কৃত্ৰিম বুদ্ধিমত্তাৰ (AI) প্ৰতিযোগিতা এতিয়া তুংগত উঠিছে। প্ৰযুক্তি কোম্পানীসমূহক ChatGPT, Gemini, Claude ৰ দৰে AI প্লেটফৰ্ম আৰু অধিক শক্তিশালী কৰিবলৈ বিশাল কম্পিউটিং শক্তিৰ প্ৰয়োজন। আৰু সেইবাবেই গুগলে ইলন মাস্কৰ স্পেচএক্সৰ সৈতে এক বৃহৎ চুক্তি কৰিছে।
আমেৰিকাৰ নিয়ন্ত্ৰণ সংস্থাৰ ওচৰত দাখিল কৰা নথি অনুসৰি স্পেচএক্সৰ ডাটা চেণ্টাৰৰ কম্পিউটিং শক্তি ব্যৱহাৰৰ বাবে গুগলে প্ৰতিমাহে ৯২ কোটি ডলাৰ (ভাৰতীয় মুদ্ৰাত প্ৰায় ৭,৮০০ কোটি টকা) ব্যয় কৰিব। ২০২৬ চনৰ অক্টোবৰৰ পৰা ২০২৯ চনৰ জুনলৈকে থাকিব এই চুক্তি।
ইয়াত গুগলে কোনো ধৰণৰ ৰকেট বা চেটেলাইট কিনা নাই। বৰঞ্চ ই স্পেচএক্সৰ ডাটা চেণ্টাৰত থকা অতিশয় শক্তিশালী কম্পিউটাৰ ব্যৱহাৰ কৰাৰ সুযোগ কিনিছে। এই আন্তঃগাঁথনিত প্ৰায় ১.১ লাখ NVIDIA GPU, CPU, মেমৰি আৰু অন্যান্য উন্নত কম্পিউটিং সঁজুলি অন্তৰ্ভুক্ত কৰা হৈছে। সহজ ভাষাত ক’বলৈ গ’লে গুগলে স্পেচএক্সৰ পৰা এআই চলাবলৈ প্ৰয়োজনীয় বিশাল কম্পিউটিং শক্তি ভাড়াত লৈছে।
গুগলে কয় যে তেওঁলোকৰ এআই ভিত্তিক সেৱা জেমিনাই এণ্টাৰপ্ৰাইজৰ ব্যৱহাৰ দ্ৰুতগতিত বৃদ্ধি পাইছে। কোম্পানীয়ে আশা কৰাতকৈ অধিক গ্ৰাহকে এই সেৱা ব্যৱহাৰ কৰিছে। ফলত গুগলৰ নিজা ডাটা চেণ্টাৰৰ ওপৰত চাপ বাঢ়িছে। নতুন আন্তঃগাঁথনি নিৰ্মাণ কৰিবলৈ সময় লাগে। গতিকে এতিয়াৰ বাবে কোম্পানীটোৱে অতিৰিক্ত কম্পিউটিং শক্তি লাভ কৰিবলৈ স্পেচএক্সৰ পৰা সহায় লৈছে।
গুগলৰ ভাষাত এয়া ‘সেতু ক্ষমতা’ (bridge capacity) চুক্তি। অৰ্থাৎ তেওঁলোকে নিজৰ আন্তঃগাঁথনি ডাঙৰ নোহোৱালৈকে স্পেচএক্সৰ শক্তি সাময়িকভাৱে ব্যৱহাৰ কৰিব।
এই চুক্তিৰ পৰা স্পেচএক্সে বৃহৎ পৰিমাণৰ উপাৰ্জন কৰিব। ইলন মাস্কৰ কোম্পানীয়ে কয় যে তেওঁলোকে নিজৰ ডাটা চেণ্টাৰৰ অব্যৱহৃত কম্পিউটিং শক্তি আন কোম্পানীক ভাড়াত দিয়াৰ পৰিকল্পনা কৰিছে। গুগলৰ সৈতে হোৱা এই চুক্তি সেই পৰিকল্পনাৰে অংশ।
ইয়াৰ পূৰ্বে স্পেচএক্সে এআই কোম্পানী এণ্ট্ৰপিকৰ সৈতেও বহু কোটি ডলাৰৰ কম্পিউটিং চুক্তিত স্বাক্ষৰ কৰিছিল।
এসময়ত স্পেচএক্সক মূলতঃ ৰকেট আৰু ষ্টাৰলিংকৰ কোম্পানী হিচাপে দেখা গৈছিল। কিন্তু এতিয়া কোম্পানীটোৱে এআই আন্তঃগাঁথনি ব্যৱসায়তো ডাঙৰ ভূমিকা ল’বলৈ বিচাৰিছে।
বিশেষজ্ঞসকলৰ মতে এআইৰ যুগত কেৱল চফটৱেৰেই নহয়, শক্তিশালী কম্পিউটিং শক্তিও আটাইতকৈ মূল্যৱান সম্পদ হৈ পৰিছে। যেতিয়া গুগলৰ দৰে বিশ্বৰ অন্যতম বৃহৎ প্ৰযুক্তি কোম্পানীয়ে স্পেচএক্সৰ ওপৰত নিৰ্ভৰশীল হয়, তেতিয়া এই বজাৰখন কিমান দ্ৰুতগতিত বৃদ্ধি পাইছে সেয়া স্পষ্ট হৈ পৰে।
এই চুক্তিয়ে আন এটা কথা স্পষ্ট কৰি দিয়ে – প্ৰযুক্তি কোম্পানীসমূহে এতিয়া এআইৰ দৌৰত আগবাঢ়ি থাকিবলৈ কোটি কোটি টকা খৰচ কৰিবলৈ সাজু হৈছে।
