দুৰ্নীতিৰ ক্ষেত্ৰত শূন্যসহনশীল বুলি দাবী কৰা নৰেন্দ্ৰ মোদীৰ শাসনকালত দেশৰ ১৯৩ জন ৰাজনীতিবিদৰ বিৰুদ্ধে দুৰ্নীতিৰ গোচৰৰ তদন্ত চলাইছিল ইডিয়ে। কেন্দ্ৰীয় তদন্তকাৰী সংস্থাটোৱে ১৯৩ গৰাকী ৰাজনীতিবিদৰ ভিতৰত এই পৰ্যন্ত মাত্ৰ দুজন লোকক দোষী সাব্যস্ত কৰিবলৈ সক্ষম হৈছে।
ইয়াৰ পাছতে বিৰোধী শিবিৰে গোচৰৰ অধিকাংশই ৰাজনৈতিক উদ্দেশ্যপ্ৰণোদিত বুলি দাবী কৰিছে। তেওঁলোকে কয় যে অভিযোগৰ কোনো তথ্য বা সাক্ষ্য নাই। সেয়েহে তেওঁলোকে আদালতত অভিযোগ প্ৰমাণ কৰিবলৈ সক্ষম হোৱা নাই।
চিপিএমৰ সাংসদ এ এ ৰহিমৰ এক প্ৰশ্নৰ উত্তৰত ৰাজ্যসভাৰ বিত্ত ৰাজ্য মন্ত্ৰী পংকজ চৌধুৰীয়ে কয় যে যদিও বাকী নেতাসকলৰ বিৰুদ্ধে গোচৰ চলি আছে, তেওঁলোকৰ কোনো এজনকো আদালতে দোষমুক্ত কৰা নাই। বিৰোধীক লক্ষ্য কৰি লোৱাৰ অভিযোগ অস্বীকাৰ কৰি মন্ত্ৰীগৰাকীয়ে কয় যে ইডিয়ে দল, জাতি, ধৰ্মৰ ভিত্তিত গোচৰ ৰুজু নকৰে বুলি উল্লেখ কৰে।
ৰাজ্যিক মন্ত্ৰীগৰাকীয়ে দিয়া হিচাপ অনুসৰি নৰেন্দ্ৰ মোডী চৰকাৰৰ দ্বিতীয় কাৰ্যকালত অৰ্থাৎ ২০১৯ৰ পৰা ২০২৪ চনৰ ভিতৰত সৰ্বাধিক সংখ্যক ৰাজনীতিবিদে ইডি তদন্তৰ সন্মুখীন হৈছে। প্ৰত্যেকৰে বিৰুদ্ধে তদন্ত আৰু গোচৰ চলি আছে।
শেহতীয়া তথ্য অনুসৰি ২০১৯-২০ আৰু ২০২১-২২ বিত্তীয় বৰ্ষত ২৬ জনকৈ নেতাৰ বিৰুদ্ধে অবৈধ বিত্তীয় লেনদেনৰ অভিযোগত ইডিয়ে গোচৰ ৰুজু কৰিছে। কেন্দ্ৰীয় তদন্তকাৰী সংস্থাটোৱে ২০২২-২৩ বিত্তীয় বৰ্ষত ৩২জন লোকৰ বিৰুদ্ধে গোচৰ ৰুজু কৰিছে।
প্ৰসংগক্ৰমে এই সময়ছোৱাত ইডিয়ে একেটা গোচৰতে দুগৰাকী শীৰ্ষ কংগ্ৰেছ নেতা ছোনিয়া আৰু ৰাহুল গান্ধীক জেৰা কৰিছে। অৱশ্যে আয়কৰ গোচৰত দুয়োজনেই জামিন লাভ কৰে।
বিৰোধীয়ে দীৰ্ঘদিন ধৰি দাবী কৰি আহিছে যে ইডি আৰু চিবিআইয়ে মোদী চৰকাৰৰ ৰাজনৈতিক অস্ত্ৰ হিচাপে কাম কৰি আছে। এই সংস্থাটোৰ জৰিয়তে বিৰোধীক হাৰাশাস্তি কৰা হৈছে।
যদিও এই অভিযোগ পোনপটীয়াকৈ মানি লোৱা হোৱা নাই, তথাপি ইডিৰ তদন্ত আৰু অভিযুক্তৰ জিম্মাত পলম হোৱাৰ বিৰুদ্ধে কেইবাখনো আদালতে এই সন্দৰ্ভত সংস্থা দুটআক জবাবদিহি কৰিছে। আৰু ইডি আইনৰ কিছু ধাৰাও বাতিল কৰিছে আদালতে। কিন্তু বলবৎকাৰী সঞ্চালকালয়ক লৈ অতি আশংকা কমা নাই, কিয়নো আইনখনৰ আটাইতকৈ বিতৰ্কিত অংশটো এতিয়াও বৰ্তি আছে।
