আৰ এছ এছ নেতাৰ সহযোগত জে বি আইন মহাবিদ্যালয়ৰ অধ্যক্ষা মালৱিকা তালুকদাৰে চৰম অৰাজকতা, দুৰ্নীতি আৰু অনিময় কৰাৰ অভিযোগ উত্থাপন কৰিছে দুৰ্নীতি বিৰোধী যুৱশক্তি অসমৰ সভাপতি ধৰ্মকান্ত গগৈয়ে।
দিচপুৰ প্ৰেছ ক্লাৱত দেওবাৰে এখন সংবাদমেল যোগে এই অভিযোগ আনে দুৰ্নীতি বিৰোধী যুৱশক্তি অসমৰ সভাপতিগৰাকীয়ে।
তেওঁ উল্লেখ কৰে যে, মহাবিদ্যালয় ছাত্ৰ–ছাত্ৰীৰ নামভৰ্তিত দুৰ্নীতি আৰু অনিময়ৰ অভিযোগত বৰ্তমানৰ অধ্যক্ষা গৰাকীৰ বিৰুদ্ধে গোচৰ ৰুজু হৈ থকাৰ সময়তে, তেওঁৰ কাৰ্যকাল শেষ হোৱাৰ পাছতো মহাবিদ্যালয় খনৰ পুঁজিত জমা হৈ থকা অতিৰিক্ত ৮ কোটি টকা লুণ্ঠনৰ স্বাৰ্থত অধ্যক্ষা গৰাকীৰ কাৰ্যকাল বৃদ্ধি কৰা হৈছে।
এই ক্ষেত্ৰত তেওঁক আৰ এছ এছ নেতা হেমন্ত শৰ্মাই সহযোগ কৰা বুলি গগৈয়ে দাবী কৰে।
‘জে বি আইন মহাবিদ্যালয়ত পঞ্জীয়ন নবীকৰণ নথকাৰ সুবিধা লৈ চক্ৰটোৱে সম্পূৰ্ণ ‘গৱৰ্ণিং বডি’ খনক গুৰুত্বহীন কৰি এখন নতুন ‘স্পনচাৰিং কমিটি’ গঠন কৰিছিল। যিটো দুৰ্নীতি বিৰোধী যুৱ শক্তি অসমে গোচৰ ৰুজু কৰাত মহাবিদ্যালয় খনৰ গৰিষ্ঠ সংখ্যকৰ অনুমোদন নোপোৱাত এই চক্ৰান্তত তেওঁলোক সফল হব নোৱাৰিলে,’’-তেওঁ উল্লেখ কৰে।
আনহাতে, অতি শেহতীয়াকৈ এই চক্ৰটোৰ সৈতে শিক্ষামন্ত্ৰী সিদ্ধাৰ্থ ভট্ৰাচাৰ্য মেনেজ হৈ পূৰ্বৰ সম্পূৰ্ণ ‘গৱৰ্ণিং বডি’ খন বাতিল কৰি হেমন্ত শৰ্মা নামৰ আৰ এছ এছ নেতাক মহাবিদ্যালয়খনৰ প্ৰশাসক হিচাপে নিয়োগ কৰে ।
এই আৰ এছ এছ নেতা গৰাকীৰ সহযোগতে ২৯/০৭/২০১৯ তাৰিখে কাৰ্যকাল শেষ হোৱা অধ্যক্ষা মালৱিকা তালুকদাৰক পুনৰ কাৰ্যকাল বঢ়াই দিয়া হ’ল বুলি তেওঁ উল্লেখ কৰে।
এই গোটেই ঘটনাটোত পাকে প্ৰকাৰে মহাবিদ্যালয় খনৰ জমা হৈ থকা অতিৰিক্ত ৮ কোটি টকা পুঁজি লুণ্ঠনৰ স্বাৰ্থতে অধ্যক্ষা গৰাকীৰ কাৰ্যকাল বঢ়াই দিয়া হ’ল বুলি তেওঁ দাবী কৰে।
সংবাদমেলৰ জৰিয়তে গগৈয়ে মুখ্য মন্ত্ৰী সৰ্বানন্দ সোণোৱালক এই বিষয়ত শীঘ্ৰে ব্যৱস্থা গ্ৰহণ কৰাৰ বাবে দাবী জনোৱাৰ লগতে এই সংক্ৰান্তত প্ৰাক্তন ছাত্ৰ- ছাত্ৰী সকলক ওলাই আহিবৰ বাবে আহ্বান জনায়।
