চুলাই মদত বিষক্ৰিয়া হৈ ৰাজ্যত প্ৰায় ১০০জন লোকে মৃত্যুক সাৱটি ল’ব লগীয়া হোৱা ঘটনাই ৰাজ্যক জোকাৰি থকাৰ সময়তে এই ঘটনা বিজেপি চৰকাৰৰ ভুল নীতিৰ বাবেই সংঘটিত হোৱাৰ গুৰুতৰ অভিযোগ আনিছে প্ৰাক্তন মুখ্য মন্ত্ৰী তৰুণ গগৈয়ে।
শনিবাৰে দিচপুৰৰ চৰকাৰী বাসভৱনত এখন সংবাদমেল সম্বোধন কৰি প্ৰাক্তন মুখ্য মন্ত্ৰীগৰাকীয়ে সৰ্বানন্দ সোণোৱাল নেতৃত্বাধীন চৰকাৰখনক তীব্ৰ সমালোচনা কৰে।
সোণোৱল চৰকাৰৰ ‘মদ বেচি ৰাজ্যৰ ৰাজহ বৃদ্ধি কৰিব বিচৰা’ নীতিৰ পৰিণামত এই শোকাৱহ ঘটনা সংঘটিত হোৱা বুলি গগৈয়ে অভিযোগ কৰে।
“এই চৰকাৰখনে মদৰ ওপৰত চোকা নজৰ ৰখাৰ বিপৰীতে মদ বিক্ৰী কৰাৰ ওপৰতহে অধিক গুৰুত্ব দিছিল। তেওঁলোকে সুৰাৰ ওপৰত থকা আইনসমূহ শিথিল কৰি দিছিল আৰু মদৰ পৰা উপাৰ্জন বৃদ্ধি কৰা সিদ্ধান্ত পোন প্ৰথমৰ পৰাই লৈছিল। আমি এনে চৰকাৰ দেখা নাছিলো যি চৰকাৰে সুৰাৰ পৰা অধিক ৰাজহ আদায় কৰি ৰাজ্যৰ উন্নয়নৰ চিন্তা কৰে”, প্ৰাক্তন মুখ্য মন্ত্ৰী গৰাকীয়ে কয়।
বিজেপি নেতৃত্বাধীন চৰকাৰখনে অসমীয়া মানুহ, অসমৰ যুৱক, বাগিচাৰ কৰ্মীসকলক মদাহী কৰি অসমখন ধ্বংস কৰিব বিচাৰিছিল বুলিও এক গুৰুতৰ অভিযোগ আনে।
“চুলাই মদ বিক্ৰী কৰি বেছি ৰাজহ কৰাত গুৰুত্ব দিয়া আমাৰ লক্ষ্য নেকি?”, প্ৰশ্ন প্ৰাক্তন মুখ্য মন্ত্ৰীজনৰ। বিজেপি চৰকাৰে মদ নিবাৰণৰ সলনি মদ বিতৰণৰ ওপৰতহে গুৰুত্ব দিলে বুলিও মন্তব্য কৰে গগৈয়ে।
তেওঁৰ মতে, ৰাজ্যত সুৰা সম্পূৰ্ণ বন্ধ নহ’লেও আবকাৰী বিভাগৰ নিয়ন্ত্ৰণত থাকিব লাগে।
উল্লেখ্য যে, সৰ্বানন্দ সোণোৱাল নেতৃত্বাধীন বিজেপি চৰকাৰ শাসনলৈ আহাৰ পাছতেই ‘দেশীয় সুৰা’ৰ প্ৰচলনৰ বাবে ইয়াক ‘ব্ৰেণ্ডিং’ কৰিছিল। ইয়াকে লৈ ৰাজ্যৰ বিভিন্ন মহলত সৰৱ চৰ্চাও হৈছিল।
ৰাজ্যত সংঘটিত ‘সুৰা ট্ৰেজেডি’ৰ লগত ৰাজনৈতিক বিষয় জড়িত থকাৰো ইংগিত দিয়ে প্ৰাক্তন মুখ্য মন্ত্ৰী তৰুণ গগৈয়ে। তেওঁ জিলা প্ৰশাসন, আৰক্ষী বিভাগ, আৱকাৰী বিভাগ আদি সকলোকে এই ঘটনাৰ বাবে দায়ী বুলি মন্তব্য কৰি সংশ্লিষ্ট বিভাগসমূহৰ তৎপৰতাৰ অভাৱৰ বাবেই সুৰাৰ অবৈধ ব্যৱসায় চলি থকা বুলিও তেওঁ সংবাদমেলত কয়।
“এতিয়া নিৰ্বাচনৰ বাবে আৱকাৰী বিভাগক টকা তুলিবলৈ লগাইছে। গতিকে এনে ধৰণৰ অবৈধ সুৰাৰ বেহা-বেপাৰ চলিব পাৰিছে”, তৰুণ গগৈৰ দাবী।
গগৈয়ে লগতে মুখ্য মন্ত্ৰীয়ে কোৱা ‘দুৰ্নীতিৰ প্ৰতি শূন্য সহনশীলতা’ কথাষাৰ অৰ্থহীন বুলি এই ঘটনাই প্ৰমাণ কৰিছে বুলিও মন্তব্য কৰে।
ইপিনে, বিষাক্ত সুৰা সেৱন কৰি মৃত্যু মুখত পৰা ঘটনাৰ তদন্ত এজন আয়ুক্তৰ দ্বাৰা নহয়, বৰঞ্চ ইয়াৰ এক ন্যায়িক তদন্ত হ’ব লাগে বুলিও প্ৰাক্তন মুখ্য মন্ত্ৰী গৰাকীয়ে দাবী কৰে। চৰকাৰী বিষয়া এজনে চৰকাৰৰ বিপক্ষে কি ধৰণৰ তদন্ত কৰিব বুলি তেওঁ প্ৰশ্ন কৰে।
গগৈয়ে লগতে নিহতৰ আত্মীয়লৈ ৫ লাখকৈ টকা এককালীন সাহায্য দিয়াৰ দাবী কৰে চৰকাৰক।
