জনসাধাৰণৰ সমৰ্থন ক্ৰমান্বয়ে কমি আহিছে। তৃণমূল পৰ্যায়ৰ নেতা-কৰ্মীৰ মাজতো ক্ষোভ-প্ৰতিবাদ বাঢ়িছে। এই সকলোবোৰ বিৰোধীৰ মিছা অপপ্ৰচাৰ বুলি ভাবিলে বিৰাট ক্ষতিৰ সন্মুখীন হোৱাটো নিশ্চিত। নিজকে শক্তিশালী বুলি ধৰি লৈ উদাসীন হৈ থাকিলে অনাগত দিনত অপেক্ষা কৰি আছে বৃহৎ বিপদ।
বিজেপিৰ শীৰ্ষ নেতৃত্বলৈ এনেদৰেই দেশৰ বিভিন্ন প্ৰান্তৰ পৰা আহি আছে ৰাজ্যিক পৰ্যায়ৰ নেতা কৰ্মীসকলৰ সতৰ্কবাণী।
দলৰ সূত্ৰ অনুসৰি ৰাজ্যসমূহত যি ক্ষোভ বৃদ্ধি পাইছে সেই সন্দৰ্ভত প্ৰথম শাৰীৰ নেতাসকল সচেতন। কিন্তু এই সকলোবোৰতকৈও তাৎপৰ্যপূৰ্ণ কথাটো হ’ল প্ৰথমবাৰৰ বাবে নৰেন্দ্ৰ মোডী আৰু অমিত শ্বাহৰ দল পৰিচালনাৰ প্ৰক্ৰিয়াক লৈ দলৰ ভিতৰত সমালোচনা, আপত্তি আৰু ক্ষোভৰ সৃষ্টি হৈছে।
ইখনৰ পিছত সিখন ৰাজ্যত অনুষ্ঠিত হোৱা লোকসভা নিৰ্বাচনৰ পৰ্যালোচনা বৈঠকত ইয়াৰ প্ৰতিফলন ঘটিছে। প্ৰতিখন বৈঠকত কেন্দ্ৰীয় নেতৃত্বৰ দুজন প্ৰতিনিধি পৰ্যবেক্ষক হিচাপে উপস্থিত থাকে। তেওঁলোকৰ সন্মুখতে ৰাজ্যৰ নেতা-কৰ্মীয়ে ক্ষোভ প্ৰকাশ কৰিছে।
মন কৰিবলগীয়া যে সেই বৈঠকবোৰত কেন্দ্ৰীয় প্ৰতিনিধিসকলেও স্পষ্ট ভাষাত মত প্ৰকাশ কৰিছে। ৰাজস্থানৰ পৰা উত্তৰ প্ৰদেশ, মহাৰাষ্ট্ৰ বা গোৱালৈ প্ৰতিখন ৰাজ্যৰ পৰা এটাই বাৰ্তা-এনেকৈ থাকিলে বিজেপিৰ বাবে এইটোৱে শেষৰ আৰম্ভণি।
উত্তৰ প্ৰদেশক লৈ বিশেষভাৱে শংকিত হৈ পৰিছে গেৰুৱা শিবিৰৰ শীৰ্ষ নেতৃত্ব। কাৰণ, শেহতীয়া পৰ্যালোচনা বৈঠকত যোগী আদিত্যনাথে আচলতে অতি আত্মবিশ্বাস আৰু ভেঙুচালিক দোষাৰোপ কৰি দিল্লীলৈ আঙুলি টোৱাইছে। আৰু তাৰ ৪৮ ঘন্টাৰ ভিতৰতে দিল্লীৰ নেতৃত্বই তাৰ প্ৰতি সঁহাৰি জনাইছে। এই ক্ষেত্ৰত তেওঁলোকৰ ‘মুখপাত্ৰ’ হৈছে যোগী চৰকাৰৰ উপ-মুখ্যমন্ত্ৰী কেশৱ প্ৰসাদ মৌৰ্য। কৰ্মীসভাত নিজৰ চৰকাৰৰ ওপৰতে তেওঁৰ আক্ৰমণ, ‘সংগঠনক দোষাৰোপ কৰি কোনো ৰাজনৈতিক লক্ষ্যত উপনীত নহ’ব। দলৰ ওচৰ চাপিব লাগিব। দলৰ নেতা-কৰ্মীসকল যাতে অপমানিত নহয় সেইটো চাব লাগিব।‘ অৰ্থাৎ তেওঁৰ টাৰ্গেট কোন? যোগী আদিত্যনাথ।
হিমাচলতো বিদ্ৰোহৰ উকমুকনি। প্ৰাক্তন মুখ্যমন্ত্ৰী প্ৰেম কুমাৰ ধুমলে মোডী-শ্বাহলৈ আঙুলিয়াই আক্ৰমণ, ‘হিমাচল প্ৰদেশৰ নিৰ্বাচিত কংগ্ৰেছ চৰকাৰখনক ভাঙি পেলাবলৈ কিয় ইমান দৌৰাদৌৰি? পূৰ্বে দলৰ শক্তি আছিল কৰ্মী। অট’লজী, আদৱানীজীয়ে কৰ্মীৰ কথা শুনি সিদ্ধান্ত লৈছিল। এতিয়া ধুমলৰ আন এটা পৰিচয় কি? তেওঁ বিজেপি সাংসদ অনুৰাগ ঠাকুৰৰ পিতৃ। পাঁচবাৰৰ বিধায়ক। গতিকে হিমাচলত তেওঁৰ প্ৰভাৱ বৰ বেছি।‘
ৰাজস্থানৰ পৰ্যালোচনা বৈঠকত কেন্দ্ৰীয় পৰ্যবেক্ষকে শুনিব লগা হৈছে, বহুবাৰ দিল্লীত দলীয় আৰু চৰকাৰী অনিয়মৰ কথা কোৱা হৈছে। কোনো সঁহাৰি পোৱা নগ’ল। মহাৰাষ্ট্ৰত দেৱেন্দ্ৰ ফাড়নবিছক কোৱা হৈছে যে, “অন্য দল ভাঙিবলৈ গৈ বিজেপি কংগ্ৰেছতকৈয়ো পিছ পৰি আছে। সন্মুখত নিৰ্বাচন। ৰাজ্যিক বিজেপিয়ে কেনেকৈ আগবাঢ়িব সেইটো সিদ্ধান্ত লওক।” অৰ্থ স্পষ্ট, দিল্লী নেতৃত্বই যাতে আৰু বেছি হস্তক্ষেপ নকৰে।
লগতে পঢ়কঃ মুম্বাই বিমানবন্দৰত অপ্ৰীতিকৰ পৰিস্থিতি; ১৮০০টা খালী পদৰ বাবে ১৫ হাজাৰ লোক উপস্থিত
এই সকলোৰ বিপৰীতে অসমত ঘটিছে কি? মুখ্যমন্ত্ৰী হিমন্ত বিশ্ব শৰ্মা আৰু অনুগত দুই-তিনিজন মন্ত্ৰীয়ে নিজকে বিজেপিৰ কাণ্ডাৰী হিচাপে তুলি ধৰি পদে পদে ওফাইদং মাৰিছে। বিজেপিৰ ৰাজ্যিক সভাপতিগৰাকী মাথোঁ সাক্ষীগোপাল! দলৰ নেতা-কৰ্মীসকল অসন্তুষ্ট, ক্ষোভিত। সেয়াই নহয়, বহু পুৰণি নিষ্ঠাৱান দলীয় কৰ্মী এতিয়া দল এৰিবলৈ সাজু হৈছে। শেহতীয়া লোকসভাৰ নিৰ্বাচনৰ ফলাফলে বিজেপিৰ ভিতৰচৰাত আৰু অধিক তীব্ৰ বিদ্ৰোহৰ সূচনা কৰিছে।
ইপিনে, প্ৰদেশ কংগ্ৰেছত সাংসদ গৌৰৱ গগৈৰ উপস্থিতিয়ে বিজেপিতো জোকাৰণিৰ সৃষ্টি কৰিছে। গৌৰৱৰ জনপ্ৰিয়তা বৃদ্ধ পোৱাৰ লগে লগে কংগ্ৰেছৰ কৰ্মীসকলৰ মাজতো উৎসাহ বৃদ্ধি পাইছে। বিপৰীতে বিজেপি কৰ্মীসকলৰ মাজত হ্ৰাস পাইছে তৎপৰতা। ৰাজ্যত মুখ্যমন্ত্ৰী কেন্দ্ৰিক বিজেপিক লৈ দলৰ নেতা-কৰ্মীসকল হতাশ আৰু নিষ্ক্ৰিয় হৈ পৰিছে। সেয়ে, অহা ২৬’ৰ বিধানসভা নিৰ্বাচনকলৈ বিৰোধীৰ মাজত আশাৰ ৰেঙণিৰ বিপৰীতে বিজেপিত দেখা গৈছে নিৰাশাৰ প্ৰচ্ছায়া।
দৰাচলতে, বিজেপিৰ বিদ্ৰোহৰ এই সামগ্ৰিক ছবিখনৰ সাৰমৰ্ম কি? মোডী-শ্বাহৰ একক আধিপত্য এতিয়া নাই। কাৰণ, জগত প্ৰকাশ নড্ডাৰ কাৰ্যকাল শেষ হ’লেও মোডী-শ্বাহে পৰৱৰ্তী সভাপতি বাছনি কৰিব পৰা নাই। সকলো দিশ পৰীক্ষা কৰি সংঘই নিৰ্দেশ দিলে সভাপতিৰ নাম চূড়ান্ত হ’ব।
লগতে পঢ়কঃ টি-২০ ক্ৰিকেটত কোন হ’ব ভাৰতীয় দলৰ অধিনায়ক? বিচিচিআইত নতুন চৰ্চা!
প্ৰশ্ন মাথোঁ এটাই, দলৰ নিয়ন্ত্ৰণ আৰু টীম মোডীৰ হাতত নাই? দলৰ আশংকা, মহাৰাষ্ট্ৰ-ঝাৰখণ্ড-হাৰিয়ানা—তিনিখন ৰাজ্যৰ নিৰ্বাচনৰ ফলাফলৰ ওপৰতে ওলমি ৰৈছে মোডী-শ্বাহৰ ভাগ্য।
