নামী-দামী পঞ্চ তাৰকাযুক্ত হোটেলত খাদ্যৰ মান আৰু পৰিষ্কাৰ-পৰিচ্ছন্নতা সন্দৰ্ভত ভয়ংকৰ তথ্য পোহৰলৈ আহিছে বেংগালুৰুত। খাদ্য সুৰক্ষা বিভাগে চলোৱা অভিযানত কেইবাখনো বিলাসী হোটেলত ম্যাদ উকলি যোৱা খাদ্য সামগ্ৰী, পচা শাক-পাচলি আৰু ভেঁকুৰ ধৰা খাদ্য সামগ্ৰী উদ্ধাৰ কৰা হৈছে।
শেহতীয়াকৈ বেংগালুৰুৰ বিভিন্ন হোটেল আৰু খাদ্য প্ৰতিষ্ঠানত খাদ্য সুৰক্ষা পৰীক্ষা অভিযান চলোৱা হয়। এই অভিযানৰ সময়ত পৰিদৰ্শনকাৰী বিষয়াসকলে খাদ্য সামগ্ৰীৰ সংৰক্ষণ, ব্যৱহাৰৰ উপযোগিতা আৰু পাকঘৰৰ পৰিষ্কাৰ-পৰিচ্ছন্নতা পৰীক্ষা কৰে।
অভিযোগ অনুসৰি, কিছুমান পঞ্চ তাৰকাযুক্ত হোটেলৰ পাকঘৰ আৰু খাদ্য সংৰক্ষণস্থলত ম্যাদ উকলি যোৱা গাখীৰ, পচি যোৱা শাক-পাচলি আৰু ভেঁকুৰ ধৰা খাদ্য সামগ্ৰী পোৱা যায়। খাদ্য সামগ্ৰী সঠিক উষ্ণতাত সংৰক্ষণ কৰা হৈছে নে নাই আৰু ম্যাদ উকলি যোৱা সামগ্ৰী ব্যৱহাৰৰ পৰা আঁতৰাই ৰখা হৈছে নে নাই-সেই বিষয়তো গুৰুতৰ অনিয়ম ধৰা পৰে।
সাধাৰণতে পঞ্চ তাৰকাযুক্ত হোটেলত খাদ্যৰ মান, পৰিষ্কাৰ-পৰিচ্ছন্নতা আৰু সুৰক্ষাৰ ক্ষেত্ৰত উচ্চমানৰ ব্যৱস্থা আশা কৰা হয়। কিন্তু পৰিদৰ্শনত এনে বিসংগতি ধৰা পৰাত খাদ্য সুৰক্ষা ব্যৱস্থাক লৈ প্ৰশ্ন উত্থাপন হৈছে।
খাদ্য সুৰক্ষা বিষয়াসকলে হোটেলসমূহক খাদ্য সামগ্ৰীৰ ম্যাদ, সংৰক্ষণ পদ্ধতি আৰু পাকঘৰৰ পৰিষ্কাৰ-পৰিচ্ছন্নতাৰ ক্ষেত্ৰত কঠোৰ নিয়ম মানি চলাৰ নিৰ্দেশ দিছে।
বিশেষজ্ঞসকলৰ মতে, ম্যাদ উকলি যোৱা খাদ্য বা ভেঁকুৰ ধৰা খাদ্য সামগ্ৰী ব্যৱহাৰ কৰিলে খাদ্যজনিত ৰোগৰ আশংকা বৃদ্ধি পাব পাৰে। সেয়ে হোটেলৰ নাম বা শ্ৰেণী যিয়েই নহওক, খাদ্য সুৰক্ষাৰ ক্ষেত্ৰত কোনো ধৰণৰ আপোচ গ্ৰহণযোগ্য নহয়।
বেংগালুৰুৰ এই অভিযানৰ তথ্যই এটা কথাই স্পষ্ট কৰিছে—দামী হোটেল মানেই সুৰক্ষিত খাদ্য, এই ধাৰণা সদায় সঠিক নহ’বও পাৰে।
