱাৰিত নংপোৰ গুৱাহাটী-চিলং পথত সোণ সৰবৰাহকাৰীৰ বিৰুদ্ধে অভিযান চলাই ৬০খন সোণৰ বিস্কুট জব্দ কৰিছিল উপ পৰিদৰ্শক নিপু কলিতাই। তেওঁৰ লগত আছিল হাবিলদাৰ ফাইজুৰ ৰহমান আৰু গৃহৰক্ষী জোৱান আফজল আলী। জব্দ কৰা সোণৰ বিস্কুটৰ মূল্য হ’ব প্ৰায় ৪ কোটি টকা।
অভিযানটোৰ নেতৃত্ব দিয়া উপ-পৰিদৰ্শক কলিতাই সোণখিনি সৰবৰাহৰ লগত জড়িত থকা কোনো লোকক আটক কৰা নাছিল। ইয়াৰ সলনি ৰক্ষকেই ভক্ষক হৈ তিনিওজনে কোটি টকাৰ মূল্যৰ সোণখিনিকে হৰলুকি কৰিছিল।
সফল অভিযানটোৰ কিছু দিনৰ পিছত জব্দ কৰা সোণখিনি লৈ ৫ ফেব্ৰুৱাৰিত উধাও হৈছিল উপ-পৰিদৰ্শক নিপু কলিতা। লগতে অন্তৰ্ধান হয় হাবিলদাৰ ফাইজুৰ ৰহমান আৰু গৃহৰক্ষী জোৱান আফজল আলী।
জানিব পৰামতে সোণখিনি সৰবৰাহকাৰীসকলৰ এজন ৱাহাজুদ্দিন ৰহমানে দিচপুৰ থানাত তিনিওজনৰ বিৰুদ্ধে তেওঁলোকৰ পৰা সোণখিনি আত্মসাৎ কৰা বুলি এখন এজাহাৰ দিয়াৰ পিছতে অন্তৰ্ধান হয় তিনিওজন।
দিচপুৰ থানাই উক্ত এজাহাৰৰ ভিত্তিত গোচৰ ৰুজু কৰি তিনিওজনৰ বিৰুদ্ধে অভিযান অব্যাহত ৰাখিছে।
ইপিনে, মহানগৰ আৰক্ষী আয়ুক্ত দীপক কুমাৰে ১২ ফেব্ৰুৱাৰিত এটা নিৰ্দেশনাযোগে অকৰ্তৃত্বশীলভাৱে কৰ্তব্যত উপস্থিত নথকা বাবে উপ-পৰিদৰ্শক নিপু কলিতাৰ লগতে হাবিলদাৰ ফাইজুৰ ৰহমানক নিলম্বন কৰে। লগতে গৃহৰক্ষী জোৱান আফজল আলীকো কৰ্তব্যৰ পৰা অব্যাহতি দিয়ে। যুটীয়া আৰক্ষী আয়ুক্তক ঘটনাটোৰ তদন্তৰ দায়িত্ব অৰ্পণ কৰিছে বুলি জনায় আৰক্ষী আয়ুক্তজনে।