পশ্চিমবংগৰ শেহতীয়া বিধানসভা নিৰ্বাচনৰ সময়ত বিশেষ নিৰ্বপন সংশোধন বা এছ আই আৰ প্ৰক্ৰিয়াৰ জৰিয়তে ভোটাৰ তালিকাৰ পৰা বহু ভোটাৰৰ নাম কৰ্তন কৰাক লৈ উচ্চতম ন্যায়ালয়ত সোমবাৰে এক গুৰুত্বপূৰ্ণ শুনানি অনুষ্ঠিত হয়। এই শুনানিতে মুখ্যমন্ত্ৰী মমতা বেনাৰ্জীৰ নেতৃত্বাধীন তৃণমূল কংগ্ৰেছে আদালতক অৱগত কৰে যে ৰাজ্যখনৰ কেইবাটাও সমষ্টিত যি হাৰত ভোটাৰৰ নাম তালিকাৰ পৰা আঁতৰাই দিয়া হৈছিল, তাৰ বাবেই নিৰ্বাচনী ফলাফলত ব্যাপক প্ৰভাৱ পৰিছে। উচ্চতম ন্যায়ালয়ৰ মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ বিচাৰপীঠে এই বিষয়ত তৃণমূল কংগ্ৰেছ আৰু মমতা বেনাৰ্জীক নতুনকৈ আবেদন দাখিল কৰাৰ অনুমতি প্ৰদান কৰিছে।
তৃণমূল কংগ্ৰেছৰ হৈ অধিবক্তা কল্যাণ বেনাৰ্জীয়ে আদালতত যুক্তি দৰ্শায় যে পশ্চিমবংগৰ প্ৰায় ৩১ খন বিধানসভা আসনত জয়-পৰাজয়ৰ ব্যৱধান যিমান আছিল, তাতকৈ বহু বেছি ভোটাৰৰ নাম তালিকাৰ পৰা কাটি দিয়া হৈছে। উদাহৰণ স্বৰূপে তেওঁ উল্লেখ কৰে যে এটা সমষ্টিত তৃণমূলৰ প্ৰাৰ্থীগৰাকী মাত্ৰ ৮৬২ টা ভোটত পৰাজিত হৈছিল যদিও সেই একেটা সমষ্টিতে প্ৰায় ৫০০০ ৰো অধিক ভোটাৰৰ নাম তালিকাৰ পৰা কৰ্তন কৰা হৈছিল। ইয়াৰ উপৰিও সমগ্ৰ ৰাজ্যখনত বিজেপি আৰু তৃণমূলৰ মাজত ভোটৰ পাৰ্থক্য ৩২ লাখমান আছিল যদিও ভোটাৰ তালিকাৰ পৰা নাম কটা যোৱা লোকৰ সংখ্যা প্ৰায় ৩৫ লাখৰো অধিক।
আনহাতে জ্যেষ্ঠ অধিবক্তা মেনকা গুৰুস্বামীয়ে আদালতক জানিবলৈ দিয়ে যে বৰ্তমানৰ গতিৰে এই আবেদনসমূহ নিষ্পত্তি কৰিবলৈ গলে প্ৰায় চাৰি বছৰ সময়ৰ প্ৰয়োজন হ’ব। ইয়াৰ বিপৰীতে ভাৰতীয় নিৰ্বাচন আয়োগে তৃণমূলৰ এই অভিযোগৰ বিৰোধিতা কৰি কয় যে নিৰ্বাচন কেন্দ্ৰিক যিকোনো বিবাদৰ আইনী সমাধান কেৱল নিৰ্বাচনী আবেদনৰ জৰিয়তেহে সম্ভৱ। নিৰ্বাচন আয়োগৰ মতে নিৰ্বাচন শেষ হোৱাৰ পিছত সকলো বিষয়কে লৈ বেলেগে গোচৰ তৰিব নোৱাৰি কিয়নো আইনত ইয়াৰ ব্যৱস্থা স্পষ্টকৈ উল্লেখ কৰা আছে।
উচ্চতম ন্যায়ালয়ৰ বিচাৰপীঠে অৱশ্যে উল্লেখ কৰে যে যদিহে জয়ৰ ব্যৱধান কৰ্তন কৰা ভোটৰ সংখ্যাতকৈ কম হয় তেন্তে সেই বিষয়সমূহ আদালতে পৰীক্ষা কৰি চাব পাৰে। বিচাৰপীঠে লগতে কয় যে আবেদনসমূহৰ সময়মতে নিষ্পত্তি হোৱাটো অতি প্ৰয়োজনীয় আৰু বৰ্তমানৰ আইনী ব্যৱস্থাক আৰু অধিক উন্নত কৰিব পৰা যায়। উল্লেখ্য যে ২৯৪ খন আসনৰ ভিতৰত বিজেপিয়ে ২০৭ খন আৰু তৃণমূলে ৮০ খন আসনত জয়লাভ কৰিছিল আৰু সমগ্ৰ ৰাজ্যখনতে ৯০ শতাংশতকৈ অধিক ভোটদান সম্পন্ন হৈছিল। এতিয়া আদালতৰ পৰৱৰ্তী পদক্ষেপে এই নিৰ্বাচনী বিবাদৰ ক্ষেত্ৰত কি দিশ লয় সেয়া লক্ষণীয় হ’ব।
