যদিও ১৮ জুনত সমগ্ৰ দেশতে UGC NET পৰীক্ষা অনুষ্ঠিত হৈছিল, কিন্তু পৰীক্ষাৰ এদিন পিছতে প্ৰশ্নকাকত ফাদিল হোৱাৰ বাবে পৰীক্ষা বাতিল কৰা হৈছিল। সেই ঘটনাৰ প্ৰায় ২ মাহৰ পিছত পুনৰ এই পৰীক্ষাৰ তাৰিখ ঘোষণা কৰিলে ৰাষ্ট্ৰীয় পৰীক্ষণ সংস্থা (এনটিএ)ই। এই পৰীক্ষা ২১ আগষ্টৰ পৰা আৰম্ভ হ’ব।
শুকুৰবাৰে এনটিএই প্ৰকাশ কৰিছে ইউজিচি নেট পৰীক্ষাৰ বিশদ সময়সূচী। য’ত কোৱা হৈছে যে ২১ আগষ্টৰ পৰা ৪ ছেপ্টেম্বৰলৈকে সমগ্ৰ দেশতে ইউজিচি নেটৰ আয়োজন কৰা হ’ব। এই পৰীক্ষা কম্পিউটাৰ বা চিবিটিৰ জৰিয়তে অনুষ্ঠিত হ’ব।
লগতে পঢ়কঃ বিশ্বকাপৰ ছন্দ হেৰাল! ব্যৰ্থ কোহলী, শ্ৰীলংকাৰ বিৰুদ্ধে ভাৰতৰ প্ৰথমখন এদিনীয়া মেচ হ’ল টাই
জানিব পৰা মতে, মুঠ ৮৩টা বিষয়ৰ পৰীক্ষা অনুষ্ঠিত হ’ব। পুৱা ৯ বজাৰ পৰা নিশা ১২ বজালৈ আৰু বিয়লি ৩ বজাৰ পৰা সন্ধিয়া ৬ বজালৈ দুটা অৰ্ধত (হাফ) পৰীক্ষা অনুষ্ঠিত হ’ব। পৰীক্ষাৰ বাবে পৰীক্ষাৰ চিটি স্লিপ নিৰ্দিষ্ট ৱেবছাইটৰ পৰা ১০ দিন আগতে সংগ্ৰহ কৰিব পাৰিব।
উল্লেখ্য যে দেশৰ মহাবিদ্যালয় আৰু বিশ্ববিদ্যালয়ত সহকাৰী অধ্যাপক, জুনিয়ৰ ৰিচাৰ্ছ ফেল’শ্বিপ আৰু পি.এইচ.ডি.ত নামভৰ্তিৰ যোগ্যতা নিৰ্ণায়ক এই পৰীক্ষা চলিত বৰ্ষৰ ১৮ জুনত অনুষ্ঠিত হৈছিল। অৱশ্যে পৰীক্ষাৰ পূৰ্বে সময়ে সময়ে টেলিগ্ৰামত প্ৰশ্নকাকতৰ স্ক্ৰীণশ্বট পোষ্ট কৰা হৈছিল। একাধিক লিংকো পোষ্ট কৰা হয়। এই খবৰ যেতিয়া শিক্ষা মন্ত্ৰালয়লৈ আহিল, তেতিয়া প্ৰশ্নকাকতখন ঠিক একেই হোৱা দেখা গ’ল। ইয়াৰ পিছতে শিক্ষা মন্ত্ৰালয়ে ক্ষিপ্ৰ পদক্ষেপ গ্ৰহণ কৰে। যদিও পৰীক্ষা সম্পূৰ্ণ হৈছিল, পিছদিনা পৰীক্ষা বাতিল কৰা হৈছিল।
লগতে পঢ়কঃ মৰিয়াই মৰিয়াই মাটিত পুতি থোৱা যুৱকৰ প্ৰাণ বচালে পথৰ ভতুৱা কুকুৰে : কিন্তু কেনেকৈ?
সংবাদ মাধ্যমৰ সূত্ৰ অনুসৰি দুস্কৃতিকাৰীয়ে সেই প্ৰশ্নকাকত ৫ হাজাৰৰ পৰা ১০ হাজাৰ টকাত বিক্ৰী কৰিছিল। প্ৰাথমিক তদন্তত প্ৰকাশ পাইছে যে টেলিগ্ৰামেই প্ৰশ্ন ফাদিলৰ অভিকেন্দ্ৰ আছিল। অৱশ্যে টেলিগ্ৰাম গ্ৰুপৰ এডমিনসকলৰ হাতত ক’ৰ পৰা আহিল সেয়া এতিয়াও জানিব পৰা হোৱা নাই।
