বিশ্বনাথ ঘাটত সদৌ অসম গৰিয়া মৰিয়া দেশী জাতীয় পৰিষদৰ বিশ্বনাথ জিলা সমিতিৰ অন্তৰ্গত বিশ্বনাথ সদৰ আঞ্চলিকৰ এখন সম্প্ৰসাৰণ সভা অনুষ্ঠিত হয় ।
সভাত প্ৰায় শতাধিক পুৰুষ-মহিলা, যুৱক-যুৱতীয়ে অংশগ্ৰহণ কৰে । সভাত বিশ্বনাথ জিলা সমিতিৰ প্ৰাক্তন সাধাৰণ সম্পাদক তথা বৰ্তমানৰ ৰাজ্যিক সাধাৰণ সম্পাদক (প্ৰশাসন) অধিবক্তা মইনুল ইছলামৰ উপৰি বিশ্বনাথ জিলা সমিতিৰ সভাপতি আফতাব উদ্দিন আহমেদ, উপ সভাপতি কাজি নজৰুল ইছলাম, সাধাৰণ সম্পাদক (সংগঠন) নেকিব আহমেদ, সহকাৰী সাধাৰণ সম্পাদক আচিফ আলি, ৰাজ্যিক কাৰ্যনিৰ্বাহক সদস্য ৰেকিব আলি আহমেদ, ঘাঁহিগাওঁ আঞ্চলিকৰ যুটীয়া সাধাৰণ সম্পাদক হবিবুৰ ৰহমান আদি উপস্থিত থাকে ।
সভাত ৰাজ্যিক সাধাৰণ সম্পাদক (প্ৰশাসন) অধিবক্তা মইনুল ইছলামে কয় যে গৰিয়া মৰিয়া দেশী লোক সকলে নিজৰ অধিকাৰ প্ৰাপ্য বিচৰা বাবে এচাম বংগমূলীয় লোকে সংগঠনটোৰ সদস্য সকলক সমাজ বিভাজনকাৰী বুলি আখ্যা দিয়াটোৱে তেওঁলোকৰ সুবিধাবাদী চৰিত্ৰ উদঙাই দিছে ।
তেওঁ লগতে অসম চৰকাৰে বিধান সভাত কৰা ঘোষণা মতে গৰিয়া মৰিয়া দেশী লোক সকলৰ সুকীয়া জৰীপ কৰিবলৈ আৰু উন্নয়ন নিগম গঠন কৰিবলৈ দাবী জনায় ।
চাহ জনগোষ্ঠীয় লোকসকলক জনজাতিৰ মৰ্য্যদা দিবলৈ চৰকাৰে বিবেচনা কৰাৰ পৰিৱৰ্তে অসমৰ বিভিন্ন খিলঞ্জীয়া জনগোষ্ঠীৰ পৰা ধৰ্মান্তৰিত গৰিয়া মৰিয়া দেশী লোক সকলৰ সুকীয়া জৰীপত বিলম্ব কৰা কথাটোত সংগঠনটোৱে এক ৰাজনৈতিক অভিসন্ধিৰ গোন্ধ পোৱা বুলি ৰাজ্যিক সাধাৰণ সম্পাদকগৰাকীয়ে উল্লেখ কৰে ।
সভাত সৰ্বসন্মতি ক্ৰমে বিশ্বনাথ সদৰ আঞ্চলিকৰ পদবীৰ কিছু সালসলনি কৰি সভাপতি অধিবক্তা তৌফিক আহমেদক সহায় কৰিবলৈ সম্পাদকৰ দায়িত্বত থকা আজিজুৰ ৰহমানক কাৰ্যকৰী সভাপতি দায়িত্ব অৰ্পণ কৰা হয় । লগতে সভাই দাৰাজ আহমেদক সাধাৰণ সম্পাদক হিচাপে নিৰ্বাচিত কৰে ।
