অসম ক্রিকেট সন্থাৰ প্ৰাক্তন সম্পাদক প্রদীপ বুঢ়াগোহাঁইক কাৰাগাৰলৈ নিক্ষেপ কৰা হৈছে৷ দুদিনৰ আৰক্ষী জিম্মাত থকা বুঢ়াগোহাঁইক দেওবাৰে আদালতে ন্যায়িক জিম্মালৈ প্রেৰণ কৰে৷
আৰক্ষীয়ে পুনৰ তেওঁৰ জিম্মা বিচাৰি আৱেদন নকৰাৰ বাবেই আদালতে তেওঁক ন্যায়িক জিম্মালৈ প্রেৰণ কৰি আৰক্ষীক কাৰাগাৰতে তেওঁক জেৰা কৰাৰ অনুমতি দিয়ে ৷
মাত্র তিনিবছৰ কাল অসম ক্রিকেট সন্থাৰ সম্পাদকৰ পদত থকা প্রদীপ বুঢ়াগোহাঁইক প্ৰায় ৫০ কোটি টকাৰ লুণ্ঠন কৰাৰ অভিযোগত গ্রেপ্তাৰ কৰা হৈছিল৷
আদালতে দুদিনৰ আৰক্ষী জিম্মাত দিয়া বুঢ়াগোহাঁইক দুদিন ধৰি আৰক্ষীয়ে জেৰা কৰাৰ পাছত ম্যাদ উকলি যোৱাৰ বাবে আৰক্ষীয়ে তেওঁক দেওবাৰে পুনৰ আদালতত হাজিৰ কৰে৷
Also Read: অল্লু অৰ্জুনৰ ‘পুষ্পা: দ্য ৰাইজ’: বলীউদ-হলীউদৰ সৈতে ফেৰ মাৰি দুদিনতে ১০০কোটি টকাৰ ব্যৱসায়
উল্লেখ্য যে অসম ক্ৰিকেট সন্থাৰ (এচিএ) প্ৰাক্তন সম্পাদক প্ৰদীপ বুঢ়াগোহাঁইক বুধবাৰে ডিব্ৰুগড়ৰ টিংখং অঞ্চলৰ পৰা গ্ৰেপ্তাৰ কৰা হৈছিল।
গুৱাহাটীৰ ফটাশিল আৰক্ষী থানাত পঞ্জীয়ন কৰা ৮১৭/২০২১ ইউ/এছ ১২০(বি)/৪০৬/৪০৯/৪২০/৪৬৯/৩৪ আইপিচি নং গোচৰত ফটাশিল আৰক্ষীৰ দলে তেওঁক জিম্মাত লৈছিল।
অসম ক্ৰিকেট সন্থাই বুঢ়াগোহাঁইৰ কাৰ্যকালত এচিএ পুঁজিৰ কোটি কোটি টকাৰ অপব্যৱহাৰৰ অভিযোগ তুলি এজাহাৰ দাখিল কৰিছিল।
ইফালে, প্ৰদীপ বুঢ়াগোহাঁইৰ সম্পাদকীয় কাৰ্যকালত এচিএ সমিতিয়ে ব্যৱহাৰ কৰা একাউণ্টত কোটি কোটি পুঁজিৰ অপব্যৱহাৰৰ অভিযোগ নিৰ্ণয় কৰিবলৈ আৰু একাউণ্ট পৰীক্ষা কৰাৰ বাবে এচিএ-য়ে প্ৰবীণ ক্ৰীড়া সংগঠক জামছেদ খানৰ নেতৃত্বত পাঁচজনীয়া একাউণ্ট প্ৰমাণীকৰণ সমিতি গঠন কৰে।
Also Read:ধুবুৰীত আৰক্ষীৰ জিম্মাত থকা জব্দকৃত বাহন জ্বলাই দিলে অচিনাক্ত দুৰ্বৃত্তই
একাউণ্ট প্ৰমাণীকৰণ সমিতিয়ে হোটেলৰ কোঠা, বিমানৰ টিকট, খাদ্য আদিৰ নামত এচিএ পুঁজিৰ কোটি কোটি টকা অপব্যৱহাৰৰ বিষয়ে সন্দেহ প্ৰকাশ কৰে।
প্ৰদীপ বুঢ়াগোহাঁই ২০১৬ চনৰ পৰা ২০১৯ চনলৈ অসম ক্ৰিকেট সন্থাৰ সম্পাদকৰ দায়িত্বত আছিল।