অভূতপূৰ্ব পদক্ষেপ গ্ৰহণ কৰি কেন্দ্ৰই শুকুৰবাৰে সীমান্ত সুৰক্ষা বাহিনীৰ (বিএছএফ) সঞ্চালক প্ৰধান নীতিন আগৰৱাল আৰু তেওঁৰ বিশেষ উপ-সঞ্চালক প্ৰধান (পশ্চিম) ৱাই বি খুৰানিয়াক অপসাৰণ কৰে। চৰকাৰী নিৰ্দেশ অনুসৰি তেওঁলোকক পুনৰ ৰাজ্য কেডাৰলৈ প্ৰেৰণ কৰা হৈছে। চৰকাৰী নিৰ্দেশ তৎক্ষণাত কাৰ্যকৰী হ’ব বুলি কোৱা হৈছে।
নীতিন আগৰৱাল ১৯৮৯ বেটচৰ কেৰেলা কেডাৰৰ আছিল। ৱাই বি খুৰানিয়া ১৯৯০ বেটচৰ ওড়িশা কেডাৰৰ অন্তৰ্গত আছিল।
যোৱা বছৰৰ জুন মাহত বি এছ এফৰ মুৰব্বী হিচাপে কাৰ্যভাৰ গ্ৰহণ কৰিছিল নীতিন আগৰৱালে। খুৰানিয়া, বিশেষ ডিজি (পশ্চিম) হিচাপে পাকিস্তান সীমান্তত বাহিনী গঠনৰ নেতৃত্ব দিছিল।
কেবিনেটৰ নিযুক্তি সমিতিয়ে জাৰি কৰা এক সুকীয়া আদেশত কোৱা হৈছে যে তেওঁলোকক “তাৎক্ষণিকভাৱে কাৰ্যকৰী” হোৱাকৈ অপসাৰণ কৰা হৈছে।
লগতে পঢ়কঃ বিতৰ্কৰ পিছত এন টি এয়ে ঘোষণা কৰিলে UGC NET পৰীক্ষাৰ নতুন তাৰিখ
কিয় এই সিদ্ধান্ত? সূত্ৰ অনুসৰি বি এছ এফৰ এই দুগৰাকী শীৰ্ষ বিষয়াক অপসাৰণ কৰাৰ আঁৰৰ মূল কাৰণ হৈছে আন্তঃৰাষ্ট্ৰীয় সীমান্তত অবাধ অনুপ্ৰৱেশ। বি এছ এফৰ মুৰব্বীগৰাকীৰ বিৰুদ্ধে সমন্বয়ৰ অভাৱকে ধৰি গুৰুতৰ অভিযোগ উত্থাপন হৈছে বুলি সূত্ৰই জানিবলৈ দিয়ে।
প্ৰায় ২.৬৫ লাখ জোৱান থকা বি এছ এফে পশ্চিমে পাকিস্তান আৰু পূবে বাংলাদেশৰ সীমান্ত পহৰা দিয়ে।
শেহতীয়াকৈ উপত্যকাটোত উগ্ৰপন্থী কাৰ্যকলাপ বৃদ্ধি পোৱাৰ লগতে যোৱা সপ্তাহত ৰাজৌৰীৰ এটা সেনা শিবিৰত আক্ৰমণ কৰাকে ধৰি উগ্ৰপন্থীৰ কাৰ্যকলাপ বৃদ্ধি পাইছে। ফলত জম্মু-কাশ্মীৰৰ নিৰাপত্তা কেন্দ্ৰই নতুনকৈ পৰ্যালোচনা কৰিছে। তাৰ মাজতে চৰকাৰৰ এই পদক্ষেপ অতি তাৎপৰ্যপূৰ্ণ।
লগতে পঢ়কঃ বিশ্বকাপৰ ছন্দ হেৰাল! ব্যৰ্থ কোহলী, শ্ৰীলংকাৰ বিৰুদ্ধে ভাৰতৰ প্ৰথমখন এদিনীয়া মেচ হ’ল টাই
বিগত দুমাহত বিশেষকৈ পীৰ পাঞ্জালৰ দক্ষিণ অংশত আক্ৰমণ আৰু এম্বুছ নিয়মীয়াকৈ সংঘটিত হৈ পৰিছে—য’ত দীৰ্ঘদিন ধৰি সন্ত্ৰাসবাদীৰ ভাবুকি কম আছিল। শেহতীয়াকৈ তাৰ মাজতে নিৰাপত্তাৰক্ষীয়ে অভিযান চলাইছিল। এই আক্ৰমণত দুজন সেনা বিষয়া নিহত হোৱাৰ লগতে এজন লস্কৰ-ই-তৈবা স্নাইপাৰ আৰু এজন বিস্ফোৰক বিশেষজ্ঞকে ধৰি দুজন পাকিস্তানী উগ্ৰপন্থী নিহত হয়।
