এইবাৰ ইণ্ডিয়ান ছুপাৰ লীগ (আই এছ এল) ছিজনত শক্তিশালী প্ৰদৰ্শনেৰে খেলপথাৰত প্ৰৱেশ কৰিছে নৰ্থইষ্ট ইউনাইটেড এফ চিয়ে। যোৱা বছৰ য’ত শেষ হৈছিল, এই বছৰ তেওঁলোকে আৰু শক্তিশালীভাৱে আৰম্ভ কৰিছে। দলটোৱে চলিত ছিজনৰ আৰম্ভণিতে প্ৰসিদ্ধ ডুৰাণ্ড কাপ চেম্পিয়ন হিচাপে সকলোৰে দৃষ্টি আকৰ্ষণ কৰিছিল। মোহন বাগান ছুপাৰ জায়েন্টছৰ দৰে শক্তিশালী দলক পৰাস্ত কৰি প্ৰথমবাৰৰ বাবে ট্ৰফী হস্তগত কৰে।
অৱশ্যে ডুৰাণ্ড কাপত সেই আশ্চৰ্য্য প্ৰদৰ্শনৰ পিছতো আই এছ এলত প্ৰথমতেই মহামেদান স্প’ৰ্টিং ক্লাবক পৰাস্ত কৰে। এই জয়ত আলাউদ্দিন আজৰাইয়ে একমাত্ৰ গ’লটো দিয়ে। কিন্তু নৰ্থ-ইষ্টে পৰৱৰ্তী মেচত শক্তিশালী মোহন বাগানৰ হাতত পৰাজয় স্বীকাৰ কৰিবলগীয়া হৈছিল।
সেয়া অতীত কৰি তুলি পিছৰ মেচখনতে উত্তৰ-পূবৰ দলটোৱে পুনৰ ছন্দলৈ ঘুৰি আহিল। তেওঁলোকৰ শক্তি শেষ হোৱা নাই। একেৰাহে তিনিখন মেচত কিছু অস্থিৰ প্ৰদৰ্শনৰ অন্তত দলটোৱে জামছেদপুৰ এফ চিৰ বিৰুদ্ধে সহজ জয় নিশ্চিত কৰে। এই প্ৰদৰ্শনে তেওঁলোকক তালিকাৰ পঞ্চম স্থানলৈ লৈ যায়, য’ত তেওঁলোকে ৬খন খেলৰ পৰা মুঠ ৮ পইণ্ট সংগ্ৰহ কৰে।
লগতে পঢ়কঃ ৰাজনীতিত প্ৰথম জনসভা তামিল অভিনেতা বিজয়ৰ; স্পষ্ট কৰিলে দলৰ লক্ষ্য, ষ্টেলিনৰ দলকো কটাক্ষ!
দলটোৰ এই ভাল ফলাফলৰ আঁৰত প্ৰশিক্ষক পেড্ৰ’ বেনালিৰ পথ প্ৰদৰ্শন, আলাউদ্দিন আজৰাইৰ লগতে অসমৰ তাৰকা পাৰ্থিৱ গগৈয়ে এক বিশেষ ভূমিকা পালন কৰিছে।
মাত্ৰ একৈশ বছৰীয়া এইজন ফৰৱাৰ্ড খেলুৱৈ পাৰ্থিৱ গগৈয়ে ইতিমধ্যে ৫খন খেলত ২টা গ’ল আৰু ১টা এছিষ্টেৰে সকলোৰে দৃষ্টি আকৰ্ষণ কৰিছে। যোৱা ছিজনৰ শক্তিশালী প্ৰদৰ্শনৰ ধাৰাবাহিকতাত এই ছিজনতো তেওঁ নিজৰ জাতীয় দলত কেইবাবাৰো সুযোগ পাইছিল।
নৰ্থইষ্ট ইউনাইটেডৰ স্পেইনৰ প্ৰশিক্ষক পেড্ৰ’ বেনালি এইগৰাকী ভাৰতীয় খেলুৱৈক লৈ অতি আশাবাদী। শেহতীয়াকৈ দিয়া এক সাক্ষাৎকাৰত তেওঁ কয়, ‘পাৰ্থীৱক লৈ মই গৌৰৱান্বিত। খেলপথাৰত তেওঁৰ নিৰন্তৰ উন্নতি আৰু অৱদান দেখি মই আনন্দিত হৈছো। যিসকলে সদায় পৰিসংখ্যাৰ কথা চিন্তা কৰি থাকে তেওঁলোকে অলপ সময় অপেক্ষা কৰিব পাৰে। আগন্তুক মেচসমূহত পাৰ্থিবৰ আৰু ভাল প্ৰদৰ্শন চাবলৈ আমি আগ্ৰহেৰে বাট চাই আছো।”
লগতে পঢ়কঃ স্বামী-স্ত্ৰীৰ এই অভ্যাসবোৰে ধ্বংস কৰে জীৱন; কৈছে চাণক্য নীতিয়ে
জামছেদপুৰৰ খেলখনত পাৰ্থিবৰ দুটা গ’লে দলটোৰ দুৰ্বলতা দূৰ কৰাত সহায় কৰে আৰু পাৰ্থিবৰ মেন অৱ দ্য মেচৰ স্বীকৃতিয়ে মেচখনক আৰু অধিক তাৎপৰ্যপূৰ্ণ কৰি তুলিলে। প্ৰশিক্ষকৰ কথাৰ পৰা স্পষ্ট যে পাৰ্থিৱ গগৈয়ে ভৱিষ্যতে দলৰ সফলতাত অধিক গুৰুত্বপূৰ্ণ ভূমিকা পালন কৰিব।
এতিয়া বেনালিৰ সপোন আৰু পার্থিৱৰ অসাধাৰণ প্রদর্শনে নর্থ ইষ্ট ইউনাইটেডক এই ছিজনত আই এছ এল খিতাপৰ দিশে কিমান দূৰলৈ লৈ যাব পাৰে সেয়া লক্ষ্যণীয় হ’ব৷
