চিপিআইৰ ৰাজ্যিক পৰিষদৰ সদস্য, কমিউনিষ্ট তথা শ্ৰমিক নেতা মুহি বৰুৱাৰ আজি পুৱা ৬.২০ বজাত ডিব্ৰুগড়ৰ সঞ্জীৱনূ হাস্পতালত মৃত্যু হয়। মৃত্যুৰ সময়ত তেখেতৰ বয়স আছিল ৭৪ বছৰ।
শিৱসাগৰৰ বেতবাৰী কোৱামৰাত জন্ম গ্ৰহণ কৰা মুহি বৰুৱা অৱসৰপ্ৰাপ্ত অ’এনজিচিৰ কৰ্মচাৰী আছিল।
ইয়াৰোপৰি তেওঁ অ’এনজিচি ৱৰ্কাৰ এচ’চিয়েচনৰ প্ৰাক্তন সম্পাদক, এআইটিইউচিৰ ৰাজ্যিক উপ সভাপতি আৰু জিলা সম্পাদক, নিৰ্মাণ শ্ৰমিক ইউনিয়নৰ বৰ্তমানৰ সভাপতি হিচাপে কাৰ্যনিৰ্বাহ কৰিছিল।
প্ৰয়াত মুহি বৰুৱাৰ নশ্বৰ দেহ আবেলি শিৱসাগৰৰ চিপিআইৰ জিলা কাৰ্যালয়লৈ অনা হয় আৰু ইয়াতে তেওঁক ৰাজহুৱাভাৱে শ্ৰদ্ধাঞ্জলি জনোৱা হয়।
চিপিআইৰ জিলা পৰিষদৰ হৈ কনক গগৈ, ধৰ্ম বৰুৱা, এআইটিচিৰ হৈ প্ৰণৱ চেতিয়া, মদন বৰুৱা, নৰেন বৰুৱা, নিৰ্মাণ শ্ৰমিক ইউনিয়নৰ হৈ সত্যেন্দ্ৰ গগৈ, ৰিকু বৰগোঁহাইয়ে শ্ৰদ্ধাঞ্জলি জনায়।
আনহাতে অ’এনজিচি ৱৰ্কাচ এচ’চিয়েচন, চিপিআই যোৰহাট পৰিষদ, চিপিআই নাজিৰা মহকুমা পৰিষদ, নিখিল ভাৰত কৃষক সভা জিলা পৰিষদ, আইএনটিইউচি, এআইৱাইএফ, ৰংপুৰ পিৰাচীন কৃৰ্তিচিহ্ন সমিতি, অসম মহিলা সংঘ, অ’এনজিচি ঠিকা শ্ৰমিক সন্থা, উজনি অসম মুছলিম কল্যাণ পৰিষদকে ধৰি বিভিন্ন দল সংগঠন তথা ব্যক্তি বিশেষে বামপন্থী নেতাজনক শেষ শ্ৰদ্ধাঞ্জলী জনায়।