বিতৰ্কিত মন্তব্যৰ গোচৰত আৰক্ষীৰ ওচৰত হাজিৰ হোৱাৰ নিৰ্দেশৰ বিৰুদ্ধে তৃণমূল কংগ্ৰেছৰ সাংসদ মহুৱা মৈত্ৰই কৰা আবেদনৰ শুনানি গ্ৰহণ কৰিবলৈ অস্বীকাৰ কৰিছে উচ্চতম ন্যায়ালয়ে। কলকাতা উচ্চ ন্যায়ালয়ৰ নিৰ্দেশক প্ৰত্যাহ্বান জনাই শীৰ্ষ ন্যায়ালয়ৰ কাষ চাপিছিল কৃষ্ণনগৰৰ সাংসদগৰাকী।
কিন্তু শুকুৰবাৰে শুনানিৰ সময়ত মহুৱাৰ অধিবক্তাই উত্থাপন কৰা নিৰাপত্তাজনিত সমস্যা আৰু কণী দলিওৱাৰ আশংকাক খাৰিজ কৰি বিচাৰপতিৰ বিচাৰপীঠে এক তাৎপৰ্যপূৰ্ণ মন্তব্য প্ৰদান কৰে। বিচাৰপীঠে কটাক্ষ কৰি কয় যে স্বাধীনতা সংগ্ৰামীসকলে বুকুত গুলী খাইছিল, অথচ এগৰাকী সাংসদ হৈ তেওঁ কণী দলিওৱালৈ ভয় কৰিছে নেকি।
বিচাৰপতি দীপংকৰ দত্ত আৰু বিচাৰপতি শীল নাগুৰক লৈ গঠিত উচ্চতম ন্যায়ালয়ৰ বিশেষ বিচাৰপীঠখনে স্পষ্ট কৰি দিয়ে যে কলকাতা উচ্চ ন্যায়ালয়ে দিয়া নিৰ্দেশত তেওঁলোকে কোনো ধৰণৰ হস্তক্ষেপ কৰিবলৈ আগ্ৰহী নহয়। ইয়াৰ পিছতে উচ্চতম ন্যায়ালয়ে সাংসদগৰাকীৰ এই আবেদনখন খাৰিজ কৰি গোচৰটোৰ নিষ্পত্তি কৰে।
শুনানি চলাকালীন মহুৱা মৈত্ৰৰ হৈ যুক্তি দৰ্শাই প্ৰবীণ অধিবক্তা গোপাল শংকৰনাৰায়ণে ন্যায়ালয়ক জনায় যে আৰক্ষীৰ জাননী অনুসৰি সাংসদগৰাকীক তেওঁৰ নিজৰ লোকসভা সমষ্টিৰ অন্তৰ্গত এখন আৰক্ষী থানাত ব্যক্তিগতভাৱে উপস্থিত থাকিবলৈ কোৱা হৈছে। পূৰ্বৰ কেইবাটাও ঘটনাৰ কথা সোঁৱৰাই দি অধিবক্তাগৰাকীয়ে যুক্তি দৰ্শায় যে যোৱাবাৰ যেতিয়া তেওঁ তালৈ গৈছিল, তেতিয়া তেওঁৰ ওপৰত কণী দলিওৱা হৈছিল। এই নিৰাপত্তাহীনতাৰ প্ৰতি লক্ষ্য ৰাখি তেওঁ আৰক্ষীৰ জেৰাৰ বাবে ভাৰ্চুৱেল বা অনলাইন মাধ্যমৰ জৰিয়তে উপস্থিত থকাৰ অনুমতি বিচাৰিছিল। কিন্তু ন্যায়ালয়ে তেওঁৰ এই যুক্তি গ্ৰহণ নকৰিলে আৰু সশৰীৰে হাজিৰ হোৱাৰ নিৰ্দেশ বাহাল ৰাখিলে।
