অসম প্ৰদেশ কংগ্ৰেছৰ সভাপতি তথা যোৰহাট লোকসভা সমষ্টিৰ সাংসদ গৌৰৱ গগৈয়ে আজি গুৱাহাটীস্থিত ৰাজীৱ ভৱনত আয়োজিত সংবাদমেলত একাধিক গুৰুত্বপূৰ্ণ ৰাজনৈতিক মন্তব্য প্ৰদান কৰে। মুখ্যমন্ত্ৰী ডঃ হিমন্ত বিশ্ব শৰ্মাক তীব্ৰভাৱে কটাক্ষ কৰি কয়, “নিজৰ চৰকাৰৰ বিফলতা ঢাকিবলৈ মুখ্যমন্ত্ৰীগৰাকীয়ে মহম্মদ আলী জিন্নাৰ দৰে সাম্প্ৰদায়িক ৰাজনীতিৰ আশ্ৰয় লৈছে। আমি অসমত তেনে ৰাজনীতি চলিবলৈ নিদিও।”
গগৈয়ে দাবী কৰে যে, বিজেপি আৰু তাৰ সহযোগী সংগঠনসমূহে অসমতো মণিপুৰৰ দৰে ভাতৃঘাতী সংঘাতৰ পৰিৱেশ সৃষ্টি কৰিবলৈ চেষ্টা কৰি আছে যদিও অসমীয়া ৰাইজে সেই ষড়যন্ত্ৰ ব্যৰ্থ কৰিব। “নিৰ্বাচন সমাগত। বিফলতা ঢাকিবলৈ এই সাম্প্ৰদায়িক ৰাজনীতি। বিজেপি, আৰএছএছ, বজৰং দল, ভিএইচপি আদিৰ এই ষ্ট্ৰেটেজিত ক্ৰিমিনেল মানসিকতাৰ লোকৰ ভূমিকা স্পষ্ট,” বুলি মন্তব্য কৰে সদ্য নিযুক্ত প্ৰদেশ কংগ্ৰেছৰ সভাপতি গৰাকীয়ে।
লখিপুৰত সাম্প্ৰতিক গো-মাংস উদ্ধাৰ সন্দৰ্ভত গগৈয়ে কয়, “এই আইডিয়াটো বিজেপিক কোনে দিলে? এতিয়ালৈ ধৰা পৰা সকলোৰে ওপৰত তদন্ত হ’ব লাগে।” তেওঁ লগতে কয় যে কংগ্ৰেছ সকলো ধৰ্ম, জাতি আৰু জনগোষ্ঠীৰ দল, যিয়ে বিভাজনৰ ৰাজনীতিৰ সলনি ঐক্যত বিশ্বাস কৰে।
সংবাদ মাধ্যমৰ আগত মুখ্যমন্ত্ৰীক কটাক্ষ কৰি তেওঁ কয়, ”গৌৰৱ গগৈৰ গাড়ীত কোন বহে, কোন নবহে সেইবোৰ কথা অসমৰ ৰাইজে মুখ্যমন্ত্ৰীৰ পৰা জানিব নিবিচাৰে। চৌদিশে দেখা দিয়া সমস্যাসমূহ সমাধান কৰিবলৈ চৰকাৰে কি কৰিছে সেই কথাহে মুখ্যমন্ত্ৰীৰ পৰা ৰাইজে জানিব বিচাৰে।’’ এই প্ৰসংগতে তেওঁ বিগত নিৰ্বাচনৰ সময়ত কেন্দ্ৰীয় গৃহমন্ত্ৰী অমিত শ্বাহে বান সমস্যা ৰোধ কৰিবলৈ পুখুৰী খান্দিব বুলি কোৱা কথাৰ অৱতাৰণা কৰে। তেওঁ কয়, ”অমিত শ্বাহে কোৱা সেই পুখুৰী খন্দা হ’লনে? আমিও চাবলৈ যাও পুখুৰীকেইটা।মুখ্যমন্ত্ৰীয়ে এদিন কৈছিল যে তেওঁ মাটি দান দিব। ক’ত দান দিলে মাটি? আজি বড়ো, ৰাভা, কাৰ্বি, ডিমাছা ৰাইজৰ মাটিবোৰ কাঢ়ি লৈছেহে। তেওঁৰ পৰা ৰাইজে এইধৰণৰ ৰাজহুৱা স্বাৰ্থজনিত কথাবোৰহে জানিব বিচাৰে।
শিৱসাগৰত অএনজিচিৰ গেছ লীকৰ সৈতে নাম সাঙোৰ খাই পৰা লোকজনৰ স্থানীয় বিজেপি নেতাৰ সৈতে যে সম্পৰ্ক আছে বুলি ওলোৱা খবৰ সঁচা নে মিছা সেয়া ৰাইজে জানিব বিচাৰে।’’ আনহাতে একাংশ সংবাদ মাধ্যমে প্ৰদেশ কংগ্ৰেছৰ নতুন সমিতিত বংশবাদ আছে বুলি প্ৰকাশ কৰা বাতৰি সন্দৰ্ভতো গৌৰৱ গগৈয়ে সংবাদমেলত তাৎপৰ্যপূৰ্ণ মন্তব্য কৰে। তেওঁ কয় যে ছ’চিয়েল মিডিয়াৰ নৱনিযুক্ত অধ্যক্ষ প্ৰফুল্ল কুমাৰ দাসৰ পৰিৱৰ্তে একাংশই প্ৰদ্যুৎ বৰদলৈৰ পুত্ৰক লৈ লাগি আছে। কংগ্ৰেছত বংশবাদ আছেই যদি পৰিয়ালৰ কোনো লোক ৰাজনীতিত নথকা প্ৰফুল্ল কুমাৰ দাসৰ দৰে নেতাই কিদৰে ছ’চিয়েল মিডিয়া বিভাগৰ অধ্যক্ষ পদ পালে বুলি প্ৰশ্ন কৰে। গগৈয়ে কয় যে প্ৰদ্যুৎ বৰদলৈৰ পুত্ৰ প্ৰতীক বৰদলৈ ছ’চিয়েল মিডিয়াৰ ক্ষেত্ৰখনত দখল থকা এগৰাকী প্ৰতিভাৱান যুৱক বাবেই ছ’চিয়েল মিডিয়া বিভাগত সম-অধ্যক্ষৰ দায়িত্ব লাভ কৰিছে।
]সংবাদমেলৰ মাজতে ৰসিকতা কৰি গগৈয়ে বিজেপিৰ ‘টাৰ্গেট গৌৰৱ’ সম্পৰ্কে কয়, ”বিজেপিয়ে মোক লৈ দুই-এদিনতে ভুৱা চিনেমা কৰিব বুলিও খবৰ পাইছো। কিবা কেৰেক্টাৰত মোৰ চেহেৰাতো লগাই দিব। এইবোৰ টেকন’লজিৰ যুগ। এআইৰ যুগ। গতিকে তেওঁলোকৰ টেকন’লজিৰ লগত যুঁজিবলৈ আমি টেকন’লজি জনা ইয়ং ল’ৰা এজনক লৈছো।’’
ইফালে, সভাপতিৰ দায়িত্ব লৈয়েই গঠন কৰি দিয়া বিভিন্ন জিলাৰ পৰ্যবেক্ষকসকলে দাখিল কৰা প্ৰতিবেদন সম্পৰ্কে দিনযোৰা চৰ্চা চলিব বুলিও আজিৰ সংবাদমেলত জানিবলৈ দিয়ে গৌৰৱ গগৈয়ে। উক্ত প্ৰতিবেদনৰ ভিত্তিতেই নিখিল ভাৰত কংগ্ৰেছ কমিটিৰ সৈতে আলোচনা কৰি সমাগত বিধানসভা নিৰ্বাচনৰ ৰণনীতি প্ৰস্তুত কৰা হ’ব বুলিও সদৰী কৰে সভাপতি গগৈয়ে।
