বিগত ১২ বছৰে ভাৰতে দেশৰ মাটিত কোনো টেষ্ট শৃংখলাত পৰাজিত হোৱা নাই। দেশৰ মাটিত একেৰাহে ১৮ খন ছিৰিজ জয়ৰ অভিলেখো স্থাপন হৈছে, যিটো একপ্ৰকাৰ অনন্য অভিলেখ। কিন্তু ২০২৪ত নিউজিলেণ্ডৰ হাতত পৰাজয়ৰ ফলত এই ধাৰাত যতি পৰিল। বেংগালুৰুত ৮ উইকেটত পৰাস্ত হোৱাৰ পাছত পুনেত ১১৩ ৰানত পৰাস্ত হৈ ভাৰতে ২-০ ব্যৱধনত পৰাস্ত হয় এই শৃংখলাত।
এই পৰাজয়ৰ পিছতে ভাৰতীয় দলৰ প্ৰাক্তন খেলুৱৈ তথা প্ৰশিক্ষক গৌতম গম্ভীৰৰ ভূমিকাক লৈ স্বাভাৱিকতে প্ৰশ্ন উত্থাপন হৈছে। ক্ৰিকেট সমালোচকসকলে গম্ভীৰৰ অতি আগ্ৰাসী কৌশলকে এই পৰাজয়ৰ অন্যতম কাৰণ বুলি গণ্য কৰে।
নিউজিলেণ্ডৰ শৃংখলাৰ পূৰ্বে আৰু চলি থকা সময়ত প্ৰশিক্ষকগৰাকীয়ে আক্ৰমণাত্মক খেলৰ ওপৰত গুৰুত্ব আৰোপ কৰি কৈছিল যে তেওঁৰ একমাত্ৰ লক্ষ্য হৈছে জয়ী হোৱা। অতি আক্ৰমণাত্মক মানসিকতা প্ৰয়োগ কৰা এই কৌশলক ইংলেণ্ডতো ব্যৱহাৰ কৰা হয়, যাক ক্ৰিকেট বিশ্বই ‘বাজবল’ বুলি অভিহিত কৰিছে।
লগতে পঢ়কঃ আপোনাৰ সন্তান পঢ়া-শুনাৰ প্ৰতি আগ্ৰহী নহয় নেকি? জানেনে কেনেকৈ সলনি কৰিব তেওঁলোকৰ মন?
ক্ৰিকেটৰ নান্দনিকতাৰ পৰা বহু দূৰত, এই অতি আক্ৰমণাত্মক কৌশলে ইংলেণ্ডক বিশ্ব টেষ্ট চেম্পিয়নশ্বিপ তালিকাৰ ষষ্ঠ স্থানলৈ নমাই আনিছে আৰু তেওঁলোকৰ ফাইনেলৰ সপোন প্ৰায় ভাঙি পেলাইছে। ভাৰতৰ ক্ষেত্ৰতো ইয়াৰ নেতিবাচক প্ৰভাৱো লক্ষ্য কৰা গ’ল। গম্ভীৰৰ কৌশল বুমেৰাং হৈ ভাৰতৰ বাবে পৰাজয়ৰ দুৰ্দশা কঢ়িয়াই আনিলে।
বাংগালুৰু টেষ্টৰ চতুৰ্থ ইনিংছত চাৰি নম্বৰত বেটিং কৰি শতক অৰ্জন কৰে সৰফৰাজ খানে। কিন্তু দ্বিতীয় টেষ্টত শুভমন গিল ঘূৰি অহাৰ পিছত সৰফৰাজক ছয় নম্বৰলৈ নমাই দিয়া হয়। ভাৰত প্ৰথম ইনিংছত ১৫৬ ৰাণত অল আউট হৈছিল আৰু তেতিয়াৰ পৰাই দলটো বেকফুটত আছিল। দ্বিতীয় ইনিংছত টীম মেনেজমেন্ট আৰু প্ৰশিক্ষকৰ সিদ্ধান্তই সৰফৰাজৰ ওপৰত বেটিং ক্ৰমত ৱাশ্বিংটন সুন্দৰক উন্নীত কৰি দলটোক সুস্থিৰ কৰাৰ পৰিৱৰ্তে আৰু অধিক বেকফুটলৈ ঠেলি দিয়ে।
পুনেত ভাৰতে স্পিন সহায়ক পিটচত তিনিজন স্পিনাৰৰ সৈতে খেলিছিল আৰু গোটেই মেচখনত স্পিনাৰসকলে ২০টা উইকেট দখল কৰিছিল। কিন্তু মূল পেচাৰ হিচাপে পৰিগণিত হোৱা যশপ্ৰীত বুমৰাহক এবাৰো ব্যৱহাৰ কৰা নহ’ল। লগতে বাংলাদেশৰ বিৰুদ্ধে সফল আকাশদ্বীপক প্ৰথম ইনিংছত মাত্ৰ ৬ অভাৰ বল কৰিব দিছিল আৰু দ্বিতীয় ইনিংছত বলেই নিদিলে।
লগতে পঢ়কঃ প্ৰকৃতি ধ্বংসৰ চৰম পৰ্যায়! বিশ্ব পৰিবেশ সংৰক্ষণ সূচাংকত ১৮০ খন দেশৰ ভিতৰত ১৭৬সংখ্যক স্থান ভাৰতৰ
এই ক্ষেত্ৰত অধিনায়ক ৰোহিত শৰ্মাৰ বাহিৰেও গৌতম গম্ভীৰৰ ষ্ট্ৰেটেজিয়েও অলপ কাম কৰিছে বুলি ভাৰতীয় অনুৰাগীয়ে বিশ্বাস কৰে। গুৰুত্বপূৰ্ণ সময়ত দলৰ হৈ উইকেট লোৱাৰ ক্ষেত্ৰত যশপ্ৰীত বুমৰাহ কিমান ফলপ্ৰসূ সেই কথাও ভাৰতে পূৰ্বে প্ৰমাণ কৰিছে। সেইবাবেই হয়তো বুমৰাহক বলিঙলৈ ঘূৰাই ননাটো ভাৰতৰ বাবে হিতে বিপৰীত হোৱা দেখা গ’ল।
উল্লেখ্য যে এই শৃংখলাত পৰাস্ত হোৱাৰ ফলত ভাৰতৰ বিশ্ব টেষ্ট চেম্পিয়নশ্বিপৰ ফাইনেলৰ পথটো কঠিন হৈ পৰিছে। এতিয়া পৰৱৰ্তী ৬ খন টেষ্ট মেচৰ ভিতৰত ৪ খনত জয়ী হব লাগিব, তেতিয়াহে ভাৰতে অসুবিধা নোহোৱাকৈ ফাইনেলত প্ৰৱেশ কৰিব পাৰিব। গৌতম গম্ভীৰেও ৰবি শাস্ত্ৰী আৰু ৰাহুল দ্ৰাবিড়ৰ পিছত প্ৰশিক্ষক হিচাপে নিজকে প্ৰতিষ্ঠা কৰিব বিচাৰিব। কিন্তু আগন্তুক বৰ্ডাৰ-গাভাস্কাৰ ট্ৰফীত তেওঁৰ এই আগ্ৰাসন কামত আহিব নে নাই সেয়া হ’ব লক্ষ্যণীয়।
