কেন্দ্ৰৰ তিনি বিতৰ্কিত কৃষি আইনৰ বাতিলৰ দাবীত যোৱা দুমাহ ধৰি অব্যাহত থকা কৃষক বিক্ষোভ স্থলীত উদ্ধাৰ হৈছে কৃষকৰ এটা মৃতদেহ।
ৰাষ্ট্ৰীয় সংবাদ মাধ্যমত প্ৰকাশ পোৱা খবৰ অনুসৰি দিল্লী সীমান্তৰ টিকৰি বিক্ষোভস্থলীত এজন আন্দোলনৰত কৃষকে আত্মহত্যা কৰিছে।
আত্মহত্যা কৰা কৃষকজন ৫২ বছৰীয়া কৰমবীৰ সিং বুলি প্ৰকাশ কৰিছে আৰক্ষীয়ে।
“কৃষকজন জিণ্ড গাঁৱৰ কৰমবীৰ সিং। টিকৰি সীমান্তৰ দুই কিলোমিটাৰ নিলগৰ এখন পাৰ্কৰ গছত তেওঁৰ মৃতদেহ উদ্ধাৰ কৰা হৈছে।” বাহাদুৰগড় চিটি আৰক্ষী থানাৰ বিষয়া বিজয় কুমাৰে কয়।
আৰক্ষীৰ মতে কৃষকজনে মৃত্যুৰ পূৰ্বে এটা আত্মহত্যাৰ টোকা লিখি থৈ গৈছে।
“মৰমৰ কৃষক ভাইসকল, মোদী চৰকাৰে তাৰিখৰ পিছত তাৰিখ দি আছে…এই ক’লা কৃষি আইনসমূহ কেতিয়া বাতিল কৰিব কোনেও ক’ব নোৱাৰে।” আত্মহত্যাৰ পূৰ্বে কৃষকজনে এইদৰে লিখি গৈছে।
উল্লেখ্য যে প্ৰায় এপষেক পূৰ্বে হাৰিয়ানাৰ এজন কৃষকে বিষাক্ত খাদ্য খাই আত্মহত্যা কৰিছিল। অৱশ্যে কৃষকজন চিকিৎসাধীন অৱস্থাতহে মৃ্ত্যু হৈছিল।
আনহাতে ডিচেম্বৰত পঞ্জাৱৰ এজন উকীলে টিকৰি সীমান্তৰ প্ৰতিবাদস্থলীৰ পৰা কেই কিলোমিটাৰ মান নিলগত বিষ পাণ কৰি আত্মহত্যা কৰিছিল।
স্মৰ্তব্য যে প্ৰায় ৭০ দিন ধৰি দিল্লী সীমান্ত অঞ্চলসমূহত নিৰন্তৰ বিক্ষোভ অব্যাহত ৰাখিছে কৃষকসকলে।
কেন্দ্ৰীয় চৰকাৰৰ সৈতে ইতিমধ্যে কৃষক প্ৰতিনিধিৰে অনুষ্ঠিত হোৱা ১১ লানিকৈ আলোচনা ব্যৰ্থ হৈছে।