বান সাহায্য সংগ্ৰহ সন্দৰ্ভত মুখ্যমন্ত্ৰী হিমন্ত বিশ্ব শৰ্মাই কৰা সাম্প্ৰতিক মন্তব্যক লৈ তীব্ৰ প্ৰতিক্ৰিয়া প্ৰকাশ কৰিছে ডিৱাইএফআই অসম ৰাজ্যিক কমিটিয়ে। সংগঠনটোৱে অভিযোগ কৰিছে যে মুখ্যমন্ত্ৰীৰ এই মন্তব্য চৰকাৰৰ বান পৰিস্থিতি মোকাবিলাত হোৱা ব্যৰ্থতা লুকুৱাবলৈ কৰা এক প্ৰয়াস।
এক প্ৰেছ বিজ্ঞপ্তিযোগে ডিৱাইএফআইয়ে কয় যে শিৱসাগৰ, চৰাইদেউ, যোৰহাট আদি জিলাত হোৱা বিধ্বংসী বানৰ পিছত সাধাৰণ ৰাইজ, শিল্পী, সমাজকৰ্মী, সামাজিক মাধ্যমৰ কনটেণ্ট ক্ৰিয়েটৰকে ধৰি বিভিন্নজনে স্বতঃস্ফূৰ্তভাৱে বানপীড়িত লোকসকলৰ সহায়ৰ বাবে ধন সংগ্ৰহ কৰিছে। এনে সহায়মূলক পদক্ষেপক উৎসাহিত কৰাৰ পৰিৱৰ্তে পুলিচী ব্যৱস্থাৰ সতৰ্কবাণী দিয়াটো অসংবেদনশীল।
প্ৰেছ বিজ্ঞপ্তিত ডিৱাইএফআইয়ে উল্লেখ কৰে যে বানত মৃত্যুবৰণ কৰা লোকৰ পৰিয়ালক ঘোষণা কৰা ৯ লাখ টকাৰ সাহায্যৰ ভিতৰত ৪ লাখ টকা ৰাষ্ট্ৰীয় দুৰ্যোগ সঁহাৰি পুঁজি (NDRF)-ৰ পৰা আৰু বাকী ৫ লাখ টকা মুখ্যমন্ত্ৰীৰ সাহায্য পুঁজিৰ পৰা প্ৰদান কৰা হয়। সংগঠনটোৱে অভিযোগ কৰে যে মুখ্যমন্ত্ৰীৰ সাহায্য পুঁজিৰ ব্যৱহাৰ আৰু স্বচ্ছতাক লৈ বিভিন্ন সময়ত প্ৰশ্ন উত্থাপিত হৈছে, কিন্তু সেই সন্দৰ্ভত চৰকাৰৰ পৰা স্পষ্ট ব্যাখ্যা পোৱা হোৱা নাই।
সংগঠনটোৱে লগতে অভিযোগ কৰে যে মুখ্যমন্ত্ৰীয়ে কেন্দ্ৰীয় চৰকাৰৰ পৰা অধিক আৰ্থিক সহায় বিচৰাৰ ক্ষেত্ৰত অনীহা প্ৰকাশ কৰাৰ ফলত অসমৰ বান সমস্যাই প্ৰয়োজনীয় গুৰুত্ব লাভ কৰা নাই। ডিৱাইএফআইৰ দাবী, অন্য ৰাজ্যসমূহে অধিক কেন্দ্ৰীয় অনুদান লাভ কৰাৰ বিপৰীতে অসমে তুলনামূলকভাৱে কম সহায় লাভ কৰিছে।
বান সমস্যাক ৰাষ্ট্ৰীয় সমস্যা হিচাপে ঘোষণা কৰাৰ দাবী উত্থাপন কৰি ডিৱাইএফআইয়ে কেন্দ্ৰীয় চৰকাৰৰ ওপৰত অধিক চাপ প্ৰয়োগ কৰিবলৈ ৰাজ্য চৰকাৰক আহ্বান জনায়। ইয়াৰ লগতে চুবুৰীয়া ৰাজ্যসমূহৰ সৈতে সমন্বয় কৰি আন্তঃৰাজ্যিক নদী ব্যৱস্থাপনা, অবৈধ খনন বন্ধ, নদী বান্ধৰ প্ৰভাৱৰ বৈজ্ঞানিক মূল্যায়ন নোহোৱালৈ নতুন বান্ধ নিৰ্মাণ স্থগিত ৰখা আৰু বান ক্ষতিগ্ৰস্ত লোকসকললৈ আগবঢ়োৱা আৰ্থিক সহায়ৰ পৰিমাণ বৃদ্ধি কৰাৰ দাবীও জনায়।
উল্লেখ্য, মুখ্যমন্ত্ৰী হিমন্ত বিশ্ব শৰ্মাই শেহতীয়াকৈ বান সাহায্যৰ নামত ৰাস্তা বা ৰাজহুৱা স্থানত অনুমতিবিহীনভাৱে ধন সংগ্ৰহ কৰাৰ বিৰুদ্ধে কঠোৰ ব্যৱস্থাৰ সতৰ্কবাণী দিছিল। তেওঁৰ মতে, বলপূৰ্বক বা অনিয়ন্ত্ৰিতভাৱে সাহায্য সংগ্ৰহৰ দৰে ঘটনাই ৰাজ্যখনৰ ভাবমূৰ্তিত প্ৰভাৱ পেলাব পাৰে।
