লকডাউনৰ পিছত অসমলৈ ঘূৰি আহিব খোজা বহিঃৰাজ্যত থকা লোকসকলৰ বাবে ৰাজ্য চৰকাৰে এক বিশেষ ব্যৱস্থা কৰিব।
অসমলৈ ঘূৰি আহিব খোজা লোকসকলে প্ৰথমে নিজৰ নাম পঞ্জীয়ন কৰাৰ এক ব্যৱস্থা কৰা হ’ব আৰু তেওঁলোকে এক পাৰ্মিট ল’ব লাগিব।
মন্ত্ৰী হিমন্ত বিশ্ব শৰ্মাই সোমবাৰে সংবাদমেলত এই বিষয়ে সদৰী কৰে।
তেওঁ কয় যে লকডাউন কেতিয়ালৈকে থাকিব সেয়া কেন্দ্ৰীয় চৰকাৰৰ বিষয়, কিন্তু বহু লোক বহিঃৰাজ্যৰ পৰা একে সময়তে অসমলৈ ঘূৰি আহিলে কুৱাৰেণ্টাইন কৰাত সমস্যা সৃষ্টি হ’ব।
তেওঁ কয় যে অসম চৰকাৰে অহা তিনি, চাৰিদিনৰ ভিতৰত এটা ৱেবছাইট মুকলি কৰিব আৰু তাত লোকসকলে নিজৰ নাম পঞ্জীয়ন কৰিব পাৰিব।
লোকসকল অসমৰ কোন ঠাইলৈ তেওঁলোক আহিব আৰু কোনদিনা আহিব সেই সন্দৰ্ভত তথ্য দাখিল কৰিব লাগিব।
তাৰ পিছত পৰ্য্যায়ক্ৰমে ভাগ ভাগকৈ লোকসকলক অসমত প্ৰৱেশ কৰিবলৈ দিয়া হ’ব।
অসম চৰকাৰে ইতিমধ্যে ৰাজ্যৰ বাহিৰত থকা লোকসকলক য’তে আছে তাতে থাকিবলৈ আহ্বান জনাইছে।
