Congress President election নতুন সভাপতি নিৰ্বাচিত কৰাৰ সময়সীমা ২১ ছেপ্টেম্বৰৰ ভিতৰত নিৰ্ধাৰণ কৰা হৈছিল যদিও শেষত সেইটো বাস্তৱায়িত নহ’ল। অৱশেষত কংগ্ৰেছে ঘোষণা কৰিছে যে কংগ্ৰেছৰ সভাপতি নিৰ্বাচন অহা ১৭ অক্টোবৰত অনুষ্ঠিত হ’ব।
ঘোষণা অনুসৰি, ১৯ নৱেম্বৰত ভোটগণনা অনুষ্ঠিত হ’ব আৰু সেইদিনাই শতিকা পুৰণি দলটোৱে নতুন সভাপতি বাছনি কৰিব।
দেওবাৰে দলটোৰ শীৰ্ষ নেতৃত্বৰ এখন বৈঠক অনুষ্ঠিত হয়। সেই বৈঠকত নিৰ্বাচনৰ বাবে এটা নতুন তাৰিখ নিৰ্ধাৰণ কৰা হয়। খবৰ অনুসৰি প্ৰক্ৰিয়াটো দেৱালীৰ পূৰ্বে অৰ্থাৎ ২৪ অক্টোবৰৰ ভিতৰত সম্পূৰ্ণ কৰাৰ পৰিকল্পনা কৰা হৈছিল। শেষত তাকেই কৰা হ’ল। মনোনয়ন পত্ৰ দাখিল ২৪ ছেপ্টেম্বৰত আৰম্ভ হ’ব। মনোনয়নৰ অন্তিম তাৰিখ হৈছে ৩০ ছেপ্টেম্বৰ।
কংগ্ৰেছে পূৰ্বে কৈছিল যে উৎসৱৰ বতৰ শেষ হোৱাৰ পিছতে শতিকা পুৰণি দলটোৱে নতুন সভাপতি বাছনি কৰিব। একাংশ সংবাদ মাধ্যমে দাবী কৰিছিল যে ৰাহুল গান্ধীক সৈমান কৰাৰ চেষ্টা চলোৱা হৈছে।
২০১৯ ৰ লোকসভা নিৰ্বাচনৰ পিছত ৰাহুল গান্ধীয়ে কংগ্ৰেছৰ সভাপতি পদ ত্যাগ কৰিছিল। তেতিয়াৰ পৰা কংগ্ৰেছৰ স্থায়ী সভাপতি নাছিল। ছোনিয়া গান্ধী অন্তৱৰ্তীকালীন সভাপতি হিচাপে কাৰ্যনিৰ্বাহ কৰি আছে। ইয়াকে কেন্দ্ৰ কৰিয়েই কংগ্ৰেছৰ মাজত অস্থিৰতা আৰম্ভ হয়। গোলাম নবী আজাদ আৰু তেওঁৰ ঘনিষ্ঠ সহযোগীসকলে শেহতীয়াকৈ ৰাহুলক সমালোচনা কৰি দল ত্যাগ কৰিছে।
এনে পৰিস্থিতিত দলটোৰ স্থিতি পুনৰুদ্ধাৰ কৰিবলৈ আৰু পৰৱৰ্তী লোকসভাৰ বাবে প্ৰস্তুতি চলাবলৈ শীঘ্ৰে এগৰাকী সভাপতি নিৰ্বাচিত কৰা প্ৰয়োজন। অৱশেষত নিৰ্বাচনৰ দিন ঘোষণা কৰা হ’ল।