তামিলনাডু চৰকাৰে ৰাজ্যখনৰ টাছমাক (TASMAC) সুৰা বিপণীসমূহত কৰ্মৰত কৰ্মচাৰীসকলৰ দৰমহা ২৫ শতাংশলৈ বৃদ্ধি কৰাৰ কথা ঘোষণা কৰিছে। চৰকাৰৰ মতে, দুৰ্নীতি ৰোধ কৰা আৰু গ্ৰাহকৰ পৰা সুৰাৰ বটলৰ বিপৰীতে অতিৰিক্ত ধন লোৱা কাৰ্য বন্ধ কৰাই হৈছে এই পদক্ষেপৰ মূল লক্ষ্য। ৰাজ্য চৰকাৰৰ অধীনত পৰিচালিত সুৰা বিপণীসমূহৰ কাম-কাজ সংস্কাৰৰ বাবে চৰকাৰে গ্ৰহণ কৰা শেহতীয়া পদক্ষেপসমূহৰ ভিতৰত ই অন্যতম।
গ্ৰাহকৰ পৰা প্ৰতিটো বটলত অতিৰিক্ত ১০ টকা সংগ্ৰহ কৰাৰ এক অভিযোগ প্ৰায়ে উত্থাপন হৈ আহিছিল। চৰকাৰে আশা কৰিছে যে দৰমহা বৃদ্ধিৰ ফলত কৰ্মচাৰীসকলৰ এনে বেয়া অভ্যাস দূৰ হ‘ব। এই সিদ্ধান্তৰ বিষয়ে বুজাই মন্ত্ৰী বিঘ্নেশে কয় যে দৰমহা বৃদ্ধিৰ ফলত কৰ্মচাৰীসকলে নিৰ্ধাৰিত মূল্যতকৈ অধিক ধন গ্ৰাহকৰ পৰা আদায় লোৱাৰ পৰা বিৰত থাকিব। তেওঁ লগতে কয় যে যোৱা ২০ বছৰত টাছমাকৰ কৰ্মচাৰীসকলৰ বাবে এনেধৰণৰ দৰমহা বৃদ্ধি কৰা হোৱা নাছিল। চৰকাৰে বিশ্বাস কৰে যে উন্নত দৰমহাই দুৰ্নীতি হ্ৰাস কৰিব আৰু সকলো বিপণীতে জবাবদিহিতা উন্নত কৰিব। নতুন দৰমহা গাঁথনিৰ বিষয়ে অতি শীঘ্ৰেই সবিশেষ জানিব পৰা যাব।
মুখ্যমন্ত্ৰী জোচেফ বিজয়ে ধৰ্মীয় স্থান, শিক্ষানুষ্ঠান আৰু বাছ আস্থানৰ ৫০০ মিটাৰ ব্যাসাৰ্ধৰ ভিতৰত চলি থকা ৭১৭ খন টাছমাক সুৰা বিপণী বন্ধ কৰাৰ নিৰ্দেশ দিয়াৰ কেইমাহমানৰ পাছতেই এই নতুন ঘোষণাটো কৰা হৈছে। চৰকাৰী তথ্য অনুসৰি, তামিলনাডুত ৪,৭৬৫ খন টাছমাক বিপণী আছে, যাৰ ভিতৰত ৭১৭ খন বন্ধ কৰিবলৈ চিনাক্ত কৰা হৈছিল। ইয়াৰ ভিতৰত উপাসনাস্থলীৰ ওচৰৰ ২৭৬ খন, শিক্ষানুষ্ঠানৰ ওচৰৰ ১৮৬ খন আৰু বাছ আস্থানৰ ওচৰৰ ২৫৫ খন বিপণী আছিল। চৰকাৰে এই পদক্ষেপক স্পৰ্শকাতৰ ৰাজহুৱা স্থানত সুৰাৰ সহজলভ্যতা হ্ৰাস কৰাৰ এক সামাজিক সংস্কাৰমূলক ব্যৱস্থা হিচাপে অভিহিত কৰিছে।
চৰকাৰৰ এই সিদ্ধান্তই সকলো ৰাজনৈতিক দলৰ পৰা সমৰ্থন লাভ কৰিছে। অভিনেতা তথা ৰাজনীতিবিদ কমল হাছানে এই পদক্ষেপক আদৰণি জনাই কয় যে চৰকাৰে অধিক সুৰাৰ দোকান বন্ধ কৰা উচিত আৰু সুৰা বিক্ৰী নিয়ন্ত্ৰণৰ বাবে অধিক দায়িত্ব ল‘ব লাগে। কংগ্ৰেছৰ সাংসদ মাণিকম ঠাকুৰেও এই সিদ্ধান্তক ৰাইজৰ দীৰ্ঘদিনীয়া দাবীৰ প্ৰতি সঁহাৰি বুলি অভিহিত কৰি আদৰণি জনায় আৰু ইয়াৰ ফলত মহিলা, ছাত্ৰ-ছাত্ৰী আৰু সাধাৰণ ৰাইজৰ নিৰাপত্তা বৃদ্ধি পাব বুলি কয়।
ক্ষমতালৈ অহাৰ পিছত টিভিকে (TVK) চৰকাৰে গ্ৰহণ কৰা এলানি নীতিগত সিদ্ধান্তৰ ভিতৰত এই দৰমহা বৃদ্ধি হৈছে শেহতীয়া সংযোজন। ইয়াৰ পূৰ্বে চৰকাৰখনে ঘৰুৱা উপভোক্তাৰ বাবে বিনামূলীয়া বিদ্যুত যোগান, মহিলাৰ নিৰাপত্তাৰ বাবে এক সুকীয়া বাহিনী গঠন আৰু প্ৰতিখন জিলাতে ড্ৰাগছ বিৰোধী গোট গঠন কৰাৰ দৰে গুৰুত্বপূৰ্ণ জনকল্যাণমূলক পদক্ষেপ গ্ৰহণ কৰিছে।
