কাকপথাৰৰ অসম-অৰুণাচল সীমান্তৰ ডিৰাক গে’টত ‘সন্দেহজনক’ নাগৰিক বুলি দাবী কৰি শনিবাৰে ৪জন লোকক আটক কৰিছে অসম জাতীয়তাবাদী যুৱ ছাত্ৰ পৰিষদৰ কাকপথাৰ আঞ্চলিক সমিতিৰ কৰ্মকতাই।
সংগঠনটোৱে আটক কৰা লোককেইজনক বৰডুমচা আৰক্ষী থানাত গতাই দিয়াৰ পিছত আৰক্ষীয়ে বৰ্তমান তেওঁলোকৰ সোধ-পোচ কৰি আছে বুলি জানিব পৰা গৈছে।
ব্যক্তিকেইজনৰ নথি-পত্ৰ নাই নেকি বা কিবা বিসংগতি আছে নেকি সেই সন্দৰ্ভত আৰক্ষীৰ বক্তব্য এতিয়ালৈকে জানিব পৰা হোৱা নাই।
ডিৰাক গে’টত ‘সন্দেহজনকভাৱে’ ঘূৰি ফুৰা বুলি দাবী কৰি সংগঠনটোৱে দাবী কৰিছে যে লোককেইজনৰ ‘উপযুক্ত’ নথি-পত্ৰ নাই। ‘কৰিমগঞ্জ জিলাৰ পৰা অহা ব্যক্তিকেইগৰাকী কামৰ বাবে অৰুণাচল প্ৰদেশলৈ আহিছিল বুলি জানিবলৈ দিয়ে যদিও উপযুক্ত দেখুৱাব নোৱাৰিলে,’ সংগঠনটোৰ কৰ্মকৰ্তাৰ দাবী৷
সংগঠনটোৱে দাবী কৰিছে যে দলটোত মুঠ ৬গৰাকী পুৰুষ-মহিলা আহিছিল আৰু তাৰে ভিতৰত ২গৰাকীয়ে ইতিমধ্যে অৰুণাচল প্ৰদেশত প্ৰৱেশ কৰিছে।