পেট্ৰ’ল, ডিজেল, ৰন্ধন গেছকে ধৰি বিভিন্ন অত্যাৱশ্যকীয় সামগ্ৰীৰ অভাৱনীয় মূল্যবৃদ্ধিৰ প্ৰতিবাদত শনিবাৰে গোৱালপাৰা জিলাৰ কৃষ্ণাই ব্লক কংগ্ৰেছে কৃষ্ণাই গ্ৰাম্য চহৰত প্ৰতিবাদ সাব্যস্ত কৰে ৷
প্ৰতিবাদী সকলে প্ৰথমে কৃষ্ণাই পেট্ৰ’ল পাম্পৰ সন্মুখত প্ৰতিবাদ সাব্যস্ত কৰিব বিচাৰিছিল যদিও আৰক্ষীয়ে প্ৰতিবাদী দলটোক কৃষ্ণাই ব্লক কংগ্ৰেছে কাৰ্যালয়ৰ সন্মুখত আৱদ্ধ কৰি ৰাখে ৷
প্ৰতিবাদকাৰী সকলে কাৰ্যালয়ৰ সন্মুখৰ পথত বহি বিভিন্ন চৰকাৰ বিৰোধী ধ্বনিৰে পৰিবেশ উত্তাল কৰি তোলে ৷
প্ৰতিবাদী সকলে বিজেপি চৰকাৰক ক্ষুৰধাৰ সমালোচনা কৰি মূল্যবৃদ্ধি ৰোধ কৰিব নোৱাৰা দলটোক আগন্তুক নিৰ্বাচনত ৰাইজে উচিত শিক্ষা দিব বুলি মন্তব্য কৰে আৰু মূল্যবৃদ্ধি ৰোধৰ দাবী জনায়।
আনহাতে, বিশ্বনাথত বিশ্বনাথ জিলা কংগ্ৰেছেও প্ৰতিবাদ সাৱ্যস্ত কৰিছে। বিশ্বনাথ নগৰত থকা পেট্ৰল ডিপ’ সমূহত এই প্ৰতিবাদ সাৱ্যস্ত কৰা হয়। মূল্য বৃদ্ধি ৰোধ কৰিব নোৱাৰা বিজেপি চৰকাৰৰ বিৰুদ্ধে এই প্ৰতিবাদ কৰা হয়।
প্ৰতিবাদকাৰী সকলে হাতে হাতে প্লেকাৰ্ড লৈ মূল্য বৃদ্ধি ৰোধ কৰিব নোৱাৰা অকমৰ্ণ্য বিজেপি চৰকাৰ হায় হায়, পেট্ৰল ডিজেলৰ মূল্য হ্ৰাস কৰক, জনসাধাৰণৰ মূৰত অতিৰিক্ত কৰৰ বোজা জাপি দিয়া বন্ধ কৰক, জনবিৰোধী বিজেপি চৰকাৰ নিপাত যাওক ইত্যাদি শ্ল’গান দি এই প্ৰতিবাদ সাব্যস্ত কৰে।
সেইদৰে, হাজোৰ পেট্ৰল পাম্পতো কংগ্ৰেছীসকলে প্ৰতিবাদ সাৱ্যস্ত কৰে।
হাজোৰ পতনিৰ পেট্ৰ’ল পাম্পত ব্লক কংগ্ৰেছৰ উদ্যোগত অৱস্থান ধৰ্মঘট পালন কৰা হয়।
শনিবাৰে সমগ্ৰ ৰাজ্যতে অসম প্ৰদেশ কংগ্ৰেছৰ উদ্যোগত অনুষ্ঠিত হৈছে অৱস্থান ধৰ্মঘট কাৰ্য্যসূচী।
