বঙাইগাঁও জিলাৰ মাণিকপুৰ আৰক্ষী থানা তথা মাণিকপুৰ ৰাজহ চক্ৰৰ অন্তৰ্গত ১ নং কাৱাদীত গেছ অথ’ৰিটি ইণ্ডিয়া লিমিটেড(GAIL) কৰ্মচাৰীয়ে দাদাগিৰি চলাই থকাৰ অভিযোগ উত্থাপন হৈছে।
সম্প্ৰতি গেইলৰ পাইপ লাইনৰ কাম চলি আছে ১ নং কাৱাদী গাঁৱত। এই গাঁৱখনৰ যিসকল লোকৰ মাটিৰ ওপৰেৰে এই পাইপ লাইন গৈছে সেই লোকসকলক এতিয়ালৈকে এটকাও লাভ কৰা নাই বুলি অভিযোগ কৰিছে ভুক্তভোগীসকলে।
ইফালে বিভিন্ন ভয়-ভাবুকিৰে পাইপ লাইনৰ কাম চলাই আছে বুলি স্থানীয় ৰাইজে অভিযোগ কৰে। অভিযোগ অনুসৰি যদি কোনো স্থানীয় লোকে ধন অৰ্থাৎ ভূমি ক্ষতিপূৰণ নোপোৱালৈকে কাম বন্ধ ৰাখিবলৈ কয় তেতিয়াই সেইজনৰ ওপৰত গেইল ইণ্ডিয়াৰ কৰ্মচাৰীয়ে নানা ভয় ভাবুকি দিয়ে।
ভালদৰে কাম কৰিবলৈ নিদিলে আৰ্মী-পুলিচ লগাই জে’লত ভৰাই থোৱা, ৰাতিৰ ভিতৰতে অপহৰণ কৰাৰ লগতে মৃত্যুৰ ভাবুকিও প্ৰদান কৰি পাইপ লাইনৰ কাম চলাই থকাৰ অভিযোগ কৰিছে ভুক্তভোগীয়ে।
কিন্তু এইক্ষেত্ৰত নীৰৱ প্ৰশাসন। মাণিকপুৰ আৰক্ষী থানাৰ আৰক্ষীৰ দল ঘটনাস্থলীত উপস্থিত হৈ গেইলৰ কৰ্মচাৰীৰ লগত মিতিৰালি কৰি ওলোটাই ৰাইজক বুজনি দিয়া বুলিও ৰাইজে অভিযোগ কৰিছে স্থানীয় লোকে।
আনকি মাণিকপুৰ ৰাজহ চক্ৰ বিষয়া গৰাকীও এই ক্ষেত্ৰত বিশেষ ভুমিকা লোৱা নাই বুলি স্থানীয় ৰাইজে অভিযোগ উত্থাপন কৰিছে।
এই পাইপ লাইনৰ কাম হৈ থকাৰ ফলত সেই গাঁওখনৰ দুখীয়া লোকসকলৰ ঘৰ, ঘৰৰ ভেটি বোৰত ফাঁট মেলিছে। বহু গছ গছনি কাটি তহিলং কৰিছে যাৰ বাবে এই অঞ্চলৰ লোকসকলৰ মাজত হাহাকাৰৰ সৃষ্টি হৈছে।
সেয়েহে এই অঞ্চলৰ ভুক্তভোগী লোকসকলে এক উচিত তদন্ত বিচাৰিছে আৰু প্ৰাপ্য ধন মোকলাই নিদিয়া পৰ্যন্ত এই কাম বন্ধ ৰাখিবলৈ জিলা প্ৰশাসনৰ লগতে অসম চৰকাৰক সজোৰে দাবী জনাইছে।